13
Haktiex Pa kawn Deuk
1 Yam in Yawsux hoik riex ju mai hoik hu sipie kuad ju tix heue. Siyiex leeing ju deeh ah nin ka nawh heue. “Maix hoik riex ju mai hoik hu sipie kuad ju tix heue. Haktiex pa sang baox rhim pex ti teei kawn koe tom nie heue.”
2 In mawh haktiex pa kawn deuk khankix, pa mawh haktiex kwang pui Philitix mai haktiex kwang pui Geshurix khankix khawmuik,
3 jah ka rawm klawng Shihawrax, pa koe ka plak lih singaix khaing meung Ejiptux, tom hoek dee singai ka mee haktiex veng Ekaron, pa koe ka krax plak laong, Pa hoik simin tix awm ceu pui Khanan khankix heue. Simiang haktiex Philitix phwan kaux pa mawh pui Gazatix, pui Ashadawdix, pui Ashakelonix, pui Gitix mai pui Ekarawnix, khawm pui Ewix khankix,
4 Jah khaing krax plak seh khankix hoik mawh haktiex pui Khanan mai haktiex Mara, pa mawh cie pui Sidom khankix, tom hoek ka dee singai ka veng Aphiet, ka mee haktiex pui Amawrix khankix,
5 haktiex pui Gebalix khankix mai haktiex Lebanon khankix khawmuik, pa koe plak lih singaix, jah khaing veng Balagat, pa koe greem caong gawng Heramon, tom hoek dee singai ka krax laig kix haktiex Hamat,
6 Can pui khankix pa ot piang gawng lua haktiex Lebanon, tom hoek dee singai ka rawm klawng Misarephot mai dee ot pui Sidom khankix heue. Aux tak grheu ti tik kix khaing ka plak sivoe pui Isarelax khankix mai gwieh tix tawx ankix ka pa yuh nieb, ka pui Isarelax khankix mawh sinngaoRef 13:6 Si 33:54. pa sang pon kix, awm hoik tawm Aux gumlox ka maix heue.
7 “Mawh kheu nan, yam in gwieh tix tawx haktiex in, mawh krax pa pon kix sinngao ka doeh ru kix sidim cub mai ka doeh ru Manashe tix plak heue.
Grawng Pa Gwieh Haktiex
8 Cub doeh ru Manashe, an tix plak tau mai pui Rubin mai pui Gat khankix, pon ti cie sinngao pa hoik tawx Mose ka kix, ka plak toi rawm klawng Yawdan plak lih singaix, awm pa hoik tawx Mose, pa mawh kawncau Siyiex leeing ju ka kix, Ref 13:8 Si 32:33; Pi 3:12.
9 jah khaing venng Araw, pa koe ka piang praok rawm klawng Anon mai veng pa koe daux sigreung dee kawk rawm khankix mai ka daux lung Medebax khawmuik, tom hoek dee singaix ka veng Dibun,
10 mai veng simiang Sihong, pa mawh ceu pui Amawrix khankix khawmuik, pa ot tix kwang ka daux veng Heshabon, tom hoek dee singai ka mee haktiex Amon,
11 Ka haktiex Gilat mai ka mee haktiex pui Geshurix mai ceu pui Makhatix, khawm gawng Heramon mai haktiex Bashan khankix khawmuik, tom hoek ka haktiex Salakha,
12 mai ka haktiex simiang Awgax, pa ot ka daux haktiex Bashan khankix khawmuik, pa kwang ka piang veng Ashatarot mai veng Edarix, pa mawh pui deuk khaing pui pa ting lhaong khankix heue. Grawh grawng nawh, Mose hoik pex ka kix mai hoik teei ti tik inkix khaing tan heue.
13 Viang mawh nan, pui Isarelax khankix, ang lai grheu ti tik pui Geshurix mai pui Makhatix khankix heue. Mawh kheu nan, pui Geshurix mai pui Makatix khankix, ot ka daux sinax pui Isarelax khankix tom hoek daux in singaix heue.
14 Mawh ngie doeh ru pui Lewix khankix, pa ang nawh tawx kix cie sinngao heue. Krax pa appong pui Isarelax khankix kuceu ka Siyiex, pa mawh krax tan pa geeing ka ngu khankix, tak mawh sinngao cie kix, awm hoik tawm Nawh Cao ka kix heue.Ref 13:14 Pi 18:1.
