1 O kieh kaing aux lih mawh rawm giex mai kieh sok ngai aux mawh rawm keut dee lih rawm ngai, aux tak sang yaox tix yiiem ku singaix son grawng pa yum kawn bun pui aux khankix liak. 2 O kieh aux koe dee pan dee peung tix dah ka daux tiagtu, pa mawh pui hu krax singai khankix, sonsang pon prah aux ka pui aux mai lih hu khaing kix liak, grawh grawng nawh, kix mawh pui pa lud vao tau mai moeng kawn pui, pa mawh cub pui pa ang kaux sijax heue. 3 Kix buk dak tix vawk awm ak puh, sonsang pie lhen. Kix ang mawh pui pa kaux sijax mai mawh tix pui ting piang haktiex heue. Mawh kheu kix hoik nied ti yuh pa caox ka piang pa caox hu sivoe ngai mai kix ang lai tawng ka Aux, Siyiex ah in, 4 “Pui ku kaux tang rien tix ka paox plawg nawh mai ang lai een rhawm ka puxaik tix pie tix kaux kawx heue. Mawh kheu puxaik ankix ku kaux tak sang rhim ka ara puxaik tix khawmuik mai paox plawg pui ku kaux tak lailing mai ah lox sibriem ka paox tix heue. 5 Pui ku kaux tak sang pie lhen ka paox plawg nawh mai ang lai sikah lox pa mawh meh heue. Kix hoik gau dak tix sikah lox pie lhen mai yuh tix taug maox son krax lud phimap tix heue. 6 Dee ot dee koe maix koe ka baoh dee pa pie lhen mai ka daux pie lhen ankix thiang tix ang tawng ka Aux, Siyiex ah nan heue.” 7 Mawh kheu nan, Siyiex Cao kru naing raoma ah nin; “Jhak heue, Aux tak sang raug kix mai cheuk cheu ti yaox kix heue. Phan ang mawh nan, Aux tak sang yuh ka mawx ka kawn bun pui Aux khankix lie? 8 Dak kix mawh te koe um pa kieh pui yum mai sikah ngie lox pie lhen heue. Nawh sikah lox pa nhim ka paox plawg tix, viang mawh nan, nawh kawn jawm kix daux rhawm tix heue.” 9 Siyiex ah nin, “Khex ang Aux sang tawx krax kham geu ka kix son grawng ceu inkix lie? Khex ang Aux sang deeh pawk bix piang ceu pui an tix cub awm in lie? 10 Aux tak sang koe krax yiiem grai mai ngia son gawng lua khankix mai krax yiiem doe son daux tiagtu khankix, kheu jao hoik proe baoh dee an, tom ang pui tix kaux kawx pon tiang tix hu ka dee an, mai pui khankix ang lai pon tix mhong lox tobrie, sim raoma mai totiag hoik to tix luan heue. 11 Aux tak kieh veng Yerusaliem mawh pum nyhee mai dah dee ot sox praix khankix heue. Aux tak kieh veng Yudax mawh dee yiien mai ang koe pui pa ot ka pie tix kaux kawx heue.” 12 Pui mawx pa koe pingnya cuyi ti tawng ka grawng in lie? Pui mawx pa hoik pon gumlox pa lih khaing jheeh Siyiex sonsang pon krai pao tix, grawng ankix lie? Haktiex laux leeing mai proe ka ngu awm daux tiang tu, son ang pui tix kaux kawx pon tiang tix hu ka dee an, kheu jao grawng pa yuh ka mawx lie? 13 Siyiex ah nin, “Kheu jao hoik tik vud kix ka lox tat jhawm prawng Aux pa hoik deuh Aux ka plak sivoe kix mai ang cu nghiet ka lox Aux mai ang hawt ti yuh awm an, 14 kix hawt hu awm krax pa keud rhawm tix mai hawt hu khaix siyiex Balax awm pa hoik gau keeing kix ti deuh ka kix, 15 mawh kheu nan, Siyiex Cao kru naing raoma pa mawh Siyiex ceu pui Isarelax ah nin, “Jhak heue, Aux tak tawx kix ih nya plix song mai tawx kix nyaux rawm ghin song heue. 16 Aux tak sang kieh kix prung prang ka daux sinax pui tang ceu khankix ka pui pa ang keeing kix sax tawng heue. Aux tak sang ploi vaig lawm hawt khaix kix, tom hoek bawg yam sidah yuh Aux kix laux leeing heue.”

17 Siyiex Cao kru naing raoma ah nin, “Keut ti yaox mai kok ka bun pa chix yiiem doe khankix hoek mai ploi bun pa min ka jhawm yiiem, son tak sang pon hoek kix heue. 18 Kieh kix nied ti hoek phaiphai mai yiiem grai ka son ex, sonsang dung rawm ngai ex mai sonsang breeng rawm ngai tix lih khaing siyieb ngai ex heue. 19 Mawh kheu hoik mhong ka lox yiiem grai khaing veng Zion ah nin, “Ex nieb hoik yaox krax tud rhim pa laux leeing yuh nin lie? Ex hoik yaox krax kaig tua pa kied ting lhaong, mawh kheu hoik tik vud ex ka haktiex mai mawh kheu hoik yieh pui ka dee ot ex khankix heue.” 20 Bun khankix eue, nghiet ka gumlox Siyiex mai kieh yhaok pex rieb ka gumlox pa kaoh khaing jheeh Nawh Cao, gau kawn bun pex khankix chix lox jhawm yiiem mai tang gau paox plawg tix ku kaux chix yiiem grai heue. 21 Grawh grawng nawh, krax yum hoik hoek bleeh ka ex mai hoik laig ka daux nyiex haw simiang ex, sonsang pah ti tik kawn nyawm khankix ka plak praix mai pui awn ju khankix piang krax heue. 22 Krai heue, Siyiex ah nin, tokaux yum pui khankix kawx tak awm aing mawie pa koe daux tong kaung, awm lhiem nghox khaix cao vawk khankix mai ang koe pui pa deeh khrawm ka heue.” 23 Siyiex ah nin, “Paw kieh pui koe pingnya cuyi yaw rangdi ka daux pingnya cuyi tix, paw kieh pui ting riang rao yaw rangdi ka daux pa ting riang rao tix mai paw kieh pui pa magmi yaw rangdi ka daux pa magmi tix khankix, 24 viang mawh nan, kieh pa yaw rangdi tix yaw rangdi ka ceu in, Ref 9:24 1Kaw 1:31; 2Kaw 10:17ka daux pa koe krax tawng yung nawh ka Aux mai ka mawh Aux Siyiex, pa yuh tix tawx krax pa caux rhawm mai krax prawng ca mai krax pa rahsee, piang haktiex heue. Mawh kheu aux koe krax pa khaw rhawm ka ceu in,” Siyiex ah nin heue. 25 Simiang siyiex ah nin “Jhak heue, bawg yam singaix khankix tak sang hoek mai Aux tak sang ciyang ka pui pat hak tau mai pui pa ang pat hak khawmuik, 26 Ref 9:26 Cau 7:51pa mawh pui Ejiptux, pui Yudax, pui Edom mai ceu pui Amon, ceu pui Mawbax mai can pui pa khlao hauk bheup tix pa ot ka daux tiagtu. Mawh kheu ceu pui inkix ang nyang mawh pa pat hak tix mai can pui daux nyiex pui Isarelax khankix kawx mawh pa ang nyang pat hak daux rhawm tix heue.”