8
1 Khaix an ang awt rheung Nawh Cao hu lai ling ti sidiex gau, ka daux yaong daux veng khankix mai viex lox gaux rhawm pa dex dawd mai Meung Siyiex mai kawncau Nawh kao ra kaux.
2 Bun tix blah kawx ot tau mai Nawh, pa hoik kieh Nawh Cao phicaox lih mai hoik cox jhawm saux kix moi heue. Marix pa kok mawh Magadalax, pa hoik kieh Nawh Cao phicaox lih khaing aliah kaux,
3 Yoanax moeng Khunzax, pa mawh kawncau Herut mai Susannax mai tang kaux tom nie teei kraung cie kix mai khan kheu ka Nawh Cao mai pui pa hu tau mai Nawh heue.
(Mat 13:1-9; Mak 4:1-9)
4 Yam an cub pui hun khrawm paox tix kaoh khaing ku veng, hoek ka Nawh Cao mai Nawh sidiex gau kix ka lox tiag ah nin,
5 “Pui rhuat simie hu ti rhuat simie cie tix heue. Yam rhuat nawh simie tix blah cod ka dex krax mai pui dig ka caong tix, sim raoma khankix sut ti ih simie an heue.
6 Simie tix blah cod ka piang simaox mai yam kuah, mawh kheu ang phon tiex koe tom fit kroh hu heue.
7 Simie tix blah cod ka sinax pang kat mai pang kat an ting tau mai kix, tom kheem gut kix.
8 Simie tix blah cod ka dee mhawm tiex mai ting tom plix plix tix yieh son heue.” Yam krai Nawh Cao grawng ceu in khankix, Nawh kok yo ah nin, “Kaw pa koe yhaok ti mhong kieh nawh mhong heue.”
(Mat 13:10-17; Mak 4:10-12)
9 Kawncau Nawh khankix chawk Nawh Cao ka grawng dee bleeh lox tiag in heue.
10 Nawh Cao baox ah nin, “Hoik tawx kieh pex tawng grawng pa raux pa mox pa dex dawd mai Meung Siyiex, viang mawh nan, pa kawn deuk khankix tak krai ka lox tiag ka kix, yuh ka mawx kix yaox kawx ang chix yaox mai kix mhong kawx ang chix tawng heue.
(Mat 13:18-23; Mak 4:13-20)
11 Dee bleeh lox tiag an mawh nin, simie an mawh gumlox Siyiex heue.
12 Kix pa cod dex krax, mawh kix pa hoik mhong mai khaix an phicaox hoek mai teei lox bwan khaing daux rhawm kix, yuh ka mawx son ang kix sang yum rhawm mai son ang hoek krax taoh heue.
13 Kix pa cod ka piang simaox, mawh kix pa hoik mhong mai gaux rhawm rieb ti teei lox bwan mai kix ang koe riah, yum rhawm ngie tivud khaing, yam hoek bawg yam pa nyaw glaw, kix deeh laux leeing heue.
14 Pa cod sinax pang kat khankix, mawh kix pa hoik mhong mai yam hu kix krax, pa khi rhawm mai sinngao mai ceu pa gaux rhawm pa dex dawd mai ju in, kheem gut kix, tom ang chix mhawm plix heue.
15 Pa koe ka dee mhawm tiex, mawh kix pa rah pa mhawm rhawm pa hoik mhong lox bwan, mawh kix pa giex tom sied mai chix gun rhawm tix plix plix heue.
(Mak 4:21-35)
16 “Pui mawx ang ah, yam hoik tok nawh kawk ngu, ang sax tawb ka aw, lheu khaing an ang sax sau greem ku, deuh ka piang dee deuh kawk ngu, sonsang yaox kix pa laig tan pa riang nawh heue.
17 Mawh kheu pa hoik mox ang koe tix ceu kawx, pa tak ang kieh sidawng, Lheu khaing an ang koe tix ceu kawx pa hoik glip, pa tak ang tawng, ang koe heue.
18 Mawh kheu nan, mhong pex yuh ka mawx rien rhawm tix kah, kheu kaw pa hoik koe, tak baox tawx ka nawh heue, kaw pa ang koe, viang pa hoik koe cie nawh kawx, tak sang teei khaing nawh heue.”
