2
Tawx Satix Ang Kieh Jhak Ka Pakngai
1 Puxaik aux khankix eue, paw giex ka krax yum rhawm ka daux Simiang ex Yesux Khrit, pa mawh Simiang pa ting min pakngai tau mai pa chix jhak ka pakngai pui.
2 Mawh kheu phan pui tix kaux pa ceep jhup giien khri mai ceep kraung pa jiet mhawm mai phan pui tang kaux tix kaux pa hot pa sibhawm pa ceep kraung pa seeing brai kawx hoek ka daux nyiex sidiex pex,
3 pex nab yam ka kaw pa ceep kraung pa jiet mhawm an ah nin, “Ngawm ka daux dee ngawm pa mhawm tin heue.” pex ah ka pui pa hot pa sibhawm an, “Maix cung tan, phan ang mawh nan, ngawm greem ngot dee deuh aux caong tix heue.”
4 Pex yuh pa tang pa siyox ka daux sinax pex mai lih mawh cao prawng cao ca, pa keud pa caox pa ang mawh ang meh, ang mawh lie?
5 Puxaik pa moh aux khankix eue, nghiet heue, Siyiex hoik laug pui pa hot pa sibhawm plak haktiex, tix kieh kix mawh pa mi pa koe plak krax yum rhawm mai pa pon sin Meung an, pa hoik tawx Nawh lox sijax mukheu ti tawx ka kix pa moh ka Nawh ang mawh lie?
6 Pex hoik nieb thang yuh ka pui hot pui sibhawm heue. Pui pa mi pa koe khankix, mawh pa khin pex mai reu pex hu sivoe dee ngawm ti prawng ca, khankix ang mawh lie?
7 Kix salao ka Ceu kaux pa koe cee, pa hoik kok pex kah, ang mawh lie?
8 Phan pex priex ti hawt lox lai beenli Simiang awm pa koe ka daux phuk lai sigang khri, pa ah nin, “Maix tak moh paox plawg tix,Ref 2:8 Krub 19:18. awm moh maix tokaux tix,” pex hoik yuh mhawm heue.
9 Phan pex jhak ka pakngai pui, pex mawh pa yuh phimap mai lox lai beenli jhi sidawng grawng mawh pex pui pa lheu lox heue.
10 Mawh kheu pui mawx ang ah, pa priex ti hawt lox lai beenli khawmuik mai kawn phit ka tix ceu ngie, nawh lak lih mawh pa phit ka khawmuik heue.
11 Grawh grawng nawh, Kaw pa hoik ah, “Paw phit paw vao,”Ref 2:11 Lih 20:14; Pi 5:18. pa yuh nin kawx baox ah, “paw teei pui yum. ”Ref 2:11 Lih 20:13; Pi 5:17. Viang maix ang phit vao kawx, phan maix teei pui yum mai hoik mawh pa lheu lox ka lox lai beenli heue.
12 Mawh kheu nan pex sikah mai yuh awm pui pa tak sang prawng sang ca ka lox lai beenli pa chix kieh luan heue.
13 Grawh grawng nawh kaw pa ang koe krax caux rhawm, tak ang pon krax caux rhawm yam prawng ca ka nawh. Krax caux rhawm chix pex krax prawng ca heue.
Krax Yum Rhawm Mai Krax Twah Klaung
14 Puxaik aux khankix eue, phan pui tix kaux kaux ah koe krax yum rhawm tix, viang mawh nan ang koe krax twah klaung chix koe bwanson yuh ka mawx, krax yum rhawm an chix taoh nawh lie?
15 Puxaik, phan ang mawh nan, nan tix kaux kaux phan ang yaox ti ceep kraung mai ang kub pa ih son tix ngaix hoik tix ngaix,
16 phan pex tix kaux kaux lai ah nin ka kix, “Hu mhawm mhawm, kieh pex siu mai sak heue.” Maung pa lo kix son tokaux kix kawx pex ang tawx, chix koe bwanson yuh ka mawx?
17 Awm an krax yum rhawm, phan nawh ang koe krax twah klaung, hoik yum ka daux tokaux tix tiru heue.
18 Ha pui tix kaux kaux ah nin, “Maix koe krax yum rhawm mai aux koe krax twah krax klaung,” jhi aux yaox krax yum rhawm maix pa ang koe krax twah klaung mai aux tak jhi maix yaox krax yum rhawm aux, ka pa twah pa klaung heue.
19 Maix yum rhawm grawh grawng pa koe Siyiex tix kaux khaing, pa hoik yuh maix mhawm heue. Phicaox khankix kawx yum rhawm mai siyaung sikua tix heue.
20 Pui pa nieb keud nieb ce eue maix tak chix tawng grawh grawng krax yum rhawm pa ang koe krax twah klaung mawh pa yum lie?
21 Keeing ex Abraham pon pa rahsee kheu krax twah krax klaung pa yuh tix, yam hoik tan kawn simex tix Icak piang khu dee tan ang mawh lie?Ref 2:21 Jah 22:1-14.
22 Ang maix pon yaox grawng krax yum rhawm hoik yuh tau mai krax twah klaung pa yuh nawh mai mawh kheu krax twah klaung krax yum rhawm hoik grum naog grum mhawm lie?
23 Phuk lai sigang khri pa ah nin hoik naog, “Abraham yum rhawm ka Siyiex mai hoik sawn ti mawh pa rahsee son nawhRef 2:23 Jah 15:6. mai hoik kok nawh mawh paox grawm Siyiex heue.”Ref 2:23 2Been 20:7; Isa 41:8.
24 Mawh kheu nan pex pon ti yaox, grawh grawng pui pon ti hoek krax rahsee kheu krax twah klaung pa yuh tix mai ang mawh ngie kheu krax yum rhawm nong nong heue.
25 Awm an Rahap bun pa coh kaux kawx hoik pon pa rahsee ka ceu pa yuh tix, yam rieb nawh ti teei pui cau pui soi ankiex mai ploi kiex hu krax tang nyaing, ang mawh lie? Ref 2:25 Yaw 2:1-21.
26 Grawh grawng nawh awm tokaux pa ang koe khuan hoik yum, awm an krax yum rhawm pa ang koe krax twah klaung kawx hoik yum heue.