1 Ka daux num kwang simiang Zedekix ka haktiex dim num, daux khix kao, Nebukhaneza simiang Babulon mai cub kru naing nawh khankix, hoek puing ka veng Yerusaliem mai lai lawm ka veng an heue. 2 Ka daux num kwang Zedekix ka haktiex daux kao tix num, khix pon dim ngaix veng hoik laux heue. 3 Khaix an cao kaing simiang Babulon khankix hoek bleeh mai laig ngawm ka daux siviex veng pa koe sigreung mai cao kaing khankix mawh Neragala Shareza, cao kaing naing vaig mai Samagara Nebaw mai Sarasekhim, cao kwang bun daux nyiex haw mai Rabasarix, cao kaing ting mai Neragala Shareza, cao kwang plak pingnya mai Rabamaga, cao kaing naing ting khankix, tau mai cao kaing simiang Babulon khankix heue. 4 Mawh kheu nan, yam hoik yaox Zedekix simiang Yudax mai pui naing nawh ka pui khankix, kix hoik to mai lih hu khaing veng plak ponsawm, ka krax sipeem simiang ka diang siviex pa koe sinax guh veng ra mu heue. Lih hu ka plak lung Yawdan heue. 5 Viang mawh nan, pui naing Khaladie khankix hawt khaix kix mai krup Zedekix, ka daux lung Yerikho heue. Yam hoik giex kix ka nawh, kix viex nawh hoek ka Nebukhaneza, simiang Babulon ka veng Ribalax daux haktiex Hamat mai simiang Babulon prawng ca ka Zedekix heue. 6 Khaix an simiang Babulon hoik pah ka kawn simex Zedekix khankix ka plak sivoe ngai nawh, ka daux veng Ribalax, simiang Babulon baox deeh pah ka pui ting lhaong Yudax khankix heue. 7 Khaix an nawh koh sok ngai Zedekix mai baox phyawk nawh ka maox tawng lheung, sonsang viex nawh hu ka veng Babulon heue. 8 Pui Khaladie khankix hoik gleeing ka nyiex haw simiang mai nyiex pui meung ka ngu mai yieh ti tik guh veng, veng Yerusaliem heue. 9 Khaix an Nebuzaradan cao kaing naing piang pui naing pa pau simiang khankix hoik rhim tix viex pui pa kawn deuk ka daux veng khankix, khawm pui pa hoik blak tix hoek ka plak nawh mai pui pa goh khankix, hu mawh pa giex laung tix ka daux veng Babulon heue. 10 Yam an Nebuzaradan cao kaing naing piang pui naing pa pau simiang khankix, hoik prah pui hot sibhawm khankix, pa ang lai koe kraung koe sinngao tix ceu kawx ka daux meung Yudax mai nawh hoik tawx kix cie sipeem plix siiet khankix mai gwang kaung khankix yam an heue.

11 Yam an Nebukhaneza simiang Babulon tawx lox tix son grawng pa dex dawd mai Yeramix ka Nebuzaradan cao kaing naing piang pui naing pa pau simiang ah nin, 12 “Teei Yeramix mai kia ngien ka nawh mai paw yuh krax kha rhawm ka nawh, yuh awm pa ah nawh ka maix heue.” 13 Mawh kheu nan, Nebuzaradan cao kaing naing piang pui naing pa pau simiang khankix, ploi Nebushaban, Rabasarix, Neragalashareza, Rabamaga mai cub cao kaing ting simiang Babulon khankix, 14 khaix an, kix ploi pui hu kok Yeramix khaing daux biang nyiex thawng mai ap nawh ka Gedalix kawn simex Ahikam, pa mawh kawn simex Shapham, sonsang deeh tawx nawh ing ka nyiex heue. Mawh kheu nan, Yeramix yaox ti ot tau mai pui haktiex khankix heue. 15 Yam an gumlox Siyiex hoek ka Yeramix, yam kawn laung nawh ka biang nyiex thawng ah nin, 16 “Hu krai ka Ebedameliet pui Ethiopia, ah nin, Siyiex Cao kru naing raoma, pa mawh Siyiex ceu pui Isarelax ah nin, jhak heue, Aux tak sang viex gumlox ceu pa caox grum naog piang veng in mai ang mawh lox koe bwanson mai pa mhawm mai an tak sang mawh pa grum naog ka plak sivoe ngai maix ka daux singaix an heue. 17 Viang mawh nan, Siyiex ah nin, Aux tak sang deeh taoh maix khaing ka daux singaix an, maix tak ang hoek ka daux tawm taix pui khankix pa lhat graung maix ka heue. 18 Mawh kheu Aux tak sang taoh ka maix tete mai maix tak ang yum ka lawm vaig heue. Viang mawh nan, ju maix tak sang mawh pa awm kraung pa pon rhim ti teei, mawh kheu een maix rhawm tix ka Aux, Siyiex ah nin heue.”