1 Simiang Siyiex ah nin ka Mose mai Arun, 2 “Krai ka ceu pui Isarelax khankix ah nin, yam koe jhawm saux lih rawm seeing khaing tokaux simex, jhawm saux lih rawm seeing an mawh pa ang singax. 3 In tak mawh pa yuh nawh ang singax, kheu jao jhawm saux lih rawm seeing an, phan rawm seeing kawn lih khaing tokaux nawh ang ah, phan hoik hit khaing tokaux nawh ang ah, an mawh krax pa ang nawh singax. 4 Dee it pa hoik it pui pa koe jhawm saux lih rawm seeing an kawx mawh pa ang singax mai khaix ngawm nawh khankix kawx tak mawh pa ang singax. 5 Can pui pa hu krox hu teeh ka kraung it nawh, tak yaox ti sidaux kraung tix mai heem rawm mai nawh tak mawh pa ang singax tom hoek plakbo. 6 Kaw pa ngawm ka dee hoik ngawm pui pa koe jhawm saux an, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. 7 Kaw pa hu krox hu teeh ka tokaux kaw pa koe jhawm saux an, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. 8 Phan pui pa koe jhawm saux an hu baik ka pui pa singax, pui an tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. 9 An bruk kaw pa koe jhawm saux an kawx, tak mawh pa ang singax. 10 Can pui pa hu krox hu teeh, ka kraung pa koe greem nawh tak mawh pa ang singax tom hoek plakbo, pui pa viex kraung ceu an hu, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. 11 Phan pui pa koe jhawm saux an, hu krox hu teeh ka pui tix kaux kaux, yam ang nawh nyang khoek taix tix ka daux rawm, pui an tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. 12 Kraung aw tiex pa hoik krox hoik teeh kaw pa koe jhawm saux an, tak pah max mai tawg khaox, tak phak ka rawm. 13 Yam hoik moi kaw pa koe jhawm saux an khaing jhawm saux lih rawm seeing, nawh tak simin tix yaox tom hoek aliah singaix son krax pa singax nawh mai nawh tak sidaux kraung ceep tix mai heem rawm, pa lih hu, khaix an nawh tak mawh pa singax. 14 Yam hoik hoek daix singaix, nawh tak teei sikaux ra mu ang ah, kawn keukie ra mu ang ah mai viex hoek sivoe Simiang Siyiex, hawt daux diang siviex nyiex gox bwan man bang kum pui hun mai tawx an ka cao giex kaing li, 15 cao giex kaing li tak tan an son krax tan pa pluat ploi phimap tix mu mai tan an tix mu son krax tan pa gleeing mai cao giex kaing li tak yuh krax khyox khaw mai krax pa pluat ploi son nawh, sivoe Simiang Siyiex jao jhawm saux lih rawm seeing khaing nawh. 16 Phan simex lih rawm ngang, kieh nawh heem rawm mai nawh tak mawh pa ang singax tom hoek plakbo. 17 Kraung ceep mai kraung hak pa hoik kawm ka rawm ngang, tak mawh pa sidaux tix ka rawm mai an tak mawh pa ang singax tom hoek plakbo. 18 Yam it simex tau mai bun, phan rawm ngang nawh hoik pon ti lih, kiex khawm ra tak heem rawm, kiex mawh pa ang singax tom hoek plakbo. 19 Phan bun hoik hoek bawg yam lih nham mee tix, bun an tak mawh pa ang singax aliah ngaix mai can pui pa hu krox hu teeh ka bun an, tak mawh pa ang singax tom hoek plakbo. 20 Can kraung it nawh glang lih nham mee nawh, tak mawh pa ang singax, can ceu pa ngawm nawh piang khankix kawx tak mawh pa ang singax. 21 Pui mawx ang ah pa hu krox hu teeh ka kraung it nawh, tak yaox ti sidaux kraung ceep tix mai heem rawm mai nawh tak mawh pa ang singax tom hoek plakbo. 22 Pui mawx ang ah pa hu krox hu teeh ka kraung pa hoik ngawm nawh piang kawx, tak yaox ti si daux kraung ceep tix mai heem rawm mai nawh tak mawh pa ang singax tom hoek plakbo. 23 Yam hu krox hu teeh pui ka kraung pa koe ka dee it nawh ang ah, ka dee ngawm nawh ang ah, pui an tak mawh pa ang singax tom hoek plakbo. 24 Phan simex it tau mai bun yam ang mee seeing bun an nyang singax, pui an tak mawh pa ang singax aliah singaix mai can kraung pa hoik it nawh ka kawx tak mawh pa ang singax. 25 Phan bun tix kaux lih jhawm saux rawm seeing tom rheung khaing bawg yam yie hoek nham pa ang singax nawh awm ku bawg mai phan hoik luan khaing bawg yam yie lih nham pa ang singax nawh ang ah, glang singaix kawn hoek nham jhawm saux rawm seeing an, tak deuh nawh awm singaix hoek nham bawg yam pa ang singax nawh, nawh tak mawh pa ang singax. 26 Dee it dee tum nawh khawmuik glang singaix lih jhawm saux rawm seeing nawh, tak mawh dee it dee tum pa ang singax mai can ceu pa ngawm nawh kawx tak mawh pa ang singax awm ang nawh singax. 27 Can pui pa hu krox hu teeh ka ceu an tak mawh pa ang singax, nawh tak yaox ti sidaux kraung ceep tix mai heem rawm mai nawh mawh pa ang singax tom hoek plakbo. 28 Phan bun an hoik singax khaing jhawm saux lih rawm seeing an, nawh tak simin tom hoek aliah singaix, khaix an nawh tak mawh pa singax. 29 Yam hoek daix singaix, nawh tak teei sikaux ra mu ang ah, kawn keukie ra mu ang ah mai viex an hoek ka cao giex kaing li hawt daux diang siviex nyiex gox bwan man bang kum pui hun. 30 Khaix an cao giex kaing li tak tan an tix mu son krax tan pa pluat ploi phimap mai an tix mu son krax tan pa gleeing mai cao giex kaing li tak yuh krax khyox khaw mai krax pa pluat ploi son bun an sivoe Simiang Siyiex, son jhawm saux lih rawm seeing pa ang singax khaing nawh. 31 Mawh kheu nan maix tak tang gwieh ceu pui Isarelax khankix khaing pa ang singax kix, phan ang mawh nan Aux lhat kix yum ka daux pa ang kix singax, yam kieh kix nyiex gox bwan man Aux seeing pa mawh ceu pa koe ka daux sinax kix.” 32 In mawh grawng beenli son pui pa koe jhawm saux lih rawm seeing mai rawm ngang, nawh tak mawh pa ang singax, 33 son bun pa hoik pon jhawm saux lih rawm seeing mai hoek bawg yam mee pa ang nawh singax, pa mawh simex ang ah, bun ang ah mai son pui pa hoik it tau mai bun pa ang singax heue.