1 Siyiex ah nin ka aux, “Hu mai teei maox rawd nyoi keei tix nyaing son tix mai rawd ka nyoi maix, viang mawh nan, paw sidaux an daux rawm awx.” 2 Mawh kheu nan, aux hoik teei maox rawd nyoi keei tix nyaing awm gumlox krai Siyiex mai rawd ka nyoi tix heue. 3 gumlox Siyiex hoek ka aux ra bawg tix bawg ah nin, 4 “Teei maox rawd nyoi keei pa hoik rawd maix ka nyoi tix an mai yaog ti kaoh hu ka rawm klawng Yufrethix mai mox ti deuh an ka daux doh rang tan heue.” 5 Mawh kheu nan, aux lih hu mai hoik mox ti deuh an hawt rawm klawng Yufrethix awm gumlox pa hoik tawm Siyiex ka aux heue. 6 Khaix hoik luan singaix bawg yam khankix tom nie, Siyiex ah nin ka aux, “Yaog tix kaoh mai hu ka rawm klawng Yufrethix mai teei maox rawd nyoi keei hoek khaing dah dee hoik tawm Aux maix mox tan heue.” 7 Khaix an aux hoik lih hu ka rawm klawng Yufrethix mai kaong ti teei maox rawd nyoi keei an khaing dee hoik mox aux ti deuh tan, maox rawd nyoi keei an hoik rham ang lai chix tix shiao heue. 8 “Khaix an gumlox Siyiex hoek ka aux ah nin, 9 “Siyiex ah nin, awm in Aux tak yuh pa ting rhawm ca nyhau meung Yudax khankix laux mai khawm pa ting rhawm ca nyhau veng Yerusaliem khankix laux heue. 10 Ceu pui caox in pa thiang tix ang nghiet ka gumlox Aux khankix, pa hu awm rhawm keud cao tix mai pa hawt khaix Siyiex tang kaux tang hak khankix, sonsang yuh kix kaing jhaw mai krub ka ankix, tak sang mawh awm maox rawd nyoi keei in, pa ang lai chix tix shiao ka heue. 11 Siyiex ah nin, awm vien maox rawd nyoi tix ka nyoi pui, awm an, Aux tak kieh nyiex ma ceu pui Isarelax mai nyiex ma ceu pui Yudax khankix khawmuik vien tix ka Aux, sonsang pon mawh kix ceu pui Aux mai kieh Aux pon min plakngai, pon krax pa yaogyaw mai pon min sibrawm, viang mawh nan, kix ang lai nghiet heue.

12 Mawh kheu nan maix caw tix krai gumlox in ka kix, Siyiex pa mawh Siyiex ceu pui Isarelax ah nin, “Kawng ku mu tak sang naog ka rawm plix siiet, mai kix tak deeh ah nin ka maix, mawh ang yix kriem tawng, ka sang naog kawng ku mu ka rawm plix siiet lie?” 13 Khaix an maix tak ah nin ka kix, Siyiex ah nin, “Jhak heue, Aux tak kieh pui khankix pa ot ka daux haktiex in, jah ka simiang pa ngawm piang dang ngeung simiang Davit, cao giex kaing li, cao jhai mai can pui pa ot ka daux veng Yerusaliem khankix naog ka ceu pa chix yoek heue. 14 Siyiex ah nin, “Aux tak kieh kix ralai sikleeing paox tix, keeing mai kawn khankix tau, Aux tak ang lai caux rhawm mai ang lai lhawk mai ang lai koe krax pa caux rhawm, tom hoik yuh Aux kix laux leeing heue.”

15 Daong yhaok tix mai nghiet heue, paw koe krax ting rhawm ca nyhau, mawh kheu Siyiex hoik krai ti deuh heue. 16 Sivoe ang Nawh Cao nyang kieh pa faik hoek mai sivoe ang pex nyang sideeing caong tix, piang gawng pa faik khankix mai yam kawn keud pot jun pot pex ka pa riang, sivoe ang Nawh Cao nyang kieh an mawh veei pa yum mai yuh an mawh pa ceep ka pa faik, tawx min sibrawm ka Siyiex pa mawh Siyiex pex heue. 17 Viang mawh nan, phan pex ang cu tix nghiet ka an, khwan ju Aux tak yiiem ka dee glip ka son krax ting rhawm ca nyhau pex, ngai aux tak yiiem sigrien sigre mai roik rawm ngai, kheu jao hoik teei cub phung yung Siyiex hu awm pa giex laung heue. 18 Ah nin ka simiang mai ka laux simiang, “Yeen rhawm tokaux tix tiem mai ngawm heue, mawh kheu mhok khri min plakngai pa mhawm grang maix hoik bheeik khaing kaing maix heue.” 19 Veng pa koe plak seh khankix hoik nyeep tix khawmuik mai pui tix kaux kawx ang lai pon paoh ka, pui Yudax hoik viex kix hu mawh pa giex laung khawmuik, mai hoik mawh pa giex laung khawmuik khawm leeing heue. 20 Yaog ngai pex mai maong ti jhak ka pui pa hoek khaing baoh plak laong heue. Mawh koe cub phung yung pa hoik tawx ka maix mai yung pa mhawm grang maix khankix dee mawx lie? 21 Yam tawx Nawh Cao krax prawng ca ka maix, sang ah maix ka mawx ka lie? Mawh kheu maix hoik gau kix, sonsang mawh cao thung bung mai cao kaing ka piang maix heue. Mawh ang krax saux giex ti deuh ka maix, awm bun pa kha tix yam keh lie? 22 Phan maix ah nin ka daux rhawm tix, “Ceu khankix hoek piang aux, kheu grawng pa yuh ka mawx lie? “Kheu jao pa kied ting phimap maix, kraung ceep maix khankix hoik bheeik khaing maix mai loek caong maix kawx hoik mat ka ang koe kiep ceep heue. 23 Mawh pon pui Ethiopia tix tieh lox hak tix, phan ang mawh nan, mawh pon tieh loh sivai maox preeh tix lie? Phan pon tieh loh tix maix pa koe been meed ti yuh ceu pa caox tak pon yuh ceu pa mhawm heue. 24 Mawh kheu nan, Aux tak sang kieh kix prung prang awm kam, pa taih bhaung pa kaoh khaing daux tiex tug heue. 25 Siyiex ah nin, ‘In mawh nyum pa tiag Aux tix tawx ka maix, kheu jao hoik piawm maix ka Aux mai een rhawm tix ka ceu pie lhen heue.’ 26 Mawh kheu nan, Aux tak sang khleeing kraung ceep khankix piang pakngai baoh maix, sonsang sidawng krax kaig tua maix heue. 27 Aux hoik yaox krax seeing brai maix khankix mai lox kraing lox he maix, khawm pa seeing brai maix piang gawng ka daux tiagtu khankix heue. Siyiex eue, maix tak kha rhawm heue. Mawh kawn sang rheung miex grheung sonsang kieh maix tokaux tix singax singeh lie?”