(Mat 12:46-50; Mak 3:31-35)
19 Miex Nawh Cao mai pux Nawh khankix hoek ka Nawh, viang mawh nan kix ang pon hoek dee ot Nawh Cao, kheu kied sikhox cub pui hun heue.
20 Pui krai ka Nawh Cao ah nin, “Miex Maix mai pux Maix khankix cung plak praix, simie ti yaox Maix heue.”
21 Nawh Cao pawk lox mai ah nin ka kix, “Miex Aux mai pux Aux khankix, mawh inkix, pa mhong gumlox Siyiex mai hawt ti yuh heue.”
(Mat 8:23-27; Mak 4:35-41)
22 Ka daux ngaix an khankix tix singaix Nawh Cao laig ka daux reu, tau mai kawncau Nawh khankix mai Nawh Cao ah nin ka kix, “Ex hu plak toi rawm nhawng heue.” Kix vai reu hu heue.
23 Yam kawn hu kix Nawh Cao laig it mai bhaung ting lih ti phlu ka piang nhawng mai rawm jah ti naog ka daux reu mai kix dex sang hoek krax laux leeing heue.
24 Kix hoek ka Nawh Cao so Nawh kieh siduad ah nin, “Simiang eue, Simiang eue, ex dex sang laux heue.” Nawh Cao kaoh mai ah ka bhaung mai pukpak rawm mai kix yiien yawg tix heue.
25 Nawh Cao chawk ah nin ka kix, “Krax yum rhawm pex koe dee mawx?” Viang mawh nan kix lhat mai daox kah, kix tom ah nin ka paox tix, tix kaux lai tix kaux, “Kaw in mawh mawx, Nawh tawx lox ka bhaung mai rawm khankix kawx, kix nghiet ka lox Nawh heue.”
(Mat 8:28-34; Mak 5:1-20)
26 Kix hoek ka meung Gadarax, pa koe praok sidieb rawm nhawng meung Galilie.
27 Yam hoik lih hu Nawh Cao ka piang caong raog, pui tix kaux pa hoik lih khaing daux veng hoek ti rieb Nawh, kaw an mawh pa laig phicaox mai ang ceep kraung tom rheung, ang ot daux nyiex, nawh ot ka daux simeeig khankix heue.
28 Yam yaox nawh Yesux, nawh krub sivoe Nawh Cao mai nawh riag kok yo lox tix sinum ah nin, “Yesux, Kawn Siyiex pa ting lhaong khaing khawmuik eue, aux koe pa yuh mai Maix ceu patix? Aux khyox khaw ka Maix paw vi tuktieak tukte ka aux liak”
29 Kheu Nawh Cao hoik nhie phi pa seeing brai an lih khaing pui an heue. Kheu phi an hoik giex nawh tom nie bawg mai hoik kieh pui pau nawh phyawk nawh ka ceng mai hoik sau gang ka nawh heue. Viang mawh nan nawh pon rud maox ceng khankix dud mai phicaox an grheu nawh hu ot ka daux tiagtu heue.
30 Nawh Cao chawk nawh ah nin, “Ceu kaux maix kaux patix? Nawh deeh ah nin, “Mawh Liecong heue.” Mawh kheu hoik laig phicaox ka nawh tom nie, nawh tom ah nan.
31 Kix khyox khaw ka Nawh Cao, yuh ka mawx son ang Nawh sang nhie kix lih hu laig ka dee kied raux heue.
32 Ka dee an koe cub lig pa kied hun sawm ka gawng tan heue. Kix khyox khaw ka Nawh Cao, sonsang laig kix daux lig mai Yesux tawx akhuang ka kix heue.
33 Phicaox khankix lih khaing daux pui an mai laig ka daux lig khankix, cub lig an, to lih ka dee nie rieh nie jun jee, laig ka daux nhawng mai nok ka rawm yum heue.
34 Yam yaox pui liang lig khankix ka ceu pa hoik mawh an, kix to hu mai krai grawng an ka daux yaong daux veng khankix heue.
35 Pui khankix hu ti jhak grawng pa hoik mawh an mai yam hoek kix ka Yesux mai yaox kaw pa hoik lih phicaox khaing, ngawm liep caong Yesux tan, hoik deeh mhawm mai ceep kraung, kix lhat kah heue.
