19
Yudax Luad Luan Khaing Senakherix
(2Been 32:20-23; Isa 37:1-38)
1 Yam hoik mhong Hezakiyax ka lox ah kix, nawh riah kraung ceep tix mai vhua tokaux tix ka chee mai hu laig ka daux nyiex bwan Siyiex heue.
2 Khaix an, nawh ploi Eliyakim cao kwang daux nyiex ma simiang mai Shebanax cao tiiem lai mai khrawm cub kuad cao giex kaing li khankix, hu ka cao jhai Isayax, kawn simex Amok heue.
3 Kix ah nin ka nawh, “Hezakiyax ah awm in singaix in mawh singaix pa kha rhawm mai pa koe lox ah lox ne mai lox sibriem awm hoik hoek bawg yam keh kawn ngie, viang mawh nan, ang lai koe riang rao tix keh heue.
4 Ha Siyiex maix mhong ka lox krai Rabashakhie, pa hoik ploi cao simiang nawh pa mawh simiang haktiex Asurix, hoek ti bleeh ka Siyiex pa im ju mai Siyiex maix tak deeh ne ka gumlox pa mhong Nawh Cao khawmuik heue. Mawh kheu nan maix rawg bwan son pui pa kawn deuk khankix heue”
5 Mawh kheu nan, kawncau mau soi simiang Hezakiyax khankix hoik bleeh ka Isayax heue.
6 Isayax ah nin ka kix, “Pex krai yuh nin ka cao simiang pex, Siyiex ah nin, paw lhat graung ka lox pa hoik mhong maix khankix, khaing cub kawncau mau soi simiang haktiex Asurix pa hoik si briem ka Aux awx.”
7 Aux tak kieh rhawm nawh sung sang mai nawh tak mhong lox satang mai deeh ing ka haktiex cao tix heue. Aux tak sang kieh nawh yum ka lawm vaig ka daux haktiex cao nawh heue.
Lox Rawg Bwan Hezakiyax
8 Mawh kheu nan, Rabashakhie deeh ing mai yaox puing simiang haktiex Asurix ka veng Libanax, kheu hoik mhong nawh lox hu simiang khaing veng Lakhisha heue.
9 Simiang mhong grawng hoek Tirakax, simiang haktiex Ethiopia haktiex Kusax mai nawh hoik ah nin, “Jhak heue, nawh hoek ti sang yuh naing ka maix heue.” Mawh kheu nan, nawh deeh baox ploi cao cau tix khankix hu ka Hezakiyax ah nin,
10 “Pex krai ah nin ka Hezakiyax simiang haktiex Yudax paw doh kieh Siyiex een maix rhawm tix pie lhen ka maix ah nin, veng Yerusaliem tak ang pon ap tix ka daux tawm taix simiang Asurix heue.
11 Jhak heue, mawh hoik mhong maix pa yuh cub simiang Asurix ka haktiex an khankix khawmuik mai pa ah nawh ti yuh kix laux leeing khawmuik, mai maix khex sang pon ti glawd khaing lie?
12 Haktiex pa hoik yuh keeing aux laux leeing khankix, pa mawh haktiex Gozan, Haram mai haktiex Rezat mai ceu pui Eden khankix pa ot daux veng Telasa mawh hoik sax taoh siyiex ceu pui inkix ka kix lie?
13 Mawh koe simiang haktiex Hamat mai simiang haktiex Arapat mai simiang veng Sepharavim, veng Hanax mai veng Iva khankix dee mawx lie?”
14 Hezakiyax pon rieb lai khaing daux tawm taix cao cau khankix mai hoik phat ka lai an, mai Hezakiyax, haok ka daux nyiex bwan Siyiex mai nih lai an ka plak sivoe Siyiex heue.
15 Khaix an, Hezakiyax rawg bwan ka plak sivoe ngai Siyiex ah nin, “Siyiex ceu pui Isarelax pa ot ka daux sinax Cherubim eue, Ref 19:15 Lih 25:22. mawh ngie Maix Cao pa mawh Siyiex ka piang meung haktiex khawmuik, Maix Cao hoik phan raoma mai haktiex heue.”
16 “Siyiex eue, daong yhaok Maix Cao mai nghiet heue. Simiang Siyiex eue, blah ngai Maix Cao mai jhak heue, mai nghiet ka lox kawncau Sanakherit, pa hoik ploi nawh hoek sibriem ka Siyiex pa im ju heue.”
17 “Siyiex eue, mawh tete, cub simiang Asurix khankix hoik yuh ceu pui khankix mai khawm haktiex khankix laux leeing,
18 hoik tik kix ka daux ngu, mawh kheu siyiex ankix ang tie mawh siyiex mai an hoik mawh pa yuh pui ka taix tix khankix, pa mawh khaox mai simaox khankix, mawh kheu nan, kix hoik yuh laux leeing heue.
19 Siyiex ex eue, yam in aux rawg bwan, Maix Cao deeh taoh yix khaing tawm taix nawh, sonsang tawng meung haktiex pa koe piang ca haktiex in khawmuik ka Maix Cao Siyiex tix kaux khaing heue.”
