20
(Mat 21:23-27; Mak 11:27-33)
1 Ka daux ngaix an tix ngaix, yam gau Nawh Cao ka pui khankix, ka daux nyiex bwan mai sidiex gau lox bwan gaux rhawm, cao giex kaing li pa ting khankix mai pui tiiem lai khankix, hoek tau mai kuad song khankix ka Nawh Cao,
2 mai chawk ah nin ka Nawh Cao, “Krai ex mhong liak, Maix pon akhuang sibrawm ti yuh ceu in khankix dee mawx? Pui mawx pa tawx akhuang sibrawm in ka Maix.”
3 Nawh Cao pawk lox ah nin ka kix, “Aux kawx, tak sang chawk pex ka grawng tix ceu heue. Deeh krai ka Aux ha.
4 Krax cubcom Yohan, kaoh khaing raoma lie? Phan ang mawh nan kaoh khaing kawn pui lie?”
5 Kix keud tau ah nin, “Phan ex ah kaoh khaing raoma, Nawh Cao tak chawk ah nin, phan mawh nan yuh patix, pex ang yum rhawm ka Mose lie?
6 Phan ex ah, kaoh khaing kawn pui, pui khawmuik tak sang dheem ex ka simaox heue. Kheu kix hoik yum rhawm grawng mawh Yohan cao jhai heue.”
7 Kix tom pawk lox ah, ang kix tawng grawng kaoh khaing dee mawx heue.
8 Yesux baox ah nin ka kix, “Aux kawx ang krai ka pex, grawng pon Aux akhuang sibrawm ti yuh ceu in khankix khaing dee mawx heue.”
(Mat 21:33-46; Mak 1:21-12)
9 Nawh Cao baox jah ti sidiex lox tiag in, ka pui khankix ah nin, “Pui tix kaux nawh sum sipeem plix siiet tix dah mai tawx pui pa yuh sipeem plix siiet vai mai hu tang praix klawng tom rheung nyao heue.
10 Yam hoek bawg yam, nawh ploi kawncau tix, tix kaux hu ka pui yuh sipeem an khankix, sonsang tawx kix, plix sipeem plix siiet an ka nawh. Viang mawh nan pui pa yuh sipeem an, tap nawh mai ploi nawh ing gieg, taix yi heue.
11 Nawh baox deeh ploi kawncau tix, tix kaux ka nawh kawx, kix tap mai yuh pa ang khaw ang jiet ka nawh mai ploi nawh ing giex, taix yi heue.
12 Nawh baox ploi kawncau loe kaux tix kaux, ka nawh kawx, kix yuh nawh ngud mai nyhot grheu nawh lih heue.
13 Simiang sipeem plix siiet an ah nin, Aux tak sang yuh ka mawx? Aux tak ploi kawn simex aux pa moh tix hu ka heue. Kix tee sang yungyi ka nawh pleue.
14 Viang mawh nan, yam yaox pui yuh sipeem khankix ka nawh, kix keud ti ah nin ka paox tix, tix kaux lai tix kaux, “Kaw in mawh cao sin, ex teei nawh yum, yuh ka mawx sin an tak mawh cie ex heue.
15 Kix taing vud nawh khaing sipeem plix siiet an mai teei nawh yum heue. Mawh kheu nan simiang sipeem plix siiet an, tak sang yuh ka mawx ka kix?
16 Nawh tak hoek ti yieh yuh laux, pui yuh sipeem an khankix mai tawx sipeem plix siiet an ka pui tang kaux heue.” Yam mhong pui khankix ka lox an, kix ah nin, “Paw doh kieh mawh nan.”
17 Viang mawh nan, Nawh Cao jhak ka piang kix ah nin, “Phan mawh nan lox pa hoik tiiem ti deuh ah nin, Simaox pa hoik tik pui yuh nyiex, hoik yuh kieh mawh kaing ka daog, mawh pa yuh ka mawx?
18 Pui pa rau ka piang simaox in ku kaux tak max mai simaox in rau ka piang pui mawx ang ah tak kieh nawh prung prang awm phawng tiex heue.”
(Mat 22:15-22; Mak 12:13-17)
19 Pui tiiem lai khankix mai cao giex kaing li pa ting khankix sawg ti giex Nawh Cao ka daux nari dom an heue. Kix lhat ka pui khankix, kheu tawng kix Nawh Cao hoik krai lox tiag in ka grawng kix heue.
20 Kix jhak Nawh Cao mai ploi pui jiang, pa yuh tokaux tix awm pui rahsee, yuh ka mawx sonsang pon giex kix Nawh dee lud lox sikah Nawh, sonsang pon ti tawx Nawh ka daux tawm taix simiang giex kaing haktiex heue.
