1 Gumlox Siyiex baox hoek ka Yonax ra bawg tix bawg ah nin, 2 “Kaoh, hu ka veng ting Nineve, krai pao awm lox pa hoik tawm Aux ka maix heue.” 3 Mawh kheu nan Yonax kaoh hu ka veng ting Nineve awm gumlox pa hoik tawm Siyiex heue. Veng ting Nineve mawh veng pa kied ting mai veng pa ting ceu mai vieh loe singaix krax heue. 4 Mawh kheu nan Yonax jah ti laig hu ka daux veng tix singaix krax mai pao ah nin, “Khaix hoik luan tixpon ngaix tak sang pluk pliak ti tik ka veng Nineve heue.” Ref 3:4-5 Mat 12:41; Luk 11:32

5 Mawh kheu nan, pui veng ting Nineve khankix yum rhawm ka Siyiex, kix krai pao sonsang twah pa ih, jah ka pui ting tom hoek ka pui iak khawmuik mai ceep ka chee rhix heue. Ref 3:4-5 Mat 12:41; Luk 11:32. 6 Yam hoik mhong simiang veng ting Nineve ka lox satang in khankix, nawh lih khaing dang ngeung dee ngawm tix mai peeik sibex dhah tix mai ceep ka chee rhix ngawm ka daux nyaox heue. 7 Nawh tawx lox hu ka pui pa ot ka daux veng ting Nineve, grawng hoik mawh lox tawm khaing simiang mai pui ting pa ot greem nawh khankix pa ah nin, “Paw doh kieh pui tix kaux kawx mai tobrie pa mawh mawie, yung khankix ih nyaux tix ceu kawx heue. 8 Mawh kheu nan kieh pui ku kaux mai tobrie khankix ceep ka chee rhix mai kieh pui ku kaux sau riang tix rawg bwan ka Siyiex heue. Kieh pui ku kaux tieh loh khaing kaing pa caox caig pa yuh tix mai tik vud ka pa lang teung kin pa yuh nawh ka taix tix heue. 9 Pui mawx pa tawng ka pa sang deeh tieh Siyiex tix mai doh keud mai deeh veeh tix khaing pa song rhawm Nawh Cao mai ang lai kieh ex hoek krax laux leeing?” 10 Khaix an Siyiex hoik yaox kaing pa yuh kix mai hoik tieh loh kix tix khaing pa caox caig yuh tix mai Siyiex deeh tieh loh rhawm rhi tix khaing krax pa ah Nawh ti sang ciyang ka kix mai caux rhawm, Nawh ang lai ciyang heue.