Haktiex Cie Cub Rubin
15 Mose hoik tawx sinngao ka doeh ru kawn praix Rubin khankix awm koe pao nyiex kix heue.
16 Mee krax pa kwang kix, tak mawh pa jah tix khaing veng Araw, pa koe ka piang praok rawm klawng Anon mai veng khankix pa koe daux sigreung dee kawk rawm klawng mai daux lung khankix pa koe hawt veng Medebax khawmuik,
17 veng Heshabon mai veng pa koe daux lung khawmuik, veng Dibun, veng Bamotbalax, veng Bietbalamon,
18 veng Yahaza, veng Gedamot, veng Mephat,
19 veng Girayatim, veng Sibama, veng Zeriet-shaha, pa koe ka daux ngawd piang gawng khankix,
20 veng Bietpegurax mai haktiex caong gawng Bizaga khankix mai veng Bietyeshimot,
21 mai can veng khankix pa koe ka daux lung khankix khawmuik mai meung haktiex simiang Sihong, pa mawh ceu pui Amawrix, pa kwang ka daux veng Heshabon khankix heue. Mose hoik kieh simiang Midian phwan kaux, pa mawh simiang Ewix, simiang Rekim, simiang Zurax, simiang Hurax mai simiang Riba khankix, hu puing ti teei haktiex dee ot simiang Sihong khankix heue.
22 Pui Isarelax khankix baox deeh pah cao jhai Balam, pa mawh kawn simex Bawrax, ka lawm vaid tau mai daux sinax pui pa hoik pah kix yum khankix heue.
23 Mee haktiex pui Rubin khankix, mawh pa koe ka piang praok rawm klawng Yawdan heue. In mawh sinngao cie pui Rubin khankix, awm krax pa koe pao nyiex kix, khawm veng khawm yaong cie kix khawmuik heue.
Haktiex Cie Cub Gat Khankix
24 Mose baox tawx sinngao ka doeh ru ceu pui Gat khankix mai ka kawn praix Gat khankix, awm pa koe pao nyiex kix heue.
25 Mee haktiex pa kwang kix tak mawh veng Yaza mai veng khankix pa koe hawt veng Gilat khankix khawmuik mai haktiex cie ceu pui Amawrix khankix tix plak, tom hoek dee singai ka veng Araw, pa koe ka plak sivoe veng Raba,
26 mai jah khaing veng Heshabon, tom hoek ka veng Ramatmizapa mai veng Betawnim khankix mai deeeh jah tix khaing veng Mahanem, tom hoek ka mee haktiex veng Debirax,
27 mai ka daux ngawd veng Biet Haram, veng Biet Nimarax, veng Sugut mai veng Zaphon mai meung haktiex pa ghoik ti mawh cie Sihong, simiang veng Heshabon khankix heue. Rawm klawng Yawdan mawh mee haktiex cie kix mai hoek tom praok dee singai ka rawm sigrit sigra Genesariet, pa koe ka toi praok rawm klawng Yawdan plak an ka dee haktiex plak lih singaix khankix heue.
28 In mawh sinngao cie kawn praix ceu pui Gat khankix, awm pa koe pao nyiex kix, khawm veng khawm yaong kix khawmuik heue.
Haktiex Ru Manashe
29 Mose baox deeh tawx sinngao ka doeh ru Manashe khankix tix plak heue. An mawh son cie doeh ru Manashe khankix tix plak, awm koe pao nyiex kix heue.
30 Mee haktiex pa kwang kix, tak mawh pa jah tix khaing veng Mahanem, khawm haktiex Bashan khawmuik mai meung haktiex simiang Awgax, ka haktiex Bashan khawmuik mai pa koe hawt veng Ya-irax khankix tixgliah veng, pa koe ka daux haktiex Bashan khankix khawmuik,
31 haktiex Gilat tix plak mai veng Ashadarot mai veng Edarix, khawm veng pa koe ka daux meung haktiex simiang Awgax, ka haktiex Bashan khankix khawmuik hoik mawh son cie kawn praix Makhirax, pa mawh kawn simex Manashe mai son cie kawn praix Makhirax khankix tix plak, awm krax pa koe pao nyiex kix heue.
32 In mawh guang haktiex pa hoik gwieh Mose tix tawx mawh krax pa pon kix sinngao ka daux lung Mawbax, pa koe ka plak toi rawm klawng Yawdan plak an, hawt veng Yerikho ka plak dee lih singaix heue.
33 Viang mawh nan, son doeh ru pui Lewix khankix, Mose ang lai tawx sinngao cie kix pie tix ceu kawx heue. Grawh grawng nawh, Siyiex leeing ju ceu pui Isarelax hoik mawh sinngao cie kix, awm hoik ah Nawh Cao ti deuh ka kix heue.Ref 13:33 Si 18:20; Pi 18:2.