21 Kix chawk Nawh Cao ah nin, “Sara Cao Gau eue, ex tawng pa sidiex pa krai Maix, mawh pa rahsee mai grawng ang Maix jhak ka pakngai pui tix kaux kawx maix sidiex gau grawng krax Siyiex tete heue.
22 Ex khaw ti tawx mau koh ka simiang Kesa lie? Ang khaw ti tawx lie?”
23 Viang mawh nan Nawh Cao tawng grawng pa lhak lhiiem pa pie kix mai ah nin ka kix,
24 “Jhi Aux yaox mau denari tix plah heue. Mau in koe riang mai lai pui mawx?” Kix deeh ah nin, “Mawh riang mai lai simiang Kesa heue.”
25 Nawh Cao ah nin ka kix, “Ceu pa mawh cie Kesa, tawx ka simiang Kesa heue. Ceu pa mawh cie Siyiex tawx ka siyiex heue.”
26 Kix ang pon ti giex dee lud lox Nawh Cao, ka sivoe pui khankix mai kix daox deng ka lox pawk Nawh mai kix yawg tix ang nye heue.
(Mat 22:23-33; Mak 12:18-27)
27 Sadukie tix blah hoek ka Nawh Cao, pa ah ang koe pa deeh kaoh im heue. Kix chawk Nawh,
28 ah nin, “Sara Cao Gau eue, Mose tiiem ti deuh ka ex ah nin, phan puxke pui tix kaux yum, pa koe moeng mai pa ang koe kawn, pux nawh tak sang teei moeng nawh mai eei kawn praix doeh ru son puxke nawh heue.
29 Koe puxaik aliah kaux. Kaw phao ka teei ti koe moeng, nawh ang koe kawn praix mai yum heue.
30 Ra kaux tix kaux,
31 loe kaux tix kaux tom hoek aliah kaux tix kaux kawx, teei bun an, ang koe ti prah kawn praix mai yum heue.
32 Khaix an bun an kawx yum heue.
33 Yam hoek bawg yam deeh kaoh im, ka daux kix nawh tak mawh moeng kaw pa yuh ka mawx? Kheu kix khawm aliah kaux hoik to moeng bun an heue.”
34 Yesux ah nin ka kix, “Kawn pui haktiex in, teei mex teei moeng mai teei ti tawx ka paox tix heue.
35 Viang mawh nan kix pa keung ti pon, ju khaix mai ceu pa deeh kaoh khaing krax yum khankix, ang teei mex teei moeng mai ang teei ti tawx ka paox tix heue.
36 Grawh grawng nawh, kix ang baox deeh chix yum khaix an, kheu kix sidu awm kawncau Siyiex khankix mai kix mawh kawn Siyiex, kheu kix mawh pui pa hoik deeh kaoh im heue.
37 Lheu khaing an, grawh grawng pui pa yum tak deeh kaoh im, viang mawh Mose kawx hoik jhi yaox, dee koe yeem khaox, yam kok nawh Siyiex mawh Siyiex Abraham, Siyiex Icak mai Siyiex Yakop heue.
38 Nawh ang mawh Siyiex pui yum, Nawh mawh Siyiex pui im, mawh kheu Nawh pui khawmuik mawh pa im heue.”
39 Pui tiiem lai tix blah deeh ah nin, “Sara Cao Gau eue, caw, mhawm pa ah Maix heue.”
40 Khaix an kix ang pon chawk lox ka Nawh Cao tix ceu kawx heue.
(Mat 22:41-46; Mak 12:35-37)
41 Yesux ah nin ka kix, “Kix ah Khrit mawh kawn Davit yuh ka mawx?
42 Grawh grawng nawh, tokaux Davit hoik ah nin ka daux Lai Yaogyaw, Siyiex leeing ju ah nin ka Simiang aux, ngawm plak taix khawn dawm Aux,
43 tom kieh Aux pui koeng ka Maix, mawh ngot dee deuh Maix caong heue.
44 Mawh kheu nan, phan Davit hoik kok Nawh mawh Siyiex, nawh chix mawh kawn Nawh yuh ka mawx?”
(Mat 2:31-36; Mak 12:38-40)
45 Nawh Cao ah nin ka kawncau Nawh khankix, ka deeh pon mhong pui khawmuik.
46 “Rien rhawm tix via ka cao tiiem lai khankix pa simie ti ceep sibex dha hu mai moh ti kieh pui ah lox yungyi ka tix daux lah cau, moh dee ngawm pa mhawm khaing paox tix daux nyiex sidiex khankix mai dee yuh pawie khankix heue.
47 Kix chix rud ti ih nyiex miexmai khankix mai sonsang chix pie lhen, kix rawg bwan tom lang, kix tak nie pon krax prawng ciyang pa ting heue.”