1 Lheu khaing an, gumlox Siyiex hoik hoek ka Yeramix ra bawg tix bawg, yam kawn laung nawh ka daux biang thawng ah nin, 2 “Siyiex Cao pa yuh ka haktiex, Siyiex Cao pa phan ti deuh an, sonsang mawh pakpeung mai ceu kaux Siyiex pa mawh Yahowa ah nin, 3 kok ka Aux mai Aux tak deeh pawk ka maix, Aux tak sang jhi maix yaox ceu pa kied ting mai ceu pa kied raux pa ang maix doh tawng ka heue. 4 Grawh grawng nawh, Siyiex pa mawh Siyiex ceu pui Isarelax ah nin, son grawng pa dex dawd mai nyiex pa koe daux veng in khankix mai nyiex simiang meung Yudax, pa hoik dawg jiieh laux, khawm ka nyiex tab pau guh veng pa hoik lai lawm ti yuh laux ka lawm vaig khankix, 5 kix hoek ti puing ka pui Khaladie, viang mawh nan, kix hoek ngie ti kieh tokaux yum tix khankix naog ka daux nyiex, pa hoik pah Aux kix yum daux krax pa song rhawm tix, kheu grawng pa caox yuh kix Aux hoik mox pakngai khaing veng in heue. 6 Jhak heue, Aux tak sang viex krax pa nyawm ot siu koe hoek ka veng in, sonsang moi nawh, Aux tak sang pai kix mai deeh jhi kix yaox krax gaux rhawm pa ang jud jai, krax pa nhim mai pa mawh meh heue. 7 Aux tak sang kieh pui Yudax pa hoik giex laung khankix hoek mai sang deeh sum kix awm phao voe heue. 8 Aux tak sigrhah ka phimap krax lud pa yuh kix khawmuik mai Aux tak pluat ploi phimap pa lud kix khawmuik mai pa tieh feen kix ka Aux heue. 9 Khaix an Aux tak sang kieh veng an lih ti koe pa gaux rhawm pa yaogyaw mai krax pa koe min plakngai ka plak sivoe ceu pui pa koe piang haktiex khawmuik mai pui tak sang mhong can ceu pa mhawm pa yuh Aux ka kix khawmuik, lhat graung mai sikua rhawm, ka pa mhawm mai krax haok hwan ting lhaong pa hoik tawx Aux ka kix heue. 10 Siyiex ah nin, pa ah pex ka dee in, pa mawh dee ang pui lai ot, dee ang totiag lai koe mai dee hoik grham pui yi, ka daux veng Yudax mai ka daux krax veng Yerusaliem khankix mawh dee pa yiien mai dee ang pui koe mai dee ang pui ot lai koe mai dee ang totiag khankix lai koe. 11 Khaix an tak mhong lox gaux rhawm mai lox nyawm rhawm, lox simex sang yuh ka paox mai lox bun sang yuh ka paox mai lox pui pa sang ah nin, Ref 33:11 1 Chr 16:34; 2Been 5:13, 7:3; Eza 3:11; Ps 100:5, 106:1, 107:1, 118:1, 136:1“Yaogyaw ka Siyiex Cao kru naing raoma, grawh grawng nawh, Siyiex mawh pa mhawm mai krax caux rhawm Nawh Cao kaux cong leeing ju, mai lox pui pa sang viex krax tan pa appong krax pa yaogyaw ka daux nyiex bwan Siyiex heue. Grawh grawng nawh, Aux tak sang kieh pui pa giex laung daux haktiex an khankix deeh hoek mai ot awm phao voe Siyiex ah nin heue. 12 Siyiex Cao kru naing raoma ah nin, “Ka dee in pa mawh dee pa yiien pui, ang lai koe pui mai ang lai koe totiag mai ka daux veng khawmuik, tak sang mawh dee ot dee koe cao liang yung, sonsang kieh phung yung ti it tan heue. 13 Ka daux veng pa koe piang gawng lua, ka daux veng pa koe ka daux lung, ka daux veng pa koe haktiex plak seh, ka daux haktiex Benyamin, ka haktiex pa koe rawb veng Yerusaliem mai ka daux veng greem tawm taix cao pa simin yung khankix, Siyiex ah nin heue. 14 Siyiex ah nin, jhak heue, baux singaix bawg yam tak sang hoek, yam sang yuh Aux ceu pa mhawm awm lox sijax pa deuh ka nyiex ma ceu pui Isarelax mai ka nyiex ma ceu pui Yudax khankix.Ref 33:14-16 Ye 23:5-6 15 Ka daux singaix bawg yam an, Aux tak kieh kak khaox pa rahsee lih glaoh ka son Davit, nawh tak sang prawng ca ka haktiex ka daux pa rahsee heue. 16 Ka daux singaix an, haktiex Yudax tak sang hoek krax taoh mai veng Yerusaliem tak sang yaox ti ot yiien yawg mai in mawh min ceu kaux pa sang kok ka veng an mawh “Simiang Siyiex mawh pa rahsee ex.” 17 Grawh grawng nawh, Simiang Siyiex ah nin, doeh ru Davit pa sang ngawm piang dang ngeung nyiex ma ceu pui Isarelax tak ang chix jud jai,Ref 33:17 2 Sam 7:12-16; 1 Kgs 2:4; 1 Chr 17:11-14 18 Ka daux ceu pui Lewix khankix cao giex kaing li pa sang gleeing tix tawx krax tan pa gleeing ka plak sivoe Aux, khawm krax tan phawng nghox ca im mai krax tan pa appong tak ang jud jai heue.”Ref 33:18 Si 3:5-10

19 Gumlox Simiang Siyiex hoek ka Yeramix ah nin, 20 “Siyiex ah nin, phan pex yieh ka gumlox sijax mukheu pa deuh Aux son pon singaix mai gumlox sijax mukheu pa deuh Aux son ponsawm, sonsang ang plak pon singaix mai plak ponsawm lai khaw ka daux bawg yam praix klawng, 21 Khaix an gumlox sijax mukheu pa deuh Aux ka kawn tix Davit tak sang yieh laux, tak ang lai koe doeh ru pa sang ngawm piang dang ngeung nawh mai pui Lewix cao giex kaing li mai pui pa yuh kaing jhaw Aux khankix tak jud heue. 22 Awm ang pon simin ka kraung can pa koe daux raoma mai awm ang pon tiag tong ti yaox ka mhaik rawm sigrit sigra khankix, mawh kheu nan, Aux tak sang baox nie kieh doeh ru kawncau Aux Davit mai pui Lewix pa yuh kaing jhaw Aux khankix haoh hun heue.” 23 Lheu khaing an, gumlox Siyiex hoek ka Yeramix ah nin, 24 Mawh ang pex sax keud ti yaox ka lox pa krai pui khankix pa ah nin lie? Siyiex hoik tik vud ka doeh nyiex ma pa hoik laug Nawh Cao ra cub, mawh kheu nunai kix ka ceu pui Aux, kix tak ang lai yaox tix mawh ceu pui ka plak sivoe ngai kix heue. 25 Siyiex ah nin, phan gumlox sijax mukheu Aux ang mawh pa koe son pon singaix mai son ponsawm mai phan Aux ang lai deuh been koe son raoma mai haktiex khankix, 26 khaix an, Aux tak tik vud ka doeh ru Yakop mai kawncau Aux Davit mai ang lai laug ka doeh ru nawh, mawh cao pa kwang piang doeh ru Abraham, Icak mai Yakop heue. Grawh grawng nawh, Aux tak deeh viex pui pa giex laung khankix deeh hoek mai Aux tak koe krax caux rhawm piang kix heue.”