Gumlox Siyiex Son Sanakherit
20 Khaix an, Isayax kawn simex Amok hoik ploi pui hu ka Hezakiyax ah nin, “Siyiex ceu pui Isarelax ah nin, grawng pa hoik rawg maix bwan ka Aux sonsang puing ti ka Senakharit simiang haktiex Asurix Aux hoik mhong ka heue.”
21 In mawh gumlox pa krai Siyiex son nawh bun krih loig kawn bun Zion, hoik nu nai ka maix hoik nyiah ka maix, kawn bun veng Yerusaliem, hoik vuh vied kaing tix ka plak khaix maix!
22 Maix deuh phimap ka pui mawx mai hoik sibriem ka pui mawx? Mawh hoik riag yo maix lox tix ka pui mawx! Mai hoik yaog ngai tix lhaong ka piang pui mawx lie? Maix hoik yuh ceu ankix ka Siyiex pa singax singeh ceu pui Isarelax heue.
23 Maix kieh cao cau tix khankix, sibriem ka Siyiex mai hoik ah nin “Aux viex ling lawx naing brung pa kied haoh cie aux khankix, laig ka choek gawng tom bleeh ka dee pa kied singai Lebanon; Aux tak kid ti tik khaox lhaong Arit khankix mai khawm khaox gix pa kied mhawm khankix, Aux sang laig ka daux nong pa kied singai ka daux haktiex khankix, ka dee raug khaox plix khankix ka daux nong heue.
24 Aux kaong rawm daux mai hoik nyaux rawm pui tang praix klawng mai tiag caong aux, dig ka rawm klawng Ejiptux khankix hit,
25 mawh ang maix sax mhong ka grawng pa hoik yuh Aux tom didix lie? Jah ka tom yam an, Aux hoik yuh ceu ankix mawh sonsang mawh maix pa sang yuh veng pa kaux cong an khankix laux mai awm pum simaox pa nai nawk heue.
26 Mawh kheu nan, pui veng khankix kix hoik iak riang heue. Kix hoik Sikua rhawm mai kaig tua, kix hoik awm rib riem daux tiagtu mai taux lhax pa klai khankix, hoik awm rib kuah ka piang braux nyiex mai awm kawn nghox hoik fit sivoe ang nyang ting heue.
27 Aux tawng dui ot dui koe maix, khawm dee lih dee laig maix mai krax song rhawm maix ka Aux heue.
28 Mawh kheu krax song rhawm songrhi maix ka Aux mai lox pa nu nai maix khankix hoik hoek ka daux yhaok Aux, mawh kheu nan, Aux tak sau gok mai feuk ka meeh maix mai jup jheeh maix ka jup mai Aux tak deeh kieh maix ing plak krax haok maix heue.
29 In tak mawh mhai ruk ka son maix, maix tak ih can ceu pa tang kuah ka daux num in mai ka daux ra num tix num maix tak yaog ti ih pa kuah awm an heue. Ka daux loe num tix num kawx mawh bawg yam ruat simie mai vawg, sum sipeem plix siiet mai ih plix an khankix heue.
30 Can pui pa kawn deuk mai pa glawd khaing daux nyiex ma Yudax khankix, tak baox kaux riah tom hoek plak greem mai tak deeh plix ka piang heue.
31 Can pui pa kawn deuk khankix tak lih hu khaing veng Yerusaliem mai pui pa glawd khankix tak lih hoek khaing gawng Zion heue. Krax koe rhawm rhi Siyiex Cao pa ting lhaongka piang khawmuik,
32 “Mawh kheu nan, Siyiex ah awm in ka grawng simiang haktiex Asurix, nawh tak ang pon ti laig daux veng in mai ang pon tix puing te tin mai ang pon ti hoek ka plak sivoe veng tau mai kraung pa tiebtie mai ang pon ti pum tiex sonsang puing ka veng an heue.
33 Nawh kaoh khaing krax mawx, nawh tak deeh ing krax an mai nawh tak ang pon ti laig ka daux veng in, in mawh pa ah Siyiex heue.
34 Grawh grawng nawh, Aux tak tiebtie mai taoh ka veng in son min tokaux Aux mai son min pakngai kawncau Aux Davit heue”
35 Ka daux sawm an kawncau Siyiex lih hu mai pah cub pui Asurix khankix tix sien daix mheen phwan rheng kaux ka dah dee bang kix, mai yam kaoh pui plak ponngawb caocao jhak heue, pui khankix hoik mawh tokaux yum heue.
36 Mawh kheu nan, Senakharit simiang haktiex Asurix lih hu dee singai mai hoik deeh ing ka nyiex tix mai dah ti ot ka daux veng Nineve heue.
37 Tix singaix yam kawn krub nawh ka siyiex tix Nisarot ka daux nyiex bwan, kawn simex nawh khankix pa mawh Adarameliet mai Sharezap hoik pah nawh yum ka vaig, mai kiex hoik to ka haktiex Ararat heue. Khaix an, kawn simex nawh Esarahadon deeh plud ti kwang haktiex ka dah dee ot nawh heue.