2
Eliyax Haok Ka Raoma
1 Khaix hoik luan ceu ankix, yam hoek bawg yam sang teei Siyiex ka Eliyax haok daux raoma ka bhaung keu kang lux, Eliyax hu tau mai Elishie daux veng Gilagalax heue.
2 Khaix an Eliyax ah nin ka Elishie, “Yuh bwanson ot tin, mawh kheu Siyiex ploi aux hu ka veng Betelax heue.” Elishie ah nin, “Awm krax pa im ju Siyiex mai krax pa im ju maix, aux tak ang lai pon gwieh maix heue.” Mawh kheu nan, kiex khawm ra lih hu tau ka veng Betelax heue.
3 Cub cao jhai khankix pa ot ka daux veng Betelax khrawm paox tix hoek ka Elishie ah nin, “Mawh hoik tawng maix ka sang teei Siyiex, cao simiang maix pa mawh cao kaing maix hu khaing maix daux in singaix lie?” Nawh ah nin, “Mawh heue, aux hoik tawng; ot yiien yawg heue.”
4 Eliyax ah nin ka nawh, “Elishie eue, ot tin, mawh kheu Siyiex hoik ploi aux hu ka veng Yerikho heue.” Nawh deeh ah nin, “Awm krax pa im ju Siyiex mai krax pa im ju maix aux tak ang pon ti gwieh khaing maix heue.” Mawh kheu nan, kiex khawm ra lih hu tau ka veng Yerikho heue.
5 Cub cao jhai khankix pa ot ka daux veng Yerikho, khrawm paox tix hoek ka Elishie mai ah nin ka nawh, “Mawh hoik tawng maix ka sang teei Siyiex, cao kaing maix hu khaing maix daux in singaix lie?” Nawh ah nin, “Mawh heue, aux hoik tawng, ot yiien yawg heue.”
6 Khaix an Eliyax deeh ah nin ka nawh, “Yuh bwanson ot tin, mawh kheu Siyiex hoik ploi aux hu ka rawm klawng Yawdan heue.” Nawh deeh ah nin, “Awm krax pa im ju Siyiex mai krax pa im ju maix, aux tak ang pon ti gwieh khaing maix, ” Mawh kheu nan, kiex khawm ra lih hu tau heue.
7 Cub cao jhai khankix tixphwan kaux, hu mai kix cung ka plak sivoe kix dee singai, yam kawn cung kiex ra kaux hawt rawm klawng Yawdan heue.
8 Yam in Eliyax teei sibex dhah ceep tix, pua mai sivied ka rawm; mai rawm tang gwieh tix plak in plak an mai kiex ra kaux tiang ti hu ka plak toi an ka piang tiex kroh heue.
9 Ceu ankix hoik lih ti mawh yam tiang kiex ka plak toi rawm, Eliyax ah nin ka Elishie, “Rawg mhaing mawh sang yuh aux ceu patix ka son maix, sivoe ang aux nyang bax hu khaing maix?” Mai Elishie ah nin, “Yuh bwanson kieh khwan maix koe ka piang aux ra sonRef 2:9 Pi 21:17. heue.”
10 Mawh kheu nan, Eliyax ah nin, “Maix hoik rawg ceu pa kied nu, viang yuh ka mawh kawx phan maix yaox yam li aux ti hu khaing maix, maix tak pon awm an, phan ang mawh nan, phan maix ang yaox maix tak ang lai pon ka heue.
11 Yam kawn lailing kiex ti sikah tau mai paox tix, ling lawx ngu tix lhang bleeh sijaox tau mai brung ngu, gwieh ka kiex ra kaux; Eliyax haok tau mai bhaung keu kang lux teei nawh haok ka raoma heue.
12 Elishie hoik yaox ka ceu ankix mai nawh kok yo ah nin, “Keeing aux eue, keeing aux eue, ling lawx naing mai khawm pui naing brung pui Isarelax, ”Ref 2:12 2Sim 13:14. Khaix an nawh ang lai yaox ka nawh tix bawg kawx heue. Nawh giex ti riah sibex dhah tix koe ra plak heue.
13 Nawh sut ti teei sibex dhah Eliyax pa cod khaing nawh mai deeh ing cung ka praok rawm klawng Yawdan heue.
14 Nawh teei sibex dhah Eliyax pa hoik cod khaing nawh mai sivied rawm ka ah nin, “Siyiex Eliyax ot dee mawx lie?” Mai yam hoik sivied nawh rawm ka sibex dhah an, rawm hoik tang gwieh ti hu plak in plak an mai Elishie tiang ka plak toi an heue.
15 Yam hoik yaox cub cao jhai khankix pa ot ka veng Yerikho ka nawh, kix ah nin, “Khwan Eliyax hoik ot ka piang Elishie mai kix gup tix ka piang tiex ka plak sivoe nawh heue.”
16 Khaix an, kix ah nin ka nawh, “Yam in, pui ting riang rao khankix tixphwan kaux ot tau mai kawn cau mau soi maix, yuh bwanson kieh kix lih sawg ka cao simiang maix, ha khwan Siyiex teei nawh haok mai deuh nawh ka piang gawng tidah dah heue.” Nawh ah nin, “Ang shiao ploi pui hu tix kaux kawx heue.”
17 Yam sigleeig kix ka nawh, tom ang nawh lai tawng ka pa sang ah tix mai nawh ah nin, “Ploi kix lih hu heue.” Mawh kheu nan, kix ploi pui hu tixphwan kaux mai kix sawg ka nawh loe singaix, viang mawh nan, kix ang yaox ka nawh heue.
18 Yam deeh hoek kix ka Elishie yam kawn ot nawh ka daux veng Yerikho, nawh ah nin ka kix, “Ang shiao hu, aux hoik ah nan ka pex ang mawh lie?”
Elishie Yuh Mhai Pa Daox Deng
19 Khaix an pui daux veng khankix ah nin ka Elishie, “Dah dee veng in mawh pa mhawm grang, awm krax pa hoik yaox cao simiang aux; viang mawh nan, rawm ang mhawm mai tiex ang chix plix heue.”
20 Nawh ah nin, “Teei klong khraox tix mu hoek ka aux mai sau kih ka daux an, ” Mawh kheu nan, kix viex klong an hoek ka nawh heue.
21 Elishie lih hu ka dee lih rawm mai sau kih ka daux ah nin, “Siyiex ah nin, aux hoik cox rawm in mhawm; khaix in krax yum ang ah, krax pa ang tie chix plix ang ah, tak ang lai koe khaing tan heue.”
22 Mawh kheu nan, rawm an hoik mawh pa mhawm tom hoek ka daux in singaix, awm lox pa hoik ah Elishie ti deuh heue.
23 Nawh haok khaing tan mai hoek ka veng Betelax, yam lawng nawh krax kawn nyawm simex tiblah hoek khaing ka daux veng mai ah lox sibriem ka nawh ah nin, “Pui pa pak kaing eue haok heue, pui pa pak kaing eue haok heue.”
24 Nawh deeh veeh tix mai jhak ka kix mai nawh jhax lawg ka kix ka daux min ceu kaux Siyiex mai krih miex ra mu lih khaing daux nong mai paig ka kawn nyawm ankix, tixpon ra kaux heue.
25 Khaix an, nawh deeh lih hu khaing tan mai hoek ka gawng Khamelax, kaoh khaing tan, nawh deeh ing ka veng Samarix heue.