22
(Mat 26:2-5; Mak 14:1-2, Yo 11:45-53)
1 Yam an dex hoek pawie blah pa ang sau susaix, pa kok mawh Pasakha.
2 Cao giex kaing li pa ting mai cao tiiem lai khankix, sawg grawng ceu pa sang pon kix ti teei Nawh Cao yum, mawh kheu kix lhat ka pui khankix heue.
(Mat 26:14-16; Mak 14:10-11)
3 Satan laig ka daux Yudax pa kok mawh Isakariut, pa mawh daux kao ra kaux tix kaux an heue.
4 Nawh lih hu kum kawng mai cao giex kaing li pa ting khankix mai cao giex kaing nyiex bwan khankix, grawng sang pon nawh ti tawx Nawh Cao ka kix yuh ka mawx.
5 Kix gaux rhawm, ah lox dud grawng sang tawx kix mau ka nawh heue.
6 Nawh cu lox an mai sawg bawg yam sonsang pon ti tawx Nawh Cao ka kix, yam ang cub pui hun ot heue.
(Mat 26:17-25; Mak 14:12-21; Yo 13:21-30)
7 Singaix pawie blah ang sau susaix, pa mawh yam tak pah kix ti tan yung Pasakha hoek heue.
8 Nawh Cao ploi Petrux mai Yohan, ah nin, “Hu cox khre Pasakha son ex, sonsang ih ex heue.”
9 Kiex chawk ka Nawh Cao, “Maix simie yiex cox khre dee mawx?”
10 Nawh Cao deeh ah nin ka kiex, yam laig pax ka daux veng, pui pa viex aw rawm tix kaux tak sipub pax heue. Hawt khaix nawh mai laig ka daux nyiex dee hu nawh,
11 mai ah nin ka cao nyiex an, Sara Cao Gau chawk ah nin ka maix, lawg son nyo maix, dee tak sang ih Aux Pasakha tau mai kawncau Aux khankix, koe dee mawx?
12 Nawh tak jhi pax yaox lawg pa ting plak piang, pa hoik koe kraung khre dee an heue.”
13 Kiex hu mai yaox awm pa hoik krai Nawh Cao ka kiex, kiex cox khre pawie Pasakha heue.
(Mat 26:26-30; Mak 14:22-26; 1.Kaw 11:23-25)
14 Yam hoik hoek bawg yam nari, Nawh Cao ngawm tau mai kawncau pa ting Nawh kao ra kaux.
15 Nawh Cao ah nin ka kix, “Aux koe rhawm mai simie ti ih pawie Pasakha in, tau mai pex ka sivoe ang Aux nyang bax kham geu heue.
16 Grawh grawng nawh, Aux krai ka pex, Aux tak ang baox ih Pasakha, tom sidah hoik grum naog daux Meung Siyiex heue.”
17 Nawh Cao rieb ti teei kawk, khaix hoik yaogyaw Nawh bwanson, Nawh ah nin, “Teei in, gwieh ka paox tix heue.
18 Grawh grawng nawh, Aux krai ka pex, Aux tak ang lai baox nyaux rawm plix siiet, tom sidah ang meung Siyiex nyang bax hoek heue.”
19 Nawh Cao teei khaomun, khaix hoik yaogyaw Nawh bwanson, Nawh sivit ti tawx ka kix ah nin, “In mawh tokaux Aux pa hoik tawx son pex heue. Yuh ceu in sonsang doh keud ka Aux heue.”
20 Awm an, khaix hoik ih priex bo, Nawh teei kawk ah nin “Kawk in mawh sijax mukheu pa khraox, ka daux nham Aux, pa mawh pa lih son pex heue.
21 Viang mawh nan, taix kaw pa sang tik sang tawx Aux, koe tau mai Aux, piang pheen in heue.
22 Grawh grawng nawh, Kawn kawn pui tak sang hu awm pa hoik dud ah tete, viang mawh nan, pui pa tik pa tawx Nawh, tak kha rhawm heue.”
23 Kix jah ti chawk ka paox tix, pui mawx pa sang yuh ceu in ka daux ex lie.
24 Lheu khaing an kix thung thiang paox tix ka daux kix pui mawx nie ting khaing paox tix.
25 Nawh Cao ah nin ka kix, “Simiang pui tang ceu khankix giex kaing kix, mai pa ting piang kix, kok mawh cao pa teem khankix heue.
26 Viang mawh nan, ka daux pex tak ang mawh nan, kaw pa ting khaing paox tix ka daux pex, kieh nawh mawh awm pui awn ju heue. Cao kaing kawx, kieh awm pui cau heue.
