1 Khaix an Biladat ceu pui Shuhix pawk lox ah nin, 2 “Mawh kawn sang rheung sikah maix miex grheung lie? Kieh koe krax tawng yung mai khaix an aux tak sang sikah heue. 3 Kheu ex lai sawn tix awm tobrie khankix, maix lai jhak ex awm pui daox aw ka daux ngai ti yuh ka mawx lie? 4 Maix pa mawh pui pa riah ti tik tokaux tix ka daux pa song rhawm tix, mawh tak sang tik vud haktiex tix ka sipiag maix lie? phan ang mawh nan, mawh sang gah rang khaing dee ot tix lie? 5 Pa riang pui caox caig tak yeet hu tete mai rao ngu nawh ang lai pon tix riang ka heue. 6 Pa riang ka daux nyiex gox nawh lih ti mawh pa faik mai kawk ngu pa koe praok nawh, tak mawh pa yeet heue. 7 Diang caong pa koe riang nawh hoik dawd mai krax keud nawh, tak kieh nawh cang klad goh heue. 8 Grawh grawng nawh, tokaux nawh hoik krix ka rub mai caong nawh hoik cub tix daux kie heue. 9 Kie hoik gluah kip ka loek caong nawh mai rub hoik vung viien ti giex nawh heue. 10 Maox jhawk hoik mox tix son nawh daux tiex mai kie hoik taung tix son nawh ka daux krax heue. 11 Krax lhat graung hoik ghlat nawh ku plak mai sigheet loek caong nawh heue. 12 Riang rao nawh hoik dieh kheu cai rhawm nawh mai krax laux leeing hoik pau praok nawh heue. 13 Pa laux leeing an hoik kraing kaux hak nawh mai kawn Ai meung yum hoik bleet riang rao nawh heue. 14 Nawh Cao hoik reeig nawh khaing nyiex gox dee een nawh rhawm tix mai viex nawh hu ka simiang pa lhat graung heue. 15 Pa ang mawh cie kix, tak ot ka daux nyiex gox kix, mhat tak rhuat tix piang dee ot dee koe nawh heue, 16 riah nawh hoik kroh tom plak greem mai kak plak piang khankix tak fit heue. 17 Krax pa doh keud ka nawh tak laux leeing khaing piang haktiex mai ceu kaux nawh tak ang lai koe daux krax laux heue. 18 Nawh hoik mawh pa grheu ti khaing pa riang mai laig ka daux pa faik mai pheet nawh lih khaing haktiex heue. 19 Nawh ang koe kawn praix sinax ceu pui nawh khankix mai ang lai koe doeh doe pie tix kaux kawx ka dee ot dee koe tix heue. 20 Can pui pa ot ka plak klip singaix, tak koe krax daox deng ka baux singaix ju nawh mai pui pa ot ka plak lih singaix, tak koe krax yaoh yee ka heue. 21 An mawh dee ot dee koe pui caox caig tete, in mawh dee ot dee koe pui ang tawng ka Siyiex heue.