36 Kix pa hoik yaox, krai pui khankix mhong grawng pa cox ka kaw pa laig phicaox an mhawm yuh ka mawx.
37 Pui meung Gadarax khawmuik mai pui pa ot sivie tan, khyox khaw ka Nawh Cao nhie Nawh lih hu khaing kix, mawh kheu kix kied lhat graung kah Nawh Cao deeh laig ka daux reu mai deeh ing heue.
38 Pui pa hoik laig phicaox glang ka an, rawg ti ot tau mai Nawh Cao, viang mawh nan Nawh Cao ah nin,
39 “Ing ka nyiex maix mai krai kix mhong grawng ceu pa ting lhaong pa caux rhawm Siyiex mai yuh bwanson, son maix heue.” Kaw an lih hu mai krai grawng ceu pa ting lhaong pa hoik yuh Yesux son nawh, ka daux veng an khawmuik heue.
(Mat 9:18-26; Mak 5:22-43)
40 Yam deeh ing Yesux, cub pui hun khankix rieb Nawh Cao, kheu kix khawmuik krox jun ka Nawh heue.
41 Jhak heue, pui tix kaux pa kaux Ya i rux, pa mawh pui giex kaing nyiex sidiex tix kaux, hoek mai krub dex caong Yesux mai khyox khaw nhie Nawh Cao hoek ka nyiex tix heue.
42 Mawh kheu kawn bun nawh pa koe ngie tix kaux khaing, pa dex koe ju kao ra num, it mai dex sang yum heue. Yam hu Nawh Cao cub pui hun khankix nyheen ka Nawh heue.
43 Bun tix kaux pa hoik koe jhawm saux pa lih nham kao ra num, pa hoik uik cai can pa koe nawh khawmuik, ka pui chix sidah khankix, viang mawh nan, ang vai ceeix kawx,
44 hoek plak khaix Nawh mai teeh caong kraung ceep Nawh mai jhawm saux pa lih nham nawh, hit dom mawx dom an heue.
45 Yesux ah nin, “Mawx pa teeh ka Aux?” Yam thiang pui grawng an khawmuik, Petrux mai kix pa ot tau mai Nawh khankix, ah nin, “Simiang eue, cub pui hun khankix nyheen ka Maix, tom uik tip, Maix lai kawn chawk mawx pa teeh ka Aux lie?”
46 Yesux baox ah nin, “Pui hoik teeh ka Aux tix kaux kaux, Aux tawng kheu hoik lih sibrawm khaing Aux heue.”
47 Yam tawng bun an grawng ang nawh pon ti mox tix, nawh siyaung mai hoek ti krub sivoe Nawh Cao, sivoe pui khawmuik, nawh krai mawh kheu grawng patix, nawh hoik teeh ka Nawh Cao mai grawng hoik moi tix dom mawx dom an heue.
48 Nawh Cao ah nin ka nawh, “Kawn bun Aux eue, krax yum rhawm maix hoik kieh maix moi, hu mhawm mhawm awx.”
49 Yam kawn sikah Nawh Cao, pui tix kaux hoek khaing nyiex pui giex kaing nyiex sidiex ah nin, “Kawn bun maix hoik yum heue. Paw baox laklheut ka Sara Cao Gau heue.”
50 Viang mawh nan, yam mhong Yesux lox an, Nawh Cao ah nin, “Paw vi lhat yum rhawm khaing heue. Nawh tak sang deeh mhawm.”
51 Yam hoek Nawh Cao ka nyiex an, Nawh ang kieh pui tix kaux kawx laig tau mai tix, lheu khaing Petrux, Yohan, Yakop mai miex keeing nyawm bun an khaing heue.
52 Pui khawmuik yiiem riag yo, son nyawm bun an, viang mawh nan, Nawh Cao ah nin ka kix, “Paw yiiem, mawh kheu bun in ang yum, mawh ngie laig it nawh khaing.”
53 Kix nieb yuh pa ang nab yam nyiah ka Nawh Cao, kheu tawng kix bun an hoik yum heue.
54 Viang mawh nan Nawh Cao teei taix kawn bun an mai kok ah nin, “Kawn nyawm bun eue, kaoh heue.”
55 Khuan nawh deeh hoek mai kawn bun an kaoh dom mawx dom an. Nawh Cao nhie kix tawx pa ih tix ceu ceu ka nawh heue.
56 Miex keeing nawh kied daox deng kah heue. Nawh Cao tawm kiex, son ang sang krai grawng pa hoik yuh an, ka pui tix kaux kawx heue.