1 Aux ah nin “Cao kaing ceu pui Yakop khankix mai cao pa kwang ka daux nyiex ma ceu pui Isarelax khankix eue, pex nghiet yam in, ang pex mawh pa caw ti koe krax tawng ka krax prawng krax ciyang pa rahsee heue. 2 Pex pa koeng ka ceu pa mhawm mai moh ka ceu pa caox, pa tawx hak khaing pui Aux mai pawh nex khaing si-ang kix, 3 pa ih nex pui Aux khankix pa tawh hak kix, pa raig si-ang kix mai gam kix phawng, awm lon nex daux aw, awm nex pa koe ka daux aw rawm taux heue. 4 Yam an, kix tak sang riag yo lox tix ka Siyiex, viang mawh nan, Nawh Cao tak ang lai pawk lox kix, Nawh Cao tak sang veeh pakngai tix khaing kix ka daux bawg yam an, kheu hoik dawg yuh kix ceu pa caox ka daux kaing yuh kix heue. 5 Siyiex ah nin, ka son grawng cao jhai khankix, pa kieh pui Aux khankix koe krax lud loe, pa kok yo ti ah nin, “Koe krax pa nhim heue. Yam yaox rhang kix ti sai pa ih, pa khre rien ti sang yuh pa caox ka piang pui pa ang tawx pa ih tix ceu kawx ka daux jheeh kix heue.” 6 Pex tak sang hoek ka daux pa faik ponsawm tom ang tix lai chix yaox riang susai mai tak sang hoek ka daux pa faik tom ang pon krai grawng pa tak sang hoek heue. Singaix tak sang klip ka son cao jhai mai plak pon ngaix tak sang mawh pa faik ka son kix heue. 7 Yam an cao jhai khankix tak koe krax kaig tua mai cao pa sibawk tak sang koe krax pa laux rhawm heue. Kix khawmuik, tak sang mip siyieb jheeh tix, kheu ang Siyiex pawk lox kix heue. 8 Aux mawh pa grum naog sibrawm kheu khuan Siyiex mai ka riang grang pa rahsee mai riang grang pa kied ting kied lhaong, sonsang pon pao krai Yakop grawng pa lud nawh khankix mai jhi Isarelax yaox ka phimap nawh khankix heue. 9 Pex pa mawh cao kaing nyiex ma pui Yakop mai cao pa kwang ka piang nyiex ma ceu pui Isarelax khankix eue, pa seeing ka krax pa rahsee khankix mai pa pluk pliak ti tik been pa khaw caw khankix, 10 pa sum veng Zion ka krax pa jah nham mai sum veng Yerusaliem, ka daux krax pa koe map koe grham khankix eue, nghiet ka lox in, daux yam in heue. 11 Cao kaing nawh khankix, prawng see sonsang teei tix totaix pa cun praok, cao giex kaing li nawh khankix sidiex gau sonsang pon tix ngawh jum mai cao jhai nawh khankix yuh sibawk sonsang pon tix mau heue. Viang yuh nan, kix du lox tix ka piang Siyiex ah nin, mawh ang Siyiex ot ka daux sinax ex lie? Ceu pa kha rhawm tak ang lai pon hoek ka piang ex heue. 12 Mawh kheu jao grawng pex, gawng Zion tak sang mawh pa thai tix awm gwang kaung tix gwang, veng Yerusaliem tak sang lih ti mawh pum tiex pa laux leeing mai gawng nyiex bwan in tak sang awm gawng daux tiagtu heue.Ref 3:12 Ye 26:18.