1 Yam in khaix hoik luan ceu an kix, ka daux baux singaix Ahap kawn simex Yotham kawn simex Uziyax pa mawh simiang Yudax, Rezin pa mawh simiang Isarelax hoik haok sonsang puing ka veng Yerusaliem, viang mawh nan, ang koe krax pa pex ka heue.Ref 7:1 2Sim 16:5; 2Been 28:5-6 2 Koe pui pa krai ka daux nyiex Davit ah nin, “Haktiex Surix mai haktiex Epharem rom riang rao tix tau heue. Mawh kheu nan rhawm rhi nawh mai rhawm rhi pui nawh khankix hoik awm khaox pa phlu bhaung ot mai siyaung tix heue. 3 Khaix an Siyiex ah nin ka Isayax “Maix mai Shayashup lih hu sonsang sipub ka Ahap daux yam in ka dee sidah rawm khaing dee lih rawm dung pa koe plak laong piang daux krax ting ka kaung cao pa sidaux kraung, 4 ah nin ka nawh ‘Yuh satix maix ot ka daux krax pa yiien yawg, paw lhat graung mai paw laux rhawm son nge khix pa lih taox ngu inkix ra nge mai son pa kied song rhawm song rhi simiang Surix Rezim mai kawn simex Remaliyax heue. 5 Grawh grawng nawh, meung Surix mai meung Epharem mai kawn simex Remaliyax koe krax keud krax sawn pa caox ka piang maix ka daux pa ah nin, 6 “Kieh ex haok ka meung Yudax mai yuh krax pa tuktiaktukte ka kix mai kieh ex yuh guh nawh doh son cao ex mai yaog ti deuh simiang tix kaux ka piang kix, pa mawh kawn simex Tabelax heue.” 7 Siyiex ah awm in, an tak ang pon ti cung mai ang pon ti koe heue. 8 Mawh kheu kaing meung Surix mawh veng Damasekat mai kaing veng Damasekat mawh simiang Rezin heue. Ka daux tigliah phwan num, meung Epharem tak sang laux leeing tak ang lai pon tix mawh pui meung heue. 9 Kaing meung Epharem mawh veng Samarix mai kaing veng Samarix mawh kawn simex Remaliyax heue. Phan pex ang koe krax yum rhawm, pex tak ang pon pang tix cong tete heue.

10 Lheu khaing an, Siyiex baox deeh sikah ka Ahap ah nin, 11 Rawg mhaing mhai rug tix ceu ka son tokaux cao maix khaing Siyiex maix; rawg mhaing ka pa koe ka daux dee raux, phan ang mawh nan ka daux dee pa lhaong plak piang heue. 12 Viang mawh nan simiang Ahap ah nin, “Aux tak ang rawg mhaing mai aux tak ang cheuk ti yaox Siyiex heue.” 13 Khaix an Isayax ah nin, “Nyiex ma Davit khankix eue, nghiet heue, pex kawn sawn pa yuh tix pa nyap pa mao ka pui khankix mawh pa iak mai tak sang baox tawx krax pa nyap mao ka Siyiex aux lie? 14 “Mawh kheu nan, tokaux Aux Siyiex tak sang tawx mhai rug tix ceu jhak heue, bunkrih tak koe kaux mai keh kawn simex mai kix tak kok ceu kaux Nawh mawh Emannoelax heue.” 15 Nawh tak ih klon bee rawm teeih mai rawm hia, Nawh Cao tawng ti thiang ka ceu pa caox caig, laug ti teei ceu pa mhawm heue. 16 “Grawh grawng nawh sivoe ang kawn nyawm an nyang bax tawng tix thiang ka ceu pa caox mai chix laug ti teei ceu pa mhawm, haktiex simiang khawm ra kaux pa koe krax luat mai ka tak sang mawh pa tik pa vud tix heue. 17 “Siyiex tak viex simiang Asurix hoek ka piang maix mai pui maix khankix mai nyiex ma keeing maix, ka daux singaix an kix pa ang sax koe ka daux glang singaix hoik lih hu ceu pui Epharem khaing ceu pui Yudax khankix heue. 18 Ka daux singaix an Siyiex tak jhak roi pa koe hawt rawm klawng meung Ejiptux mai ka hia pa koe ka daux meung Asurix khankix hoek heue. 19 Kix tak hoek mai kix khawmuik tak tum ka daux lung daux ngawd pa yiien an khankix mai ka daux sinax doh rang mai ka piang yeem kat mai ka daux biang rib khankix heue. 20 Ka daux singaix an Siyiex tak sang khlao ti tik hauk ka gawn khlao pa vai ka pui an kix pa ot toi rawm klawng ting, pa mawh simiang meung Asurix, hauk kaing hauk caong mai ka hauk bheup khankix heue. 21 Ka daux singaix an, pui tix kaux tak sang eei kawn mawie shiang tix mu mai yung ra mu im ju, 22 mai mawh kheu rawm teeih mawie lih ti koe haoh hun, son tak sang ih nawh klon bee rawm teeih khankix mawh kheu pui ku kaux tak yaox ti ih klon bee rawm teeih an kix mai rawm hia pa hoik priex tix ka daux haktiex an heue. 23 Ka daux singaix an, ka can dee hoik koe nhu plix siiet khankix tix rheng num pa cai ngawh jum tix mawh mau tix rheng shekhe, tak sang mawh pang kat heeik mai pang kat khankix heue. 24 Pui khankix tak viex ak mai te hoek tan, haktiex an kix khawmuik hoik lih ti mawh pang kat heeik mai pang kat khankix heue. 25 Can gawng ma khankix pa hoik sax paog tix ka khaw maix tak ang pon ti hu tan kheu jao lhat tix ka pang kat heeik mai pang kat khankix heue. Viang mawh nan dee an tak lih ti mawh gawng ma liang mawie mai dee lailing yung tix dig ka heue.