1 “Mawh tawng maix bawg yam sang keh kawn pex rang lie? Phan ang mawh nan mawh pon mhai maix ka bawg yam sang keh cak lie? 2 Mawh pon simin maix khix, singaix, yam naog bawg yam sang keh kix lie? Phan ang mawh nan mawh tawng maix ka bawg yam nghe kix kawn tix lie? 3 Kix buk nyoi tix mai keh kawn tix lih mai luan khaing saux yha tix heue. 4 Kawn iak kix nyawm ot siu koe mai kix ting lhaong ka daux tiagtu, kix lih hu mai ang lai deeh hoek ka miex tix heue. 5 Mawh pui mawx pa ploi la tiag ot ka daux pa ang koe krax tieb krax tie lie? Mawh pui mawx pa yah ka maox keu brung tiag khankix, 6 Aux hoik yuh daux tiag mawh nyiex kix mai hoik kieh lung ting mawh dee ot kix lie? 7 Nawh sibriem ka lox sinum kawn pui pa ot daux veng, nawh ang deuh lox yo pui hoh tiag koe ceu koe mu heue. 8 Hawt liiep gawng lua mawh dee sawg kuah kix tix ih mai sawg liiem ka rib klai kuceu heue. 9 “Mawh sang cu mawie praix ti yuh kaing son maix lie? Mawh sang cu nawh tix it ka daux kawg maix lie? 10 Mawh pon phyawk maix moi praix ka maox sonsang hawt nawh daux rhoi grawng thai lie? Phan ang mawh nan mawh sang cu nawh tix hawt khaix maix yam thai maix ka daux lung lie? 11 Mawh sang yum rhawm maix ka nawh kheu jao kied ting riang nawh lie? Phan ang mawh nan mawh sang pon ap maix kaing cien yuh tix ka nawh lie? 12 Mawh sang yum rhawm maix sonsang viex nawh nghox khaing daux glah nghox mai hoek sau daux krao nyiex maix lie? 13 “Sim kala-uk jiet chix yib pruik tix daux pa yaw rangdi tix, viang mawh nan han tiag naog ka hauk mai pruik pa mhawm ang mawh lie? 14 Grawh grawng nawh, nawh prah tawm tix piang tiex mai kieh tawm khankix siu ka daux phawng tiex, 15 nawh ang khi rhawm ka sang dig caong tix khawn ka tawm tix max, phan ang mawh nan ka sang yuh totiag ka tawm an phawng heue. 16 Nawh nieb pon yuh ka kawn tix ka daux pa kin rhawm, awm ang kix lai mawh kawn nawh, riang rao kaing yuh nawh mawh pa giex going mai ang koe cee koe cak heue. 17 Grawh grawng nawh Siyiex hoik phan hoik deuh nawh mawh pa koe pingnya mai ang lai kieh nawh koe krax tawng heue. 18 Yam yaog nawh tokaux tix lhaong, nawh nyiah maung brung mai pui brug heue. 19 “Mawh pon tawx maix brung kieh koe riang lie? Mawh hoik jhup maix ti deuh ngawg nawh ka grang plukplak praix lie? 20 Mawh pon kieh maix nawh phuh tix awm sido lie? lox phliah nawh meeh tix mawh ceu pa lhat graung heue. 21 Nawh haik tiex ka daux lung daux ngawd mai yaw rangdi jaloh tix ka pa koe riang tix, nawh breeng tix laig ka daux naing heue. 22 Nawh sibriem ka ceu pa lhat graung mai ang koe krax yaoh yee mai nawh ang chix via khaing lawm vaig heue. 23 Lox luah khruah lawk te sidah ka nawh, tau mai rao pliah mai plah rhiem tieb pa mhawm plang heue. 24 Nawh ting rhawm ca nyhau mai haik tiex tau mai krax pa song rhawm tix, nawh ang lai pon cung yawg tix kheu jao mhong ka sinum luah lox teettawng heue. 25 Ka sigreung sinum lox teettawng, nawh ah lox tix Ha, ha! Nawh mhong sioe bhawm naing khaing dee singai mai ka lox yo cao kaing naing khankix mai khawm siaox naing heue. 26 Mawh pon pu klang ce ka pingnya tawx maix mai di pruik tix pu hu ka see plak seh lie? 27 Mawh tawx maix lox tix kieh klang krih pu mai yuh mheem tix piang dee pa lhaong lie? 28 Nawh ot ka piang rang mai ot piang choek rang ka dee pa kaux cong heue. 29 Khaing dee an ngai nawh kok puan dee singai mai jiang ka totiag heue. 30 Kawn nawh khankix yawt ka nham, phan pa yum koe dee mawx nawh kawx ot tan heue.”