4
Pa Yuh Paox Pie Mai Haktiex
1 Sinax pex krax naing mai krax simah kaoh khaing dee mawx? Kaoh khaing alo nex nham pex, pa koe krax naing sinax kraung pakpeung tokaux tix, ang mawh lie?
2 Pex koe krax lhawk mai ang lai koe, pex teei pui yum mai pex simie ti cie mai ang chix pon, pex koe krax simah simiang mai krax naing, pex ang pon, mawh kheu ang pex rawg heue.
3 Pex rawg mai ang pon, mawh kheu rawg pex pa ang khaw, sonsang shiao ka son alo nex nham tix heue.
4 Pex pa mawh bun pa ang kaux sijax, pa phit vao khankix eue, ang pex tawng pa yuh paox pie, pa dex dawd mai haktiex, mawh ceu pa koeng ka Siyiex lie? Mawh kheu nan pui mawx ang ah, pa yuh paox pie ka haktiex, yuh ti kieh tokaux tix mawh pa koeng ka Siyiex heue.
5 Pex keud ce phuk lai sigang khri pa ah nin, “Khuan Cao pa hoik kieh Nawh ot ka daux ex, mawh pa koe rhawm pa sang ghoing kah lie?” Pa ah nan mawh pa giex going lie?
6 Nawh nie blon tawx bwanson heue. Mawh kheu nan phuk lai sigang khri ah nin, “Siyiex tieb tie ka pui ting rhawm ca nyhau khankix, Nawh tawx bwanson ka pui pa tiem rhawm khankix heue.”Ref 4:6 Kab 3:34.
7 Mawh kheu nan pex cu nghiet ka Siyiex, viang mawh nan tiebtie ka phicaox mai nawh tak to hu khaing pex heue.
8 Greed tix hoek dex ka Siyiex mai Nawh Cao tak greed tix hoek dex ka pex heue. Pui pa koe phimap khankix eue, kieh taix pex khankix singax heue. Pex pa koe rhawm ra mu khankix eue, kieh rhawm pex singax singeh heue.
9 Kieh koe krax kha rhawm mai krax khi rhawm mai yiiem riag yo heue. Kieh krax nyiah pex deeh tieh ti mawh pa khi rhawm mai kieh krax gaux rhawm pex, deeh tieh ti mawh krax voi rhawm heue.
10 Yuh tokaux pex tiem sivoe Simiang mai Nawh tak yaog pex ting heue.
Paw Prawng Ca Ka Puxaik Tix
11 Puxaik khankix eue, paw krai lox deuh phimap grawng paox tix heue. Kaw pa ah lox deuh phimap ka puxaik, phan ang mawh nan pa prawng ca ka puxaik tix, nawh ah lox deuh phimap ka lox lai beenli mai prawng ca ka lox lai beenli heue. Phan maix prawng ca ka lox lai beenli maix ang mawh pui pa hawt yuh lox lai beenli, mawh cao prawng ca heue.
12 Cao pa tawx lox lai beenli mai cao prawng ca koe tix kaux khaing, pa mawh kaw pa chix taoh mai pa chix yieh yuh laux heue. Maix phex mawh pui pa yuh ka mawx, pa prawng ca ka paox plawg tix?
Paw Yaw Rangdi
13 Pex pa ah, “Singaix, phan ang mawh nan, pasax, ex tak sang hu ka daux veng an mai ot tan tix num mai yuh lai geu sonsang pon rao tix kah,” khankix eue, nghiet ha.
14 Pex ang tawng grawh grawng ceu pa tak sang mawh pasax heue.Ref 4:13-14 Kab 27:1. Ju pex mawh pa yuh ka mawx? Grawh grawng nawh pex mawh awm taox simawg pa sidawng tivud khaing mai deeh grai khaix heue.
15 Mawh kheu nan pex khaw ti ah nin, “Phan Siyiex koe alo, ex tak pon ti im ju mai yuh nin, phan ang mawh nan, yuh nan heue.”
16 Yam in pex yaw rangdi ka daux pa bied tix, ceu pa yaw rangdi ti yuh nan khawmuik mawh pa caox heue.
17 Mawh kheu nan kaw pa tawng ti yuh ceu pa mhawm mai ang yuh ceu an, mawh phimap ka son nawh heue.