1 Simiang Siyiex ah nin ka Mose, 2 “Krai ah nin ka ceu pui Isarelax khankix, can ceu pui Isarelax ang ah, nyo sinie pa hoek ot sinax ceu pui Isarelax ang ah, kaw pa hu tawx doeh ru tix ka siyiex Molawk ang ah, nawh tak pon krax yum tete, pui haktiex khankix tak dheem nawh ka simaox. 3 Aux tak veeh pakngai ti khaing nawh mai teei ti tik nawh khaing daux ceu pui nawh, kheu hoik tawx nawh doeh ru tix tiblah ka siyiex Molawk sonsang yuh nawh dee pa singax singeh Aux seeing brai mai kieh ceu kaux pa singax singeh Aux, mawh pa nunai giex going. 4 Phan pui haktiex khankix mox ngai tix ka pui pa hu tawx doeh ru tix ka siyiex Molawk mai phan kix ang pah ka nawh. 5 Aux tak veeh pakngai tix khaing pui an mai kawn nyiex ma nawh mai Aux tak teei ti tik nawh khaing daux ceu pui nawh, khawm can pui pa yuh pa lud vao, tau mai siyiex Molawk. 6 Kaw pa hu sawg hu peung ka pui pa chix yuh phi mai pa chix yuh simeed pa dex mai phicaox, Aux tak veeh pakngai tix khaing kaw an mai teei ti tik nawh khaing ceu pui nawh. 7 Mawh kheu nan, kieh tokaux pex singax mai mawh pa singax singeh, grawh grawng nawh Aux mawh Siyiex pa mawh Simiang Siyiex pex. 8 Pex tak priex ti hawt gumlox beenli Aux mai hawt ti yuh, Aux mawh Simiang Siyiex pex, pa kieh pex singax singeh. 9 Can pui pa jhax lawg ka keeing tix ang ah, miex tix ang ah, tak kieh nawh yum tete, Ref 20:9 Lih 21:17; Mat 15:4; Mak 7:10. mawh kheu jhax lawg nawh ka miex keeing tix, nham phimap nawh tak hoek piang nawh. 10 Pui pa lud vao ka moeng pui tang kaux mai pui pa lud vao mai moeng paox plawg tix, tak yum tete, Ref 20:10 Lih 20:14; Krub 18:20; Pi 5:18. khawm simex pa lud mai bun pa koe krax lud an, 11 pui mawx it tau mai moeng keeing tix, mawh pui plih tokaux kakaong pa kaig tua keeing tix, kiex khawm ra tak yum tete, nham phimap kiex tak hoek piang kiex.Ref 20:11 Krub 18:8; Pi 22:30; 27:20. 12 Phan pui tix kaux it mai mun tix, kiex khawm ra tak yum tete, mawh kheu jao hoik lud kiex khawm ra ka daux pa seeing brai, nham phimap kiex tak hoek piang kiex.Ref 20:12 Krub 18:15. 13 Phan simex it mai paox simex tix, awm it mai bun kiex khawm ra hoik yuh ceu pa seeing brai, kiex tak yum khawm ra nham phimap kiex tak hoek piang kiex.Ref 20:13 Krub 18:22. 14 Phan simex tix kaux teei ti moeng bun miex khawm kawn, an mawh pa caox caig, tak gleeing ti tik kix khawm loe ka ngu, son ang pa caox caig lai koe ka daux sinax pex.Ref 20:14 Krub 18:17; Pi 27:23. 15 Phan simex tix kaux lud vao ka totiag, nawh tak yum tete mai pex tak pah totiag an. 16 Phan bun tix kaux dex dawd mai totiag ceu pa tix ang ah mai lud vao mai totiag an maix tak pah bun khawm totiag an, kiex tak yum tete, nham phimap kiex tak hoek piang kiex.Ref 20:15-16 Lih 22:19; Krub 18:23; Pi 27:21. 17 Phan simex tix kaux teei ti moeng nan tix, pa mawh kawn bun keeing nawh ang ah, kawn bun miex nawh ang ah mai plih tokaux kakaong krax pa kaig tua nawh mai phan bun an yaox ka krax kaig tua simex, an mawh ceu pa kaig tua mai tak teei ti tik kiex khaing sivoe ngai ceu pui kix, kheu hoik pon nawh ti plih tokaux kakaong pa kaig tua nawh, kiex tak kham geu phimap tix.Ref 20:17 Krub 18:9; Pi 27:22. 18 Phan simex tix kaux hu it mai bun yam kawn koe nham mee nawh mai plih tokaux kakaong krax kaig tua nawh mai phan nawh hoik yaox krax lih nham nawh mai phan bun an ang kheem ka nham tix, kiex khawm ra tak mawh pa teei ti tik khaing ceu pui kix.Ref 20:18 Krub 18:19. 19 Pex tak ang pon ti plih tokaux kakaong pa kaig tua pux o miex tix mai nan keeing tix, grawh grawng nawh an mawh pa plih tokaux kakaong mai paox nyiex ma tix, kiex tak yaox ti kham geu phimap tix. 20 Phan simex tix kaux it tau mai moeng keeing iak tix, nawh hoik mawh pa plih tokaux kakaong pa kaig tua keeing iak tix, kiex tak kham geu phimap tix mai kiex tak mawh pa ang lai chix koe kawn.Ref 20:19-20 Krub 18:12-14. 21 Phan simex tix kaux teei ti moeng puxaik tix, an mawh pa seeing brai, nawh hoik plih tokaux kakaong pa kaig tua puxaik tix, kiex tak mawh pa ang lai chix koe kawn.Ref 20:21 Krub 18:16. 22 Mawh kheu nan, pex tak hawt gumlox beenli Aux mai lox tat jhawm prawng Aux khankix mai hawt ti yuh an kix son ang haktiex dee pa sang viex Aux pex ot, hao ti tik pex. 23 Pex tak ang pon ti hawt grawng lawng khaix grawng beenli pui an khankix, pa sang grheu Aux ti tik sivoe pex, grawh grawng nawh, kix hoik lud ka grawng ceu inkix khawmuik, mawh kheu nan, Aux koeng ka kix. 24 Viang mawh nan, Aux hoik ah nin ka pex, pex tak pon ti cie haktiex kix mai Aux tak sang tawx mawh sinngao sonsang pon pex ti cie haktiex dee lih rawm teeh mai rawm hia, Aux mawh Siyiex pa mawh Simiang Siyiex pex, pa hoik tang gwieh pex khaing pui tang ceu khankix. 25 Mawh kheu nan, pex tak tang gwieh tobrie pa singax mai totiag pa ang singax sidawng daux sinax pex, pex tak ang pon ti kieh tokaux tix seeing brai, ka totiag khankix mai sim sai mai can ceu pa im ju kuceu, pa chix mu chix hu piang tiex mai pa hoik tang gwieh Aux ti deuh khaing pex, awm ceu pa ang singax khankix. 26 Pex tak mawh pa singax singeh ka son Aux, mawh kheu Aux mawh Siyiex pa singax singeh mai Aux hoik tang gwieh pex khaing pui tang ceu, sonsang mawh pex cie Aux. 27 Simex ang ah, bun ang ah, pa mawh pui pa yuh phi pui pa chix simeed khankix tak yum tete, pui tak dheem kix yum ka simaox, nham phimap kix tak hoek piang kix heue.”