2
Pui Isarelax Ang Koe Krax Cu Nghiet
1 Kawncau Siyiex hoek ka veng Gilagalax mai hu ka veng Bawkhim ah nin, “Aux hoik thung pex lih khaing meung Ejiptux mai hoik viex pex hoek ka haktiex pa hoik tiextu Aux ka keeing pex, Aux ang yieh sijax mukheu pa hoik yuh tix mai pex heue.
2 Pex tak ang pon ti yuh paox pie tau mai pui haktiex in, pex tak yuh khu dee tan kix laux leeing, Ref 2:2 Lih 34:12-13; Pi 7:2-5. viang mawh nan pex ang cu tix nghiet ka lox Aux mai hoik yuh ceu in kheu jao patix?
3 Mawh kheu nan Aux deeh ah nin, Aux tak ang grheu kix lih khaing ka plak sivoe pex, viang mawh nan kix tak mawh kat lawm ka paw pex mai siyiex kix tak mawh kie taong ka son pex heue.”
4 Yam hoik krai kawncau Siyiex lox in ka pui Isarelax khankix, kix riag yo lox ti mai yiiem ka heue.
5 Kix kok ceu kaux dee an mawh Bawkhim mai kix yuh krax tan pa appong ka Simiang Siyiex tan heue.
6 Khaix hoik ploi Yawsux ka pui khankix, pui Isarelax khankix lih hu ka sinngao haktiex pa hoik pon kix ti cie ku cub heue.
Grawng Yum Yawsux
(Yaw 24:29-31)
7 Mawh kheu nan pui khankix krub ka Simiang Siyiex glang yam im ju Yawsux mai kwad song khaix Yawsux, pa hoik yaox ka kaing jhaw pa ting pa yuh Simiang Siyiex khankix kawx krub ka Simiang Siyiex heue.
8 Yawsux kawn simex Nun mai pa mawh siliex Simiang Siyiex hoik yum, yam koe ju tix, tix yieh kao num heue.
9 Kix sipaung nawh ka daux mee haktiex sinngao cie nawh, ka veng Timanat Heriet, Ref 2:9 Yaw 19:49-50. pa koe ka piang gawng Epharem, ka plak laong gawng Gasha heue.
10 Pui pa koe baux ju Yawsux kawx hoik kraix khrawm paox ti ka dee ot keeing kix khankix, doeh ru pa ang tawng ka Simiang Siyiex mai kaing pa hoik yuh Nawh Cao son pui Isarelax khankix lih tix koe khaix kix heue.
Grawng Ang Pui Isarelax Kaux Sijax
11 Khaix an pui Isarelax khankix, yuh pa caox caig ka plak sivoe ngai Simiang Siyiex mai yuh kaing jhaw siyiex Balax,
12 kix tik vud ka Simiang Siyiex keeing kix, pa hoik viex kix lih khaing meung Ejiptux mai hawt khaix siyiex tang kaux ceu pui pa koe hawt vung viang kix mai krub ka siyiex an mai kieh krax song rhawm Simiang Siyiex lih heue.
13 Kix tik vud Simiang Siyiex mai yuh kaing siyiex Balax mai siyiex Ashatariet heue.
14 Mawh kheu nan krax song rhawm Simiang Siyiex hoik lih ka piang pui Isarelax khankix mai Nawh Cao ap kix ka daux tawm taix pui tud rhim mai coh kix ka pui koeng kix, pa ot hawt vung viang kix, tom ang kix lai pon cung tiebtie ka pui pa koeng khankix heue.
15 Viang kix hu dee mawx kawx, taix Simiang Siyiex hoik tawx krax ciyang pa laux leeing ka kix, awm pa ah mai pa tiextu Simiang Siyiex ka kix heue. Mai kix kied koe krax laux rhawm heue.
16 Khaix an Simiang Siyiex kieh cao prawng see lih son kix, pa sang hu taoh kix lih khaing daux tawm taix pui tud rhim khankix heue.
17 Viang mawh nan kix ang cu nghiet ka cao prawng see, kix hu lud mai siyiex tang kaux mai krub ka, kix nied tix veeh ti khaing krax pa lawng keeing kix mai khaing krax pa cu nghiet ka gumlox pingnyap Simiang Siyiex, kix ang hawt ti yuh awm an heue.
18 Yam kieh Simiang Siyiex Cao prawng see lih ka son kix, Simiang Siyiex ot tau mai cao prawng see mai deeh taoh kix khaing pui koeng kix, daux baux ju cao prawng see, mawh kheu nan Simiang Siyiex deeh koe krax caux rhawm ka lox ngia kix, kheu jao yuh pui koeng pa kha rhawm mai tuktiaktukte ka kix heue.
19 Khaix hoik yum cao prawng see, kix baox nied ti yuh pa lang teung mai baox nie yuh pa caox caig khaing keeing kix, ka pa hawt tix grawng siyiex tang kaux mai pa yuh ti kaing jhaw siyiex an mai krub ka, kix ang pon yoi tix khaing jhawm pa yuh ti mai khaing pa kiien rhawm ti heue.
20 Krax song rhawm Simiang Siyiex hoik hax awm ngu, ka pui Isarelax khankix mai Nawh Cao ah nin ka kix, mawh kheu pui in ang nghiet ka lox Aux mai hoik yieh sijax mukheu pa hoik tawm Aux ka keeing kix,
21 “Aux tak ang lai grheu pui khankix, pa hoik prah Yawsux khaix hoik yum tix cub kawx,
22 in mawh sonsang cheuk Aux ti yaox ka pui Isarelax khankix, ka grawng sang pon priex kix ti hawt krax pa jhi Simiang Siyiex mai hawt daux krax Simiang Siyiex, awm pa hoik hawt keeing kix lie?”
23 Mawh kheu nan Simiang Siyiex hoik prah pui an kix mai ang lai grheu kix lih dom mawx dom an mai Nawh Cao ang ap kix ka daux tawm taix Yawsux heue.