1 Pui koh mau mai pui ting map khawmuik, hoek dex ka Nawh Cao, sonsang nghiet Nawh heue. 2 Pharishie khawm pui tiiem lai khankix, salao ah nin, “Pui in nieb rieb ti teei pui ting map khankix mai sawm tau mai kix heue.” 3 Nawh Cao krai lox tiag in ka kix ah nin, 4 “Ka daux pex koe pui tix kaux kaux, pa koe yung tiyieh mai phan grai tix mu, pa ang prah ang grham, yung tix dim dim an, ka daux tiag mai hu sawg pa grai an tom hoik yaox nawh lie? 5 Yam hoik yaox nawh yung an, nawh gaux rhawm mai deuh piang klip tix heue. 6 Yam hoek nawh ka nyiex tix, nawh kok khrawm paox grawm nawh khankix mai paox plawg nawh khankix, ah nin ka kix, gaux rhawm tau mai aux heue, kheu hoik deeh yaox aux yung aux pa hoik grai heue. 7 Aux krai ka pex, ka daux meung raoma kawx, nie lheu koe krax gaux rhawm, yam doh keud pui koe map koe grham tix kaux, ka phimap tix, khaing son pui rahsee tix dim dim kaux, pa ang loh krax doh keud phimap tix heue.

8 “Phan ang mawh nan bun tix kaux kaux, pa koe mau kao pieak, phan grai tix plah, nawh ang tok kawk ngu mai pih nyiex tix mai nied ti sawg tom yaox mau an lie? 9 Yam hoik yaox nawh mau an, nawh kok khrawm paox grawm nawh khankix, paox plawg nawh khankix ah nin, gaux rhawm tau mai aux heue. Kheu hoik deeh yaox aux mau tix plah pa hoik grai khaing aux heue. 10 Awm an, Aux krai ka pex, koe krax gaux rhawm, dee ot kawncau Siyiex khankix, yam pui koe map koe grham tix kaux doh keud ka phimap tix heue.”

11 Nawh Cao baox ah nin, “Pui tix kaux koe kawn simex ra kaux. 12 Ka daux kiex, kaw pa mawh pux ah nin ka keeing tix, Keeing eue, tawx sin ngao cie maix, pa khaw aux ti pon liak mai nawh gwieh sin ngao tix ka kiex heue. 13 Khaix an ang awt rheung, kawn pa mawh pux, khrawm kraung khrai cie tix mai hu daux meung dee singai tix meung heue. Nawh nieb yuh pa ang khaw ang jiet mai kieh sin cie tix som nai nawk tan heue. 14 Yam hoik uik cai nawh pa koe tix khawmuik, daux meung an kied lang teung sibhawm mai tokaux nawh kawx hot sibhawm heue. 15 Yam an nawh hu ka pui meung an tix kaux mai yuh siliex nawh heue. Kaw an ploi nawh hu ka daux ma tix, sonsang kia, sang tawx, lig sawm heue. 16 Nawh simie ti sak tu ka ceem pa ih lig khankix, pui tix kaux kawx ang tawx ka nawh heue. 17 Viang mawh nan yam deeh doh keud nawh, nawh ah nin, kawncau pa cang caing ka keeing aux koe miex ding pa sak mai ang uik ih mai aux siya tix tin, dex sang yum heue. 18 Aux tak kaoh mai deeh hu ka keeing aux mai ah nin ka nawh, keeing eue, aux hoik lud hoik yuh phimap ka Siyiex raoma mai sivoe ngai maix heue. 19 Ang keung ti kawn kok aux, mawh kawn simex maix, kieh aux mawh ngie kawncau pa cang pa caing ka maix tix kaux liak. 20 Nawh kaoh mai deeh hoek ka keeing tix. Yam kawn tak hoek nawh, dee singai, keeing nawh yaox nawh, koe krax caux rhawm, to ti hu, khawp ngawg nawh mai ngheut nawh heue. 21 Kawn simex an ah nin ka nawh, keeing eue, aux hoik lud hoik yuh phimap ka Siyiex raoma mai sivoe ngai maix heue. Ang keung ti kawn kok aux mawh kawn simex maix heue. 22 Viang mawh nan, keeing nawh ah nin ka kawncau nawh khankix, nied ti hu teei kraung ceep pa lheu mhawm khaing paox tix mai ceep ka nawh mai sau jeep giien ka taix nawh mai ceep kiep ka caong nawh heue. 23 Hu teei kawn mawie pa kluing pa bee mai pah nawh, kieh ex ih mai yuh krax gaux rhawm heue. 24 Mawh kheu kawn simex aux in hoik yum, yam in hoik deeh im, nawh hoik grai, hoik deeh yaox yam in heue. Kix jah ti yuh krax gaux rhawm heue. 25 Yam hoek kawn nawh pa mawh puxke, khaing ma mai hoek ka dex nyiex, nawh mhong luah lox pi kuceu mai lox graoh lox thiao. 26 Nawh kok kawncau tix kaux mai chawk nawh, grawng ceu an mawh pa yuh ka mawx. 27 Kawncau an deeh krai ka nawh, pux maix hoik deeh hoek mai keeing maix hoik pah mawie iak pa kluing pa bee, kheu hoik deeh pon nawh ti rieb nawh mhawm mhawm heue. 28 Viang mawh nan, pa mawh puxke an, song rhawm mai ang laig ka daux nyiex mai keeing nawh lih hu khyox khaw nawh heue. 29 Nawh deeh pawk lox ka keeing tix ah nin, jhak heue, aux hoik yuh son maix tom nie num in kix mai aux ang sax lheu lox maix tix bawg kawx, viang mawh nan maix ang sax tawx kawn pex ka aux tix mu kawx, yuh ka mawx sonsang yuh aux krax gaux rhawm tau mai paox grawm aux khankix heue. 30 Kawn maix pa hoik kieh sin maix nai ka bun coh kaux khankix, deeh hoek maix hoik phah kawn mawie pa kluing pa bee son nawh heue. 31 Keeing nawh ah nin ka nawh, kawn simex aux eue maix ot tau mai aux jheung jheung, can pa koe aux khawmuik, mawh cie maix heue. 32 Khaw ti yuh krax gaux rhawm mai gaux rhawm heue. Mawh kheu pux maix in hoik yum mai yam in hoik deeh im, nawh hoik grai mai yam in hoik deeh yaox heue.”