24
Lox Sijax Mukheu Veng Shekhem
1 Khaix an, Yawsux kraix khrawm doeh ru ceu pui Isarelax khankix hoek ka veng Shekhem mai nawh kok kuad riex ju pui Isarelax khankix mai cao giex kaing kix mai cao prawng see kix mai cao kaing naing kix khawmuik mai kix hoek ka plak sivoe Siyiex leeing ju heue.
2 Yawsux ah nin ka pui khankix, “Grawng lox pa hoik ah Siyiex leeing ju ka pui Isarelax, mawh pa koe yuh nin heue. Keeing pex khankix khawm Terax, Ref 24:2 Jah 11:27. pa mawh keeing Abraham mai pa mawh keeing Nakhaw khankix hoik dawg ot ka plak toi rawm klawng in tom didix mai kix hoik mawh pa yuh kaing jhaw siyiex tang kaux khankix heue.”
3 “Khaix an, Aux hoik teei keeing pex Abraham, khaing plak toi rawm klawngRef 24:3 Jah 12:1-9. mai thung kix hu ka daux haktiex meung Khanan khawmuik mai hoik yuh doeh ru nawh khankix haoh hun mai Aux hoik tawx IcakRef 24:3 Jah 21:1-3. ka nawh heue.
4 “Ka son Icak, Aux hoik tawx Yakop mai IsawRef 24:4 Jah 25:24-26. heue. Son Isaw, Aux hoik tawx nawh cie gawng Sirax khankix heue.Ref 24:4 Jah 36:8. Viang mawh nan, Yakop mai kawn praix nawh khankix lih hu ka plak meung Ejiptux heue.Ref 24:4 Jah 46:1-7.
5 Aux baox deeh ploi Mose mai Arun mai Aux hoik yuh krax pa ciyang ka meung Ejiptux, awm ceu pa hoik yuh Aux, ka daux sinax kix heue.Ref 24:5 Lih 3:1; 12:42. Khaix hoik ceu ankix Aux hoik viex pex lih hu heue.
6 Khaix an, Aux hoik viex keeing pex lih hu khaing daux meung Ejiptux mai pex hoik hoek ka rawm sigrit sigra, rawm sigrit sigra Edom mai pui Ejiptux khankix hoik hawt ti pheet khaix keeing pex khankix, tau mai ling lawx brung mai pui naing brung, tom hoek ka rawm sigrit sigra raoh heue.
7 Mawh kheu nan, kix kok yo lox tix ka Siyiex leeing ju mai Nawh Cao hoik deuh pa faik ka daux sinax pex mai pui Ejiptux khankix mai viex rawm sigrit sigra hoek ka piang kix mai kheem ti tik kix heue. Ngai pex hoik yaox ka ceu pa yuh Aux, ka daux meung Ejiptux heue.Ref 24:6, 7 Lih 14:1-31. Khaix an, pex hoik yaox ti ot ka daux tiag tom nie rheung bawg yam heue.
8 Aux viex pex hu ka daux haktiex ceu pui Amawrix khankix, pa hoik ot ka plak toi rawm klawng Yawdan mai kix puing ka pex heue. Viang mawh nan, Aux hoik ap ti tawx kix ka daux tawm taix pex, sonsang pon pex ti cie haktiex kix mai Aux hoik yuh kix laux leeing khaing plak sivoe pex heue.Ref 24:8 Si 21:21-35.
9 Khaix an, Baliep pa mawh kawn simex Ziphaw mai pa mawh simiang haktiex Mawbax, yaog ti yuh naing ka ceu pui Isarelax khankix mai nawh hoik ploi pui hu kok Balam, pa mawh kawn simex Bawrax, sonsang hoek ti jhax lawg pex heue.
10 Viang mawh nan, Aux ang cu ti nghiet ka Balam heue. Mawh kheu nan, nawh baox sitoe ti nawb bwan ka piang pexRef 24:9-10 Si 22:1; 24:25. sinyek sinyek heue. Kheu jao an, Aux deeh taoh pex lih khaing daux tawm taix nawh heue.
