16
Krax Kwang Ahaza Ka Yudax
(2Been 28:1-27)
1 Daux num yam kwang Peka kawn simex Remariyax ka haktiex kao aliah num tix num, Ahaza kawn simex Yotham, simiang Yudax jah ti kwang ka haktiex heue.
2 Ahaza koe ju tixnga num yam yaog nawh ti mawh simiang mai nawh kwang ka daux veng Yerusaliem kao liah num, nawh ang yuh pa khaw caw daux ngai Siyiex, awm pa hoik yuh keeing nawh Davit heue.
3 Nawh lawng ka daux krax pa yuh cub simiang pui Isarelax, nawh kieh kawn simex tix mawh pa tan tix gleeing ka ngu, awm pa seeing brai ceu pui khankix, pa hoik tik vud Siyiex khaing ka plak sivoe pui IsarelaxRef 16:3 Pi 12:31. heue.
4 Nawh tan krax pa appong mai gleeing nyawng bhawng ka piang can dee pa lhaong khankix, pa koe piang gawng mai ka greem khaox pa kawn klai khankix heue.
5 Khaix an, Rezin simiang haktiex Surix mai Peka simiang pui Isarelax, hoek ka veng Yerusaliem son yuh naing; mai kix hoik lai lawm ka Ahaza, viang mawh nan, kix ang pex nawh heue.Ref 16:5 Isa 7:1.
6 Ka daux bawg yam an, Rezin simiang haktiex Surix, hoik pon rhim veng Elat son haktiex Surix mai grheu ti tik pui Yudax khankix khaing veng Elat mai kix ot tan tom hoek daux in singaix heue.
7 Mawh kheu nan, Ahaza ploi cao cau khankix hu ka Tikalat Pilesa, simiang haktiex Asurix ah nin “Aux mawh kawncau maix mai kawn simex maix heue. Hoek heue. deeh taoh aux lih khaing daux tawm taix simiang Surix mai khaing daux tawm taix simiang pui Isarelax pa yaog ti tieh feen ka aux heue.”
8 Ahaza teei khri mai mau khankix pa koe ka daux nyiex bwan Siyiex mai khaing ka daux nyiex sinngao nyiex simiang khankix mai tawx ceu ankix mawh totaix ka simiang haktiex Asurix heue.
9 Mawh kheu nan, simiang haktiex Asurix cu nghiet ka nawh, mawh kheu simiang haktiex Asurix haok puing ka veng Damase mai rhim ka veng an mai nawh giex ti viex pui veng an khankix hu ka veng Kirax mai pah simiang Rezim yum heue.
10 Yam in Ahaza hu ka veng Damase sonsang pub ka simiang Tikalat Pilesa simiang haktiex Asurix mai yaox ka khu dee tan tix mu ka daux veng Damase, mai simiang Ahaza jhi riang pakpeung khu dee tan an awm khaix taix pa yuh pui khankix mai tawx hu ka cao giex kaing li Uriyax heue.
11 Khaix an, cao giex kaing li Uriyax, sum khu dee tan tix lhang, awm pakpeung riang pa tawx simiang Ahaza khaing veng Damase, mawh kheu nan, cao giex kaing li yuh hoik sivoe ang simiang Ahaza nyang hoek khaing daux veng Damase heue.
12 Yam hoek simiang khaing veng Damase, simiang yaox khu dee tan mai simiang greed tix dex hawt khu dee tan mai tan ka piang an heue.
13 Mawh kheu nan, nawh gleeing krax tan pa gleeing mai krax tan phawng nghox ca mai groi krax tan pa nyaux mai phruah nham krax tan pa nhim ka piang khu dee tan heue.
14 Nawh deeh teei khu tawng dee tanRef 16:14 Lih 27:1-2; 2Been 4:1. pa koe ka plak sivoe Siyiex, khaing plak sivoe nyiex bwan mai khaing daux sinax khu dee tan pa khraox an mai nyiex bwan Siyiex mai deuh ka praok plak laong khu dee tan pa khraox an heue.
15 Khaix an, simiang Ahaza tawx lox ka cao giex kaing li Uriyax ah nin, “Gleeing krax tan pa gleeing ponngawb mai krax tan phawng nghox ca im ponbo mai krax tan pa gleeing cie simiang mai krax tan phawng nghox ca mai krax tan pa gleeing cie pui haktiex khankix mai khawm krax tan phawng nghox ca mai krax tan pa nyaux khankix ka piang khu dee tan khraox pa kied ting an heue. Phruah nham to tan pa gleeing mai nham to tan pa appong khawmuik ka piang an mai khu tawng dee tan an, tak mawh dee pa chawk cheng ka Siyiex heue.
16 Cao giex kaing li Uriyax hoik yuh awm pa tawm simiang Ahaza ka nawh khawmuik heue.
17 Simiang Ahaza lah ti tik dang ling lawx an khankix mai gah tawg pheung khaing ka piang an heue. Nawh teei dung tawng an lih khaing riang mawie tawng khankix, pa koe ka greemRef 16:17 1Sim 7:23-39; 2Been 4:2-6. mai deuh ka piang simaox pa hoik tawm tix heue.
18 Nawh hoik deeh gah nyiex bwan son singaix twah, pa sum kix ti deuh ka daux nyiex bwan mai nawh deeh hoik gah pa koe daux krax laig simiang pa koe plak praix nyiex bwan Siyiex kheu jao simiang haktiex Asurix heue.
19 Yam in grawng kaing pa deuk Ahaza khankix, ang hoik mawh pa tiiem ti deuh ka daux phuk lai been cub simiang haktiex Yudax khankix lie?
20 Khaix an, Ahaza laux lee tix tau mai keeing nawhRef 16:20 Isa 14:28. mai sipaung tau mai keeing nawh ka daux veng Davit heue. Khaix an, kawn simex nawh Hezakiyax hoik plud ti kwang haktiex ka dah dee ot nawh heue.