1 Khaix an Yawbax pawk lox ah nin, 2 “Aux hoik dawg mhong lox ceu ankix, krax khu pex rhawm aux mawh krax taug mao ka aux heue. 3 Mawh ang lox giex going pa phlu awm bhaung lai chix uik lie? mawh ceu patix pa so ka rhawm maix sonsang deeh pawk maix lox yuh nin lie? 4 Aux kawn pon sikah awm pon sikah pex, phan ju maix ot ka dee ot ju aux, aux kawx chix pon pum lox piang pex mai pon vuvied kaing tix ka pex, 5 Viang mawh nan aux tak kieh pex koe riang, ka jheeh tix mai krax pa nyawm rhawm khaing daux siyieb jheeh aux, tak sang deeh kieh pa laux rhawm maix moi dieh ka heue. 6 Viang aux sikah kawx krax laux rhawm aux ang nyang moi dieh mai viang aux ang nye nyux kawx, aux tak sang moi ka miex ding lie? 7 Viang mawh nan Nawh Cao hoik kieh aux taug mao, Maix Cao hoik kieh paox grawm aux khankix yiien heue. 8 Maix Cao hoik sau gang ka aux mai an tak mawh pa kham sakse piang aux mai tokaux pa krawx rhao aux kaoh tieh feen aux, mai baox nie kham sakse ka plakngai aux heue. 9 Nawh Cao riah ti tik aux ka daux pa song rhawm tix mai koeng ka aux, Nawh Cao greeik rhang tix ka aux, pui koeng aux hoik blaig ngai tix piang aux heue. 10 Kix ang moing tix ka aux, kix simang ka sibax aux, sonsang kaig tua aux, kix kraix khrawm paox tix deeh tieh feen ka aux heue. 11 Siyiex hoik ap tix tawx aux ka pui pa ang rahsee mai hoik deeh veeh tix tawx aux ka daux tawm taix pui caox caig khankix heue. 12 Yam ot aux yiien yawg tix, Nawh Cao raig ka aux, Nawh Cao giex ngawg aux mai siblat aux tom phawng, Nawh cao hoik tang ti deuh aux mawh mhai son Nawh Cao, 13 cao puing ak Nawh Cao khankix hoik lai lawm ka aux, Nawh Cao kieh te an kix klah daux sok rhawm aux mai ang lai koe krax caux rhawm, Nawh Cao hieh ti tik ghin aux piang tiex heue. 14 Nawh Cao kieh aux mat mai baox lux ka dee mat an; Nawh Cao breeng ti yuh aux laux awm pui naing pa vao pa kwa heue. 15 Aux hoik caing tix ceep chee rhix pa kawm piang nex tix mai deuh kaing tix ka daux phawng tiex heue. 16 Ngai baoh aux hoik raoh kheu yiiem tix mai veei krax yum hoik kheem ka siyieb ngai aux, 17 pie ka daux tawm taix aux kawx ang koe ceu pa kin mai lox bwan rawg aux mawh pa singax heue. 18 “Haktiex eue, paw doh kheem ka nham aux mai paw kieh lox yiiem yo aux ang koe dee laux lee tix liak. 19 Pie tom yam in mhai rug aux hoik koe ka daux raoma tete mai kaw pa kham sakse aux koe ka dee lhaong heue. 20 Paox grawm paox gru aux khankix hoik sibriem ka aux, rawm ngai aux hoik jah sivoe ngai Siyiex heue. 21 Awm pon kah kum pui tau mai paox grawm tix mai kieh pui pon kah kum tau mai Siyiex awm nang nan heue. 22 Grawh grawng nawh bawg yam khix num ang lai rheung, aux tak sang hu krax pa ang tix lai koe krax deeh hoek heue.