1 Khaix an gumlox Siyiex hoek ka aux ah nin, 2 Khaix an Siyiex ah nin, “Hu mai kok yo ka veng Yerusaliem sonsang mhong kix ka, Aux doh keud ka krax caux rhawm yam awn ju maix, krax moh pa dex dawd yam mawh nyiex ma khraox, yam hawt hu maix khaix Aux daux tiagtu, ka haktiex pa ang nyang rhuat nyang sum heue. 3 Ceu pui Isarelax mawh pa singax singeh son Siyiex mai mawh plix num pa nie haok hwan cie Nawh Cao heue. Siyiex ah nin, can pui pa yuh kix laux leeing, tak mawh pa lud mai krax laux leeing tak hoek piang kix heue.” 4 Nyiex ma ceu pui Yakop mai doeh ru pui Isarelax khankix eue, nghiet ka gumlox Siyiex heue. 5 Siyiex ah nin, “Mawh hoik yaox keeing pex khankix phimap ceu tix ka daux Aux mai lih hu dee singai khaing Aux mai hoik hoek hu krub riang grang khankix pa mawh riang rao pa giex going lie?” 6 Kix ang sax ah nin, mawh ot Siyiex dee mawx lie? Siyiex pa hoik viex ex lih khaing daux meung Ejiptux, pa thong ex daux tiagtu, ka daux tiag mhaik, ka daux tiex khankix, ka daux tiex kroh groing mai ka daux veei krax yum, ka haktiex ang pui tix kaux kawx pon lailing ka mai ang koe pui ot ka dee an tix kaux kawx heue. 7 Aux hoik viex pex laig ka daux haktiex dee pa kied nyawm tix ot, sonsang yaox pex tix ih plix nawh mai bee pa mhawm nawh khankix heue. Viang mawh nan, yam hoik laig pex, pex yuh haktiex Aux mawh pa caox caig mai hoik yuh sinngao Aux mawh pa seeing brai heue. 8 Cao giex kaing li khankix ang sax chawk ah nin, koe Simiang dee mawx lie? pui pa giex lox tat jawm prawng khankix ang tawng ka Aux, cao thung bung khankix hoik lud ka Aux mai cao jhai khankix krai lox jhai pa ang mawh ang meh khaing Balax mai hawt khaix ceu pa ang koe bwanson heue. 9 “Mawh kheu nan, Siyiex ah nin, Aux tak sang viex grawng see an khankix hoek piang pex, piang kawn, kawn praix pex khankix heue. 10 Tiang ka plak klawn tiex Saiparat mai jhak ti yaox, ploi pui hu ka haktiex Keda mai bre keud ti yaox mhawm mhawm mai kia ti yaox mawh hoik sax koe ceu pa awm in lie? 11 Mawh hoik sax tieh loh ceu pui khankix ka siyiex tix, pa ang tie mawh siyiex lie? Viang mawh nan, pui Aux khankix hoik loh min plakngai tix ka siyiex pa ang koe bwanson heue. 12 Siyiex ah nin, “Raoma khankix eue, kieh koe pa daox deng ka in mai kieh koe krax sikua rhawm lhat graung mai kieh koe krax pa lhat graung tom pruh hauk haw tix heue. 13 Grawh grawng nawh, pui Aux khankix hoik yuh phimap pa caox ra ceu, kix hoik tik vud Aux pa mawh dee lih rawm im ju mai hoik kaong ka rawm dung pa chix grhup chix bhieh son tix tom ang rawm chix dung chix nien ka heue.” 14 “Mawh mawh Isarelax siliex? Mawh nawh siliex pa keh daux nyiex lie? Mawh kheu patix nawh lai yaox tix mawh pa rhim ti teei ka lie? 15 Sivai sangsi awn ju khankix hoik brawh ka nawh mai riag yo lox tix sinum, kix hoik yuh haktiex nawh laux leeing, veng nawh khankix kawx hoik gleeing tom ang pui lai chix ot ka heue. 16 Pui veng Nawphax mai pui veng Tapaniet khankix kawx, hoik raig mhok khri max khaing kaing maix heue. 17 Mawh kheu tik vud maix ka Siyiex Cao pa thong maix ka krax, jao an ceu in hoik hoek piang tokaux maix ang mawh lie? 18 Yam in maix lai hu krax plak meung Ejiptux, sonsang nyaux rawm klawng Nilax yuh ka mawx lie? Phan ang mawh nan maix lai hu krax plak haktiex Asurix, sonsang nyaux tix ka rawm klawng Ufrethix yuh ka mawh lie?” 19 Siyiex Cao kru naing raoma ah nin, “Krax pa caox caig maix tak mawh pa deeh sidiex maix, krax pa tieh feen maix tak dee tawx phimap ka maix heue. Mawh kheu nan, kieh maix tawng mai yaox ka ceu an mawh ceu pa caox mai ceu pa kied song, mawh kheu hoik tik vud maix Siyiex tix mai krax lhat graung ka Aux ang koe ka daux maix heue.” 20 Ka daux bawg yam an dix, Aux hoik raig khaox glawm maix pot mai hoik yah ti tik ka ceu pa phyawk ka maix khankix mai maix hoik ah nin, “Aux ang yuh pa lud, viang mawh nan, pex hoik lud hoik vao mai bun coh kaux piang gawng lhaong ku gawng mai greem pang khaox klai khankix ku pang heue.” 21 Viang Aux hoik sum maix mawh nhu plix siiet pa kied mhawm mai simie pa ciied pa mhawm kawx maix lai veeh tix hu khaing sivoe Aux, ka daux pa lih ti mawh nhu plix siiet pa ang lai ciied lai mhawm yuh ka mawx lie?” 22 Simiang Siyiex ah nin, “Viang maix heem tokaux tix ka rawm nyaox pa jawg tix ciied mai shiao sidah khoek khankix tom nie kawx, viang mawh nan, krax lud maix hoik sidawng ka plak sivoe Aux heue.” 23 Maix sang pon ah, “Aux ang seeing brai mai aux ang hawt khaix siyiex Balax yuh ka mawx? Jhak ka khaix maix ka daux lung, doh keud ka ceu pa hoik yuh maix, maix mawh kala uk khaing pa kied phai pa vung vang tix hu jee hu blaong krax hu tix heue. 24 Awm miex la iak pa vung vang ka daux tiag mai hawt ngheet jee blaong yam hoek rhawm kraing rhawm he nawh, mawx pa pon tiebtie ka lie? ang lai shiao yuh tix tawx sonsang rawg kah, yam hoik naog bawg yam, kix tak yaox ka heue. 25 Paw kieh caong maix jud khaing pa ang tix ceep kiiep mai paw kieh ghok maix jud khaing krax pa sang nyaux nie rawm heue. Viang mawh nan maix hoik ah nin, krax keud pot jun pot ang koe, pon ang lai koe heue. Mawh kheu Aux hoik moh ka siyiex pui tang kaux tang hak mai aux hu hawt khaix kix heue. 26 “Awm kaig cao briex yam pon giex pui ka nawh, awm an nyiex ma ceu pui Isarelax khankix tak kaig tua, khawm tokaux kix mai simiang kix mai kawn laux kawn simiang kix mai khawm cao giex kaing li kix mai khawm cao jhai kix, 27 Maix ah nin ka num khaox, Maix Cao mawh keeing aux mai maix ah nin ka simaox, Maix Cao hoik keh ka aux heue. Mawh kheu kix hoik ghaix blawg tix ka Aux mai ang veeh pakngai tix ka Aux heue. Viang mawh nan, yam yaox kix krax kha rhawm mai kix ah nin, “kaoh mai taoh ka yix liak.” 28 Mawh kheu nan, siyiex pa hoik yuh maix son tokaux tix koe dee mawx lie? Phan kix pon taoh ka maix kieh kix kaoh mai taoh ka maix yam yaox maix krax pa kha rhawm heue. O meung Yudax eue, koe veng maix haoh hun miex ding, siyiex maix kawx haoh hun awm an heue. 29 Siyiex ah nin, “Mawh keud pex tix sang pon bwanson ceu patix mai hoek yuh see ka Aux lie? Pex khawmuik hoik tieh feen mai lud ka Aux heue. 30 Aux hoik sivied mai sidiex ka kawn praix pex khankix hoik mawh pa giex going heue. Kix ang rieb ka pa sidiex gau Aux heue. Pex hoik yuh cao giex kaing li tix laux leeing ka lawm vaig tix awm grang sivai sangsi ka totiag heue. 31 Ceu pui khankix eue, keud ti yaox ka gumlox Siyiex mawh hoik sax mawh Aux daux tiagtu son pui Isarelax, phan ang mawh nan, meung pa faik lie? Kheu pui Aux khankix lai ah nin, ex hoik pon hu kudah dee mai tak ang lai hoek ka Maix Cao khaix in pie tix bawg kawx heue.” 32 Mawh sang piawm bunkrih pa singax ka kraung ceep pa hoik khre rien tix, phan ang mawh nan, bunkrih pa sang yuh ka paox ka maox rawd nyoi tix lie? Viang mawh nan, pui Aux khankix hoik piawm ka Aux bawg yam singaix tom nie pa ang lai uik simin ka heue. 33 Kheu maix lai yuh beenli daux krax cao tix sonsang sawg ka paox moh tix lie? Mawh kheu nan maix hoik gau ka bun pa caox caig khankix ka daux krax tix heue. 34 Ka piang sibex lang jung maix kawx, hoik yaox ka nham pui hot khankix pa ang koe phimap heue. Viang Aux ang sawg ti yaox an tom dee raux dee mox kawx, viang mawh nan, hoik sidawng piang kraung ceep maix heue. 35 Viang yuh nan maix kawn ah nin, ‘Mawh kheu mawh aux pui pa ang koe phimap, krax pa song rhawm Maix Cao tak veeh khaing aux tete heue Jhak heue, Aux tak veeh krax prawng krax ciyang Aux hoek piang maix, kheu jao ah maix nin Aux ang koe phimap heue.’ 36 Kheu jao patix maix lai vung vang tix hu kudah dee sonsang tieh loh maix daux krax hu ti yuh ka mawx lie? Maix tak kaig tua ka meung Ejiptux, awm hoik kaig tua maix ka haktiex Asurix heue. 37 Maix tak yaox tix lih hu khaing haktiex an, tau mai pa deuh maix taix tix piang kaing tix, mawh kheu Siyiex hoik thiang ti tik ka ceu an pa een maix rhawm tix mai maix tak ang koe krax haok hwan kheu kix heue.”