11 Khaix an, pex tiang ti hu ka rawm klawng YawdanRef 24:11 Yaw 3:14-17. mai hoek ka veng Yerikho heue. Pui veng Yerikho khankix deeh puing ka pex, Ref 24:11 Yaw 6:1-21. khawm pui Amawrix, ceu pui Pherazix, ceu pui Khanan, ceu pui Hitix, ceu pui Giragashix, ceu pui Hewix mai khawm ceu pui Yebusix khankix heue. Viang mawh nan, Aux hoik tawx kix ka daux tawm taix pex heue.
12 Aux hoik ploi awng lungRef 24:12 Lih 23:28; Pi 7:20. hu ka plak sivoe pex mai grheu ti tik kix lih khaing plak sivoe pex khawm simiang haktiex ceu pui Amawrix khankix ra kaux heue. Viang mawh nan, ang tie mawh vaig lawm pex mai ak pex pa grheu kix lih heue.
13 Mawh Aux pa hoik tawx haktiex tix mu ka pex, pa ang pex yaox ti yuh ka riang rao tix mai veng khankix pa ang pex yaox ti sum mai pex yaox ti ot ka daux ankix heue. Pex yaox ti ih sipeem plix siiet mai sipeem khaox sanlun khankix, pa ang pex yaox ti sum khankix heue.”Ref 24:13 Pi 6:10-11.
14 Mawh kheu nan, yam in koe krax lhat graung ka Siyiex leeing ju mai krub ka Nawh Cao ka daux krax pa koe rhawm rahsee tix mai ka daux krax pa mawh pa meh heue. Tik siyiex ankix, pa hoik krub keeing pex khankix nawh, ka plak toi rawm klawng an mai ka daux haktiex meung Ejiptux ka daux singaix heue. Krub ka Siyiex leeing ju awx.
15 Phan pex keud grawng pa krub ka Siyiex leeing ju mawh pa caox son pex, laug son cao pex daux in singaix, sang krub siyiex keeing pex pa koe plak toi rawm klawng pui Amawrix pa hoik ot sinax pex lie? “Viang mawh nan, Phan mawh aux mai nyiex ma aux, yix tak krup ka Siyiex leeing ju heue.”
16 Mawh kheu nan, pui khankix deeh pawk lox nawh ah nin heue. “Sonsang tik vud yix ka Siyiex leeing ju mai krax pa sang krub yix siyiex tang kaux, Kieh inkix singai khaing yix liak.”
17 Grawh grawng nawh, Siyiex leeing ju mawh pa hoik viex ex mai keeing ex lih hu khaing daux haktiex meung Ejiptux mai khaing daux nyiex ma pa yuh ex kaing siliex mai krax pa hoik yuh Nawh Cao mhai pa daox ding pa ting mai krax pa hoik priex rien Nawh Cao ka ex, ka daux krax pa hoik hu ka daux sinax pui khankix mai can dee pa hoik tiang ex ti hu heue.
18 Siyiex leeing ju hoik grheu pui ankix khawmuik khaing plak sivoe ex, khawm ceu pui Amawrix khankix, pa hoik ot ka daux haktiex an heue. Ex kawx tak sang yuh kaing krup ka Siyiex leeing ju, kheu mawh Nawh Siyiex leeing ju ex heue.”
19 Viang mawh nan, Yawsux deeh ah nin ka pui khankix, “Pex tak ang pon ti krup ka Siyiex leeing ju kheu mawh Nawh Siyiex leeing ju pa singax singeh heue. Nawh mawh Siyiex leeing ju pa bak pa viang heue. Nawh tak ang pon pluat ploi pa lud pex khankix, khawm phimap pex heue.”
20 Phan pex tik vud ka Siyiex leeing ju mai krub siyiex tang meung khankix, khaix an, Nawh Cao tak veeh tix mai yuh krax pa ciyang ka pex mai yuh pex laux leeing, khaix hoik yuh Nawh Cao pa mhawm ka pex heue.
