1 Gumlox pa kaoh khaing Siyiex hoek ka Yeramix ah nin, 2 “Nghiet ka gumlox sijax mukheu in mai hu krai ka pui haktiex Yudax mai ka pui pa ot ka daux veng Yerusaliem khankix; ” 3 ah nin ka kix, Siyiex pa mawh Siyiex ceu pui Isarelax ah nin, “Kieh pa jhax lawg hoek ka pui pa ang cu nghiet ka gumlox sijax mukheu in khankix, ” 4 pa tawm Aux ti deuh ka keeing pex, ka daux singaix yam viex Aux kix lih khaing daux meung Ejiptux, khaing daux glah taox ngu rhiem, daux pa hoik ah nin, ‘Cu nghiet ka lox Aux mai yuh awm pa tawm Aux ka pex; mawh kheu nan, pex tak mawh pui Aux mai Aux tak mawh Siyiex pex,’ 5 sonsang grum naog gumlox pa hoik tiextu Aux ti deuh ka keeing pex, sonsang tawx haktiex dee lih rawm teeih mai rawm hia ka kix, awm pa hoik mawh ka daux singaix heue.” Khaix an aux deeh pawk ah nin “Siyiex eue, Amen.” 6 Khaix an Siyiex ah nin ka aux, “Krai pao ka gumlox in khawmuik, ka daux veng Yudax mai ka daux krax daux laux veng Yerusaliem khankix ah nin, nghiiet ka gumlox sijax mukheu in mai hawt ti yuh heue.” 7 Grawh grawng nawh, Aux hoik kied tawx satix ka keeing pex, ka daux singaix yam viex Aux kix lih khaing meung Ejiptux tom hoek ka daux in singaix, Aux hoik kaoh caocao mai tawx satix ka kix ah nin, “Cu ngiex ka lox Aux heue.” 8 Viang yuh nan kawx, kix ang cu ti nghiet mai ang daong yhaok tix ka, viang mawh nan, pui ku kaux hoik tang hu ka daux krax pa koe rhawm keud cao tix, mawh kheu nan, Aux tak viex gumlox sijax mukheu in khawmuik hoek piang kix, ka pa hoik tawm Aux kix yuh mai ka pa ang kix cu ti yuh khankix heue. 9 Siyiex ah nin ka aux, “Grawng pa sang yuh pa tieh feen hoik yaox ka daux sinax pui Yudax mai pui pa ot ka daux veng Yerusaliem khankix heue.” 10 Kix deeh veeh tix ing plak khaix ka pa lud yuh tax du kix pa thiang ti tik ka gumlox Aux mai ang nghiet mai kix lih hu hawt khaix siyiex tang kaux tang hak sonsang yuh kaing jhaw kix heue. Nyiex ma ceu pui Isarelax khankix mai nyiex ma ceu pui Yudax khankix hoik lieh ka gumlox sijax mukheu Aux, ka pa hoik yuh Aux ti deuh tau mai keeing kix heue. 11 Mawh kheu nan, Siyiex ah nin, “Jhak heue, Aux tak sang viex krax kha rhawm hoek piang kix, ka pa ang kix lai pon klawd mai viang kix riag yo ka Aux kawx, Aux tak ang nghiet ka kix heue. ” 12 Khaix an pui veng meung Yudax mai pui pa ot ka daux veng Yerusaliem khankix tak sang hu mai riag yo ka Siyiex an khankix, ka pa tan kix ti tawx nyawng bhawng heue. Viang mawh nan, ankix ang pon taoh ka kix yam yaox kix krax pa kha rhawm heue. 13 Meung Yudax eue, awm koe carang veng pex miex ding, siyiex pex khankix kawx koe ding an mai awm koe carang krax veng Yerusaliem miex ding, pex kawx hoik sum ti deuh khu dee tan ding an ka ceu pa kaig tua pa sang gleeing ti nyawng bhawng ka siyiex Balax heue. 14 Mawh kheu nan, paw rawg bwan son ceu pui in, paw riag yo mai paw rawg bwan ka son kix, mawh kheu Aux tak ang lai nghiet lox kix, ka daux bawg yam kok yo kix ka Aux, yam yaox kix krax kha rhawm heue. 15 Paox moh dud aux hoik yuh kaing ceu pa seeing brai tau mai pui tom nie maix khex kawn sang keung mai nyiex bwan Aux yuh ka mawx? Nex nham pa singax hoik singai khaing maix, yam yuh maix ceu pa caox khankix maix koe krax gaux rhawm ka heue. 16 Siyiex hoik kok ceu kaux maix mawh khaox Sanlun klai pa mhawm grang mai pa kied mhawm plix heue. Nawh Cao hoik gleeing khaox an ka ngu pa kied sinum cap mai ka kak nawh khankix hoik pot hoik proe heue. 17 “Grawh grawng nawh, Siyiex Cao kru naing raoma, pa hoik sum ti deuh maix, hoik kieh pa caox hoek piang maix, mawh kheu nyiex ma ceu pui Isarelax mai nyiex ma ceu pui Yudax khankix hoik yuh ceu pa caox caig mai so krax song rhawm Aux lih ka daux krax tan nyawng bhawng ka siyiex Balax heue.”

18 Siyiex hoik tawx aux koe krax pa tawng yung ka mai Aux tawng ka, mawh kheu Maix Cao hoik jhi aux yaox ka pa yuh kix heue. 19 Aux hoik awm kawn yung pa nge tix mu, pa hoik viex ti hu sonsang pah yum mai aux ang tawng, ka grawng pa sang yuh kix piang aux, ka daux krax pa ah nin, “Kieh ex yuh pang khaox an, khawm plix nawh khankix laux leeing mai kieh ex tat ti tik nawh lih khaing daux haktiex ot ceu pui pa im ju khankix, son ang lai sang doh keud ka ceu kaux nawh khaix in pie tix bawg kawx heue.” 20 Viang mawh nan, Siyiex Cao kru naing raoma eue, Maix Cao prawng see ka daux pa mawh meh mai pa cheuk ti yaox rhawm mai rhawm keud kawn pui khankix kieh aux yaox krax pa pawk Maix Cao bix tix piang kix, mawh kheu aux hoik jhi grawng see pa koe aux ka Maix Cao heue. 21 Mawh kheu nan, Siyiex ah nin ka grawng pui veng Anatot, “Pa sawg ti teei ju aux ka daux pa ah nin, paw krai lox jhai ka daux ceu kaux Siyiex, phan ang mawh nan maix tak yaox tix yum ka daux tawm taix yix heue. 22 Mawh kheu nan, Siyiex Cao kru naing raoma ah nin, jhak heue, aux tak sang ciyang ka kix heue. Pui awn ju khankix tak yum ka lawm vaig mai kawn simex kawn bun kix tak sang yum ka sibhawm praix, 23 mai ka daux kix tak ang lai koe pa deuk tix kaux kawx, mawh kheu Aux tak sang viex krax pa kied kha rhawm hoek piang pui veng Anatot, ka daux num pa ciyang ka kix heue.”