27 Grawh grawng nawh, kaw pa yuh ka mawx nie lheu ting, mawh kaw pa ngawm ti sawm lie, phan ang mawh nan mawh kaw pa khan kheu lie? Kaw pa ngawm ti sawm lheu ting ang mawh lie? Viang mawh nan, Aux ot sinax pex awm kaw pa khan kheu heue.
28 Pex mawh kix pa hoik ot tau mai Aux, ka daux ceu pa nyaw glaw pa kham Aux heue.
29 Aux tawx meung tix meung ka pex, awm Keeing Aux tawx ka Aux,
30 yuh ka mawx son pex tak pon ti ih nyaux ka pheen Aux, ka daux meung Aux mai kieh pex ngawm piang dang ngeung prawng kwang piang pui Isarelax kao ra ceu heue.
(Mat 26:31-35; Mak 14:17-31; Yo 13:36-38)
31 “Simon eue, Simon, jhak heue, satan hoik mhaing maix, sonsang pon nawh ti grheung maix, awm grheung nghox ca heue.
32 Viang mawh nan Aux hoik rawg bwan, son maix, son ang krax yum rhawm maix sang laux heue. Yam deeh tieh maix ti hoek maix tak kieh puxaik maix khankix kaux cong heue.”
33 Simon deeh ah nin ka Nawh Cao, “Simiang eue, aux hoik pon ti hu mai Maix, daux thawng mai khawm dee yum heue.”
34 Nawh Cao baox ah nin, “Aux krai ka maix Petrux eue, ka daux singaix, ka ang ia nyang ux, maix tak thiang ti tik vud Aux loe bawg heue.”
35 Nawh Cao baox ah nin ka kix, “Yam ploi Aux pex hu, yam ang pex viex hau mau mai bau mai kiep, pex koe dee lo tix ceu ceu lie?” Kix deeh ah nin, “Ang lo tidtix heue.”
36 Nawh Cao baox ah nin ka kix, “Viang mawh nan, yam in, kaw pa koe hau mau, kieh nawh viex hu mai kaw pa koe bau kieh nawh viex hu heue. Kaw pa ang koe vaid, kieh nawh coh kraung ceep tix mai liag heue.
37 Grawh grawng nawh, Aux krai ka pex, ceu pa hoik tiiem ti deuh tak lai naog ka daux Aux heue. Pa mawh, pa hoik simin Nawh tau mai pui pa lud khankix, mawh kheu grawng ceu pa dex dawd mai Aux tak hoik sidah heue.”
38 Kix baox ah nin, “Simiang eue, jhak heue, ex hoik koe, vaig ra kre tin heue.” Nawh Cao baox ah nin ka kix, “Hoik kub heue.”
(Mat 26:36-46; Mak 14:32-42)
39 Nawh Cao lih hu, awm hoik sax koe been Nawh, ka dee gawng Sanlun mai kawncau Nawh khankix kawx hawt khaix Nawh Cao heue.
40 Yam hoek Nawh Cao dee an, Nawh ah nin ka kix, “Rawg bwan heue, yuh ka mawx, son ang pex sang laig ka daux pa nyaw glaw”
41 Nawh Cao gwieh ti hu khaing kix, tom dee hoek nyak tix taix simaox, Nawh grux ngawng Tix rawg bwan,
42 ah nin, “Keeing eue, phan Maix koe rhawm, teei kawk in khaing Aux liak, viang mawh nan paw kieh mawh alo pa khaw caw mai Aux, kieh mawh alo pa khaw caw Maix heue.”
43 Kawncau Siyiex tix kaux lih hoek mai baox thien riang rao ka Nawh heue.
44 Nawh Cao kha rhawm kied sigrien sigre mai baox nied ti rawg bwan mai rawm lah Nawh lih mawh awm jah nham mai cod piang tiex heue.
45 Yam hoik kaoh Nawh Cao khaing rawg bwan, Nawh hoek ka kawncau Nawh khankix mai yaox laig it kix, kheu krax khi rhawm heue.
46 Nawh Cao ah nin ka kix, “Pex laig it yuh ka mawx? Kaoh mai rawg bwan, son ang pex sang laig ka daux pa nyaw glaw heue.”
(Mat 26:47-56; Mak 14:43-50; Yo 18:2-11)
47 Yam kawn sikah Nawh Cao, pui hun mai kaw pa kok mawh Yudax, pa mawh tix kaux ka daux kix kao ra kaux, thong kix hoek mai nawh hoek dex ka Yesux mai ngheet Nawh heue.
