1 Mawh kheu nan, Yawbax eue, yuh bwanson nghiet ka lox aux mai hawt ti yuh khawmuik heue. 2 Yam in aux ang jheeh tix, dak ka daux jheeh aux hoik sikah heue. 3 Lox sikah aux khankix kaoh khaing rhawm pa rahsee aux, siyieb jheeh aux krai grawng krax tawng yung aux heue. 4 Khwan Siyiex hoik phan hoik deuh ka aux mai bhawm cao pa ting sibrawm kieh aux im ju heue. 5 Phan maix pon pawk lox aux, pawk heue, khre rien lox pa sang sikah maix ka plak sivoe aux, kieh maix kaux cong heue. 6 Aux mai maix awm paox tix ka plak sivoe ngai Siyiex, aux kawx hoik mawh pa phan khaing phawng tiex heue. 7 Paw kieh maix koe krax lhat graung ka daux aux tix ceu kawx mai taix aux kawx tak ang tawx pa cien piang maix heue. 8 Lox pa sikah maix mai aux hoik mhong khaing maix yuh nin tete, 9 “Aux mawh pa singax mai pa ang koe dee lud, aux ang koe phimap mai ang koe dee deuh phimap ka aux tix ceu kawx heue. 10 Jhak heue, Nawh sawg dee sang deuh phimap piang aux, Nawh hoik simin aux awm pui koeng Nawh 11 Nawh Cao sau gang ka caong aux mai Nawh Cao pau krax lih hu aux khawmuik heue.” 12 “Jhak heue, ka grawng in maix ang mawh pa rahsee, aux tak deeh pawk ka maix, mawh kheu Siyiex mawh pa nie lheu ting khaing kawn pui heue. 13 Maix lai yuh krax pa thung thiang ka Nawh Cao jao patix lie? Grawh grawng nawh Nawh Cao ang lai jhi grawng gumlox sikah tix pie tix ceu kawx heue. 14 Grawh grawng nawh Siyiex sikah ka daux an tix ceu, phan ang mawh nan ka daux tang ceu, viang mawh nan kawn pui ang chix tawng ka heue. 15 Ka daux camaox mai ka daux riang susai yam laig it nyawm tum nawh piang ku dee it tix ponsawm, 16 Khaix an Nawh Cao paoh yhaok kawn pui mai tawk cum ka gumlox sidiex gau ka kix heue. 17 Sonsang deeh veeh kawn pui khaing kaing pa yuh tix mai sonsang luan kix khaing pa ting jhawm kawn pui, 18 Nawh teei ti priex khwan kix khaing daux simeeig mai ju kix khaing krax pa yum ka vaig heue. 19 Kawn pui yaox ti kham geu tau mai krax saux ngia piang dee it tix mai khaing jhawm saux kraing si-ang khankix tom nie, 20 ju nawh hoik seeing ka blah mai rhawm nawh kawx hoik hu ka priex preem heue. 21 Nex nawn nawh hoik dieh hu sipie mai si-ang pa ang sax yaox tix bawg kawx hoik lih plak praix heue. 22 Khwan nawh greed tix dex simeeig mai ju nawh sang hoek dex tawm taix cao prawng see khankix heue. 23 “Mawh kheu nan sonsang jhi Nawh Cao grawng krax pa rahsee tix ka pui, viang cao cau pa ao min koe kaing rheng kawx, ” 24 Khaix an Nawh Cao tak koe krax pa caux rhawm ka son nawh ah nin, “deeh taoh ti teei nawh khaing krax pa sang laig nawh ka daux simeeig, aux hoik yaox krax pa deeh taoh tix, tix ceu, 25 nex nham nawh tak sang lheu awn khaing kawn nyawm mai nawh tak lih tix awm baux singaix yam awn ju tix heue.” 26 Nawh rawg bwan ka Siyiex mai nawh pon bwanson khaing Siyiex, nawh tak yaox pakngai Nawh Cao tau mai krax pa gaux rhawm, grawh grawng nawh, Nawh deeh tawx krax taox tix ka pui heue. 27 Nawh tak rhax lai sivoe ngai pui ah nin, “Aux hoik lud mai hoik tieh feen ka ceu pa mawh meh mai aux ang lai yaox ti kham phimap ka pa keung aux ti kham kah heue.” 28 Nawh Cao tak taoh ti teei khwan ju aux khaing krax pa sang laig nawh ka daux simeeig mai ju nawh tak pon ti yaox ka pa riang heue. 29 “Jhak heue, Siyiex yuh ceu an khankix, ka pui ra bawg mai loe bawg heue.” 30 Sonsang teei khwan ju nawh khaing daux simeeig mai sonsang kieh pa riang nawh mawh pa jhan riang ka daux ju pui pa im heue. 31 “Yawbax eue, daong yhaok tix mai nghiet ka lox aux, kieh maix koe krax nhim rhawm mai Aux tak sang krai ka maix awx. 32 Phan maix koe pa sang krai tix ceuceu krai ka Aux, grawh grawng nawh, Aux koe rhawm ti sang kieh maix mawh pa rahsee heue. 33 Phan ang koe ceu pa krai yawg tix mai nghiet ka lox Aux mai Aux tak gau maix ka pingnya cuyi heue.”