1 Gumlox Siyiex lih hoek ka Yolax, kawn simex Petuelax, 2 “Pex pa mawh kuad song khankix eue, nghiet ka lox in, pex pa mawh pui ot ka daux haktiex khankix eue, daong yhaok tix nghiet heue. Mawh hoik sax koe ceu in ka daux baux singaix pex khankix, phan ang mawh nan, ka daux baux singaix keeing pex khankix lie? 3 Krai kawn praix pex mhong ka grawng an, kieh kawn praix pex deeh krai ka kawn praix kix mai kawn praix kix, deeh krai ka baux ju doeh ka khaix heue. 4 Khaix ih sido kai kip, sido nghox deeh ih, pa deuk khaix ih sido nghox, sido hauk mi deeh ih, pa deuk khaix ih sido hauk mi, sido ngai liag ih kah heue. 5 Pui pa nyaux tom yoek tix khankix eue, siduad mai yiiem heue. Pex pa brax nyaux rawm plix siiet khankix eue, riag yo heue, kheu rawm plix siiet pa khien hoik jud khaing daux jheeh pex heue. 6 Grawh grawng nawh ceu pui tix ceu hoik haok bleeh ka haktiex Aux, pa mawh cub pui pa kied ting riang rao mai pa ang lai uik simin, rhang nawh khankix awm rhang sivai sangsiRef 1:6 Jhi 9:8. mai rhang gieb nawh awm rhang gieb sivai sangsi miex heue. 7 Nawh hoik yuh laux leeing ka nhu plix siiet Aux, mai hoik klawh lhox khaox ruh aux, nawh hoik klawh ti tik an plang mai hoik kieh kak khaox khankix mawh pa hoik yuh ti paing heue. 8 Koe pa riag yo awm bunkrih pa hoik rawd nyoi tix ka man chee rhix, son mex nawh pa kawn awn ju heue. 9 Krax tan phawng nghox ca im mai krax tan pa nyaux khankix, hoik jud khaing nyiex bwan Siyiex heue. Cao giex kaing li pa yuh kaing Siyiex khankix, khi rhawm ti yiiem heue. 10 Tong kaung hoik laux leeing, haktiex koe krax khi rhawm, kheu hoik laux nghox, rawm plix siiet pa khraox hoik kroh hoik hit, rawm bee hoik dieh hu heue. 11 Pui pa yuh kaung yuh ma khankix eue, koe pa kaig tua, pa priex rien sipeem plix siiet khankix eue, koe krax yiiem yo mawh kheu nghox ca mai nghox cao khawm simie si-un daux kaung khankix hoik grai grhup heue. 12 Nhu plix siiet hoik kroh, khaox ruh kawx hoik fit mai khaox plix jiang, khaox jhie yaong mai khaox plix kawk tie khawm khaox khankix khawmuik pa koe ka daux tiagtu, hoik fit kroh uik heue. Krax gaux rhawm pui khankix hoik grai hu khawmuik heue.”

13 Cao giex kaing li khankix eue, rawd nyoi pex ka man chee rhix koe krax khi rhawm mai yiiem heue. Pex pa yuh kaing jhaw ka plak sivoe khu dee tan khankix eue, koe krax riag yo heue. Hoek mai ceep man chee rhix it leeing sawm, mawh kheu krax tan phawng nghox ca im mai krax tan pa nyaux mawh pa hoik jud khaing daux nyiex bwan Siyiex pex heue. 14 Pex tat ti deuh singaix pa singax singeh mai twah pa ih, krai pao pawie pa singax singeh, kraix khrawm kuad song mai khawm can pui pa ot ka daux hakiex khawmuik, laig ka daux nyiex bwan Siyiex, pa mawh Siyiex pex mai kok yo ka Siyiex heue. 15 Koe krax kha rhawm ka singaix an heue. Grawh grawng nawh, singaix Siyiex hoik dex heue. An tak sang hoek awm krax pa laux leeing khaing cao pa kied ting sibrawm heue.Ref 1:15 Isa 13:6. 16 Pa ih, hoik jud ka plak sivoe ngai ex ang mawh lie? Krax nyawm rhawm mai krax gaux rhawm hoik tat khaing daux nyiex bwan Siyiex ex ang mawh lie? 17 Simie si-un hoik laux hoik si-um greem lon tiex, nyiex krao hoik laux, sawng nghox hoik jieh kheu hoik fit kroh hu nghox heue. 18 Tobrie khankix kied koe krax kha rhawm cub phung mawie khankix hoik vuvie tix, kheu ang kix yaox dee klai rib, cub phung yung khankix kawx, hoik yaox ti kham geu krax cai rhawm heue. 19 Simiang Siyiex eue, aux kok yo ka Maix Cao, kheu hoik proe ngu biang dee klai rib mai rao ngu hoik gleeing khaox daux tiag khawmuik heue. 20 Totiag daux tiagtu riag yo ka Maix Cao, kheu hoik hit rawm khaing daux klawng mai ngu hoik proe biang dee klai rib khankix heue.