48 Yesux chawk nawh ah nin, “Yudax eue, maix tik maix tawx Kawn kawn pui ka pa ngheut lie?”
49 Yam an kawncau Nawh khankix, ot sivie Nawh Cao, yaox grawng pa tak sang mawh, kix chawk ah nin, “Simiang eue, ex tak sivoeg ka vaid lie?”
50 Ka daux kix tix kaux kid ka yhaok siliex cao giex kaing li pa ting dud khawn dawm nawh heue.
51 Yesux ah nin, “Naox heue.” Nawh Cao teei ka yhaok kaw an mai kieh nawh moi heue.
52 Yesux ah nin ka cao giex kaing li pa ting khankix mai ka cao giex kaing nyiex bwan khankix mai ka kuad song khankix pa hoek ti teei Nawh Cao, “Pex viex vaig viex khaox, hoek ti giex ka Aux, awm giex pui tud rhim lie?
53 Yam ot Aux tan mai pex ka daux nyiex bwan ku ngaix, pex ang nyeu taix tix, ti giex Aux, viang mawh nan in mawh bawg yam nari pex mai sibrawm pa faik heue.”
(Mat 26:57-58, 69-75; Mak 14:53-54, 66-72 Yohan 18:12-18, 25-27)
54 Kix giex Nawh Cao mai tuk Nawh mai viex Nawh hu ka nyiex cao giex kaing li pa ting piang khawmuik heue. Petrux hawt hu dee singai heue.
55 Yam hoik phlu kix ngu ka sinax brawk nyiex mai hoik ngawm tau, Petrux kawx, ngawm ka sinax kix heue.
56 Bun pa mawh siliex tix kaux, yaox nawh ngawm ka daux pa riang ngu mai jawg ti jhak nawh, ah nin, “Pui in kawx, ot tau mai Nawh heue.”
57 Viang mawh nan, nawh thiang ti ah nin, “Bun eue, Aux ang tawng Nawh.”
58 Khaix an tivud tang kaux tix kaux, yaox nawh ah nin, “Maix kawx, mawh ka daux kix tix kaux heue.” Viang mawh nan Petrux deeh ah nin, “Pui eue, aux ang mawh.”
59 Khaix an dex rheung tix nari, tang kaux tix kaux, krai awm pa hoik tawng nawh ah nin, “Kaw in kawx mawh pa hoik ot tau mai Nawh tete, kheu mawh nawh pui meung Galilie heue.”
60 Viang mawh nan Petrux deeh ah nin, “Pui eue, aux ang tawng pa ah maix” Yam kawn tak sikah nawh, ia ux dom mawx dom an heue.
61 Simiang veeh mai jhak ka piang Petrux. Petrux doh keud ka gumlox Simiang, pa hoik krai Nawh Cao ka nawh, ah nin, “Ka daux singaix ka ang ia nyang ux, maix tak thiang ti tik vut Aux loe bawg heue.”
62 Nawh lih hu mai yiiem heue.
(Mat 26:67-68, Mak 14:65)
63 Pui pa giex ka Nawh Cao khankix, yuh pa ang cee ang cag ka Nawh mai tap Nawh heue.
64 Kix lhop vien ka ngai Nawh Cao mai chawk Nawh ah nin, “Krai lox jhai ka ex liak, mawh pui mawx pa tap Maix?”
65 Kix ah lox tang ceu tom nie ka Nawh Cao, sonsang yuh ceu pa ang cee ang cak ka Nawh heue.
(Mat 26:63-66, Mak 14:55-64, Yo 18:19-24)
66 Yam hoik riang praix, kix pa mawh kuad song pui khankix, khrawm paox tix, khawm cao giex kaing li pa ting khankix mai khawm pui tiiem lai khankix mai kix tuk Nawh Cao hu, ka dee khrawm ti prawng see cie kix ah nin,
67 “Phan Maix mawh Khrit krai ka ex,” viang mawh nan Nawh Cao ah nin ka kix, “Phan Aux krai ka pex, pex tak ang yum rhawm kah,
68 phan Aux chawk ka pex, pex tak ang deeh pawk heue.
69 Viang mawh nan jah tom yam in, Kawn kawn pui tak sang ngawm, plak taix khawn dawm, sibrawm Siyiex heue.”
70 Kix khawmuik ah nin, “Phan mawh nan mawh Maix Kawn Siyiex lie?” Nawh Cao ah nin ka kix, “Mawh awm pa ah pex heue.”
71 Kix baox ah nin, “Ex kawn baox lo mhai rug yuh ka mawx? Kheu tokaux ex hoik mhong lox khaing jheeh Nawh heue.”