1 Yaog ti kaoh, jhan riang heue. Mawh