3
Pai Pui Yum Taix Moi
(Mat 12:9-14; Luk 6:6-11)
1 Nawh Cao deeh laig ka daux nyiex dee sidiex mai pui yum taix kroh taix tix khawn, ot tan tix kaux.
2 Nawh Cao sang cox ka kaw an ngaix twah lie, ang cox lie, kix jhak ti yaox Nawh Cao, yuh ka mawx sonsang pon ti deuh phimap ka Nawh heue.
3 Nawh Cao ah nin ka pui pa hoik yum taix, kroh taix tix khawn an, “Kaoh cung tin heue.”
4 Nawh Cao baox chawk ah nin ka kix, “Khaw ti yuh pa mhawm ngaix twah lie? phan ang mawh nan khaw ti yuh laux lie? Khaw ti taoh ju lie, phan ang mawh nan khaw ti pah yum lie?” Kix ang nye heue.
5 Khaix an Nawh Cao song rhawm mai jhak sivie tan piang kix, Nawh Cao khi rhawm kheu kien rhawm kix mai ah nin ka pui an, “Nyeu taix maix heue.” nawh nyeu taix tix mai taix nawh deeh mhawm heue.
6 Pharishie khankix lih hu mai dom mawx dom an kix kum kawng mai kawncau Herut grawh grawng sang pon kix ti yuh Nawh Cao laux yuh ka mawx heue.
Cox Pui Saux Moi
(Mat 12:15-16; Luk 6:17-19)
7 Yesux mai kawncau Nawh khankix hu ka rawm nhawng mai cub pui hun pa kaoh khaing meung Galilie, hawt khaix kix heue.
8 Meung Yudax mai khaing veng Yerusaliem, khaing veng Idom mai haktiex plak toi rawm Yawdan, kix pa ot sivie siveng veng Turux mai veng Sidom khankix, pui hun mhong grawh grawng pa yuh Nawh Cao mai hoek ka Nawh heue.
9 Mawh kheu pui kied haoh hun tan, son ang kix sang theen Nawh tom tip, Nawh Cao nhie kawncau Nawh khankix kieh reu iak krox dex Nawh tix lhang heue.
10 Mawh kheu Nawh hoik cox pui moi tom nie, can pui pa koe jhawm saux khawmuik, tom theen ka Nawh sonsang pon teeh kix ka Nawh Cao.
11 Yam yaox phi pa seeing khankix ka Nawh Cao kix goh gup sivoe Nawh mai kok yo ah nin, “Maix mawh Kawn Siyiex heue.”
12 Nawh tawm lox ka kix tom nie, son ang kix sang kieh pui tawng Nawh Cao heue.
Laug Kawncau Kao Ra Kaux
(Mat 10:1-4; Luk 6:12-16)
13 Nawh Cao haok ka gawng mai kok pui pa mie Nawh ti kok khankix mai kix hoek ka Nawh heue.
14 Nawh Cao ciak ti deuh pui kao ra kaux, sonsang ot kix tau mai Nawh sonsang ploi kix hu sidiex,
15 Nawh tawx sibrawm ka kix sonsang chix cox jhawm saux moi mai chix grheu phicaox lih heue.
16 Kao ra kaux an mawh, Simon pa sum Nawh Cao ceu kaux khraox mawh Petrux,
17 Yakop kawn simex Zebedie, Yohan pa mawh pux Yakop mai Nawh Cao, sum ceu kaux khraox kiex Boneragiex, dee bleeh ceu kaux an, mawh kawn simex sinum praix.
18 Andare mai Philipux mai Bathawlamie, Mathiex, Thomax, Yakop pa mawh kawn simex Alaphie, Thatdie, Simon pui Kananix.
19 Yudax Isakariut, pa tik pa tawx Nawh Cao heue. Kix hu laig daux nyiex tix nyiex.
Yesux Mai Belazebulax
(Mat 12:22-32; Luk 11:14-23; 12:10)
20 Deeh khrawm pui hun tan tix bawg, tom ang lai pon ih pa ih heue.
21 Yam mhong puxaik Nawh khankix grawng an, kix hoek ti giex Nawh Cao kheu kix ah Nawh yhot heue.
22 Pui tiiem lai khankix pa lih hoek khaing veng Yerusaliem kawx, ah nin, “Nawh koe Belazebulax mai kheu een Nawh rhawm ka simiang phicaox Nawh tom grheu phicaox khankix lih heue.”
23 Nawh Cao kok kix hoek ka Nawh mai Nawh teei lox tiag ah nin ka kix, “Satan chix grheu Satan lih yuh ka mawx?
24 Phan meung tix meung ang khaw paox tix, gwieh paox tix, meung an ang chix kaux cong heue.
25 Phan nyiex tix nyiex ang khaw paox tix, gwieh paox tix, nyiex an ang chix kaux cong heue.
26 Phan Satan kaoh mai ang khaw ka tokaux tix, gwieh paox tix, nawh ang chix kaux cong, dee sidah tak laux heue.
27 Pui tix kaux kawx ang chix laig ka daux nyiex pui pa ting riang mai yuh kraung cie nawh laux, phan nawh ang phyawk pui pa ting riang an ka mai khaix an nawh tak yuh nyiex nawh laux heue.
28 Aux krai lox tete ka pex, tak sang pluat phimap kawn pui khawmuik mai lox pa salao ka Siyiex khawmuik heue.
29 Viang mawh nan, pui mawx ang ah pa salao ka Khuan Singax Singeh, ang pluat phimap nawh tix bawg kawx, viang mawh nan phimap pa yuh nawh an, mawh phimap leeing ju heue.”
30 Mawh kheu hoik ah kix, Nawh koe phi pa seeing Nawh tom ah nan.
Miex Nawh Mai Pux Nawh
(Mat 12:46-50; Luk 8:19-21)
31 Miex Nawh Cao mai pux Nawh khankix hoek cung plak praix mai kix ploi pui hu kok ka Nawh heue.
32 Cub pui hun ngawm sivie Nawh Cao mai kix ah nin ka Nawh, “Miex Maix mai pux Maix khankix ot plak praix mai sawg Maix heue.”
33 Nawh Cao pawk lox ah nin ka kix, “Miex Aux mai pux Aux khankix mawh mawx?”
34 Nawh jhak piang pui pa ngawm sivie siveng Nawh khankix mai Nawh Cao baox ah nin, “Jhak heue, miex Aux mai pux Aux khankix,
35 mawh kheu pui mawx ang ah pa yuh alo pa khaw caw rhawm Siyiex, pui an mawh pux Aux mai nan Aux mai miex Aux heue.”