21 Pui khankix deeh ah nin ka Yawsux. “Ang mawh, viang mawh nan, yix tak krup ka Siyiex leeing ju heue.”
22 Mawh kheu nan, Yawsux deeh ah nin ka pui khankix. “Pex mawh pa kham mhai rug ka tokaux cao tix mai pex hoik laug ti teei Siyiex leeing ju son tokaux cao pex, sonsang krub pex ka Nawh Cao heue.” Kix deeh ah nin. “Yix mawh pa kham mhai rug khankix heue.”
23 Nawh deeh ah nin ka kix. “Mawh kheu nan, yam in teei ti tik siyiex tang meung pa koe ka daux sinax pex khankix hu dee singai mai deeh tieh rhawm pex hoek ka Siyiex leeing ju ceu pui Isarelax heue.”
24 Pui khankix deeh ah nin ka Yawsux. “Yix tak krup ka Siyiex leeing ju mai yix tak cu nghiet ka gumlox sikah Nawh Cao heue.”
25 Mawh kheu nan, Yawsux hoik yuh sijax mukheu tau mai pui khankix ka daux singaix an mai nawh hoik yuh tix tawx been pa hoik priex deuh ka son kix mai khawm been lox tat jhawm prawng son kix ka daux veng Shekhem heue.
26 Khaix an, Yawsux hoik tiiem gumlox inkix ka daux phuk lai beenli Siyiex leeing ju heue. Nawh teei lon simaox pa ting tix mu mai jung ti deuh nawh tan greem khaox tiah, pa hoik koe hawt dee singax singeh Siyiex leeing ju heue.
27 Yawsux deeh ah nin ka pui khankix, “Jhak heue, Lon simaox in, tak mawh mhai rug ka son pex, kheu hoik mhong pex gumlox sikah Siyiex leeing ju pa hoik krai Nawh Cao ka ex khawmuik heue. Mawh kheu nan, an tak mawh pa kham mhai rug ka son pex. Phan ang mawh nan, aux lhat pex thiang ti tik Siyiex leeing ju pex heue.”
28 Mawh kheu nan, Yawsux deeh kieh pui khankix lih hu khaing tix mai kieh kix deeh ing ka sinngao cie cao tix ku kaux heue.
Grawng Yum Yawsux
(Cao 2:6-10)
29 Yam in, khaix hoik luan ceu inkix, Yawsux pa mawh kawn simex Nun, pa mawh kawncau Siyiex leeing ju hoik yum, yam koe ju nawh tix yieh kao num heue.
30 Mai kix hoik sipaung nawh ka daux mee haktiex sinngao cie nawh, ka veng Timanaserax,Ref 24:30 Yaw 19:49-50. pa koe ka piang gawng Epharim khankix, ka plak laong khaing gawng Gasha heue.
31 Ceu pui Isarelax khankix hoik krup ka Siyiex leeing ju glang singaix im ju Yawsux tau mai kuad riex ju an khankix, khaix ang Yawsux lai koe tau mai kix, pa hoik tawng ka kaing krub ka Siyiex leeing ju khankix khawmuik mai ka pa hoik priex Nawh Cao ka ceu pui Isarelax khankix heue.
32 Mai kix hoik sipaung si ang Yosiep, pa hoik viex kawn praix Isarelax khankix lih hu khaing daux meung Ejiptux, Ref 24:32 Jah 50:24-25; Lih 13:19. ka veng Shekhem, ka daux gwang haktiex pa hoik liag Yosiep khaing kawn simex Hamaw khankix, pa mawh keeing Shekhem, ka mau luah tix yieh plah heue.Ref 24:32 Jah 33:19; Yo 4:5; Cau 7:16. Mai biang haktiex an, hoik lih ti mawh sinngao cie kawn praix Yosiep khankix tix dah heue.
Grawng Yum Eliza
33 Eliza, pa mawh kawn simex Arun hoik yum. Kix hoik sipaung nawh ka piang ton gawng tix mu pa mawh cie kawn simex nawh Phinihat mai pa hoik tawx kix ka nawh ka piang gawng Epharim khankix heue.