1 Gumlox Siyiex, hoek ka Yeramix ah nin, 2 “Yaog tix kaoh mai lih hu ka nyiex cao yuh aw tiex mai aux tak kieh maix mhong gumlox Aux tan heue. 3 Khaix an aux lih hu ka daux nyiex cao yuh aw tiex mai nawh ot sivoe aux mai yuh aw tiex ka ling yuh aw heue. 4 Aw tiex pa yuh ka glaox hoik laux daux tawm taix cao yuh aw, mawh kheu nan, nawh hoik deeh baox yuh aw tiex tang mu tix bawg, awm keud cao pa yuh aw mawh yuh ka mawx, nawh yuh awm an heue.” 5 Khaix an gumlox Siyiex hoek ka aux ah nin, 6 Siyiex ah nin, Ref 18:6 Ro 9:21“Nyiex ma ceu pui Isarelax khankix eue, Mawh ang Aux pon yuh ka maix awm cao pa yuh aw in lie?” Nyiex ma ceu pui Isarelax khankix eue, “Jhak heue, awm koe glaox ka daux tawm taix cao pa yuh aw, pex kawx koe ka daux taix Aux heue. 7 “Yam mawx ang ah, son grawng haktiex tidauh mai son grawng meung tix meung Aux pon reeig ti tik, yieh mai yuh laux tix taix neh heue. 8 Phan meung haktiex pa krai aux an, deeh veeh khaing pa caox caig yuh tix, Aux tak sang deeh tieh krax pa laux leeing pa keud aux tix sang viex piang kix mai ang lai kieh hoek piang kix heue. 9 Yam mawx ang ah, son grawng haktiex tixdah mai son grawng meung haktiex tix meung Aux pon sum mai pon khre rien ka tix taix neh heue. 10 Phan meung haktiex an yuh ceu pa caox caig ka plak sivoe ngai Aux mai ang cu nghiet ka lox Aux, khaix an Aux tak sang deeh tieh bwanson ceu pa mhawm, pa hoik ah Aux ti deuh mai Aux tak ang lai tawx ka kix heue. 11 Mawh kheu nan, yam in, krai ka pui meung Yudax mai ka pui pa ot ka daux veng Yerusaliem khankix ah nin, Siyiex ah nin, Jhak heue, Aux yuh krax pa laux leeing tix ceu mai keud ti yuh grawng tix ceu piang pex heue. Deeh veeh khaing pa caox yuh tix ku kaux daux pui yam in mai yuh daux krax hu pex mai kaing pa yuh pex khankix mawh pa mhawm heue.”

12 Kix ah nin, “Ang ex lai koe krax keud pot jun pot, mawh kheu nan, ex tak sang hu awm pa koe rhawm cao ex khankix mai ex tak yuh ka daux krax pa caox ku kaux daux pui heue.” 13 Mawh kheu nan Siyiex ah nin, “Chawk ti yaox ka daux pui tang ceu, mawh pui mawx pasax mhong ka ceu inkix lie? Bunkrih ceu pui Isarelax khankix hoik yuh ceu pa kied seeing kied brai heue. 14 Mawh sang that rawm rha pa koe ka gawng Lebanon, khaing rang pa koe daux lung an lie? Mawh sang hit rawm klawng sikiied lih hu pa kaoh khaing gawng an lie? 15 Mawh kheu hoik piawm pui Aux khankix ka Aux, kix hoik gleeing nyawng bhawng ka riang rao pa giex going khankix heue. Kix kieh tokaux tix sideeing ka daux krax hu tix, pa dawg koe tom dix mai hu daux krax pa iak pa ang pui lai cox lhop tiex ka, 16 mawh kheu nan, kix kieh haktiex tix mawh dee pa yiien mai mawh dee pa sibriem pui sijeeng, pui pa lailing hawt baoh an ku kaux tak daox deng mai vuh vied kaing tix ka heue. 17 Aux tak kieh prung prang awm bhaung khaing plak lih singaix ka plak sivoe pui koeng, singaix yaox kix krax kha rhawm Aux tak jhi kix yaox plak blawg tix mai ang jhi kix yaox ka plakngai tix heue.”

18 Khaix an kix ah nin, “Hoek mai kieh ex keud grawng pa sang yuh tix ka Yeramix, mawh kheu nan, gumlox tat jhawm prawng ang lai grai khaing cao giex kaing li mai krax keud ang grai khaing pui koe pingnya cuyi mai lox jhai ang chix grai khaing cao jhai, hoek mai kieh ex puing nawh ka dak tix, paw lai kieh ex nghiet ka lox pie tix gum kawx heue. 19 Siyiex eue, kia ngien ka aux mai nghiet maix mhong ka lox pui pa yuh krax pa simah simiang ka aux heue. 20 Mawh khaw tix vied pa caox ka son pa mhawm lie? Mawh kheu kix hoik kaong daux son ju aux heue. Doh keud ka hoik cung aux ka plak sivoe Maix Cao, sonsang krai lox ceu pa mhawm son kix mai sonsang veeh Maix Cao ti tik krax pa meet rhawm tix luan khaing kix heue. 21 Mawh kheu nan, ap kawn praix kix ka pa sibhawm praix mai ap kix ka sibrawm lawm vaig, kieh moeng kix mawh miexmai mai kieh kawn praix kix yum heue. Kieh pui pah ka pui ting kix yum mai kieh pui awn ju kix yum ka lawm vaig daux naing heue. 22 Yam viex Maix Cao kru naing pui koeng hoek sijaox ka dee ot kix kieh mhong lox riag yo khaing daux nyiex ma kix, mawh kheu hoik kaong kix daux tiex, sonsang giex tix aux mai mox tix taong jhawk ka caong aux heue. 23 Siyiex eue, Maix Cao tawng krax pa keud kix piang aux khawmuik, sonsang pah ka aux heue. Paw lai pluat ploi ka pa lud kix mai paw preet ka phimap kix khaing plak sivoe ngai Maix Cao, yuh awm in ka kix, ka daux bawg yam pa song rhawm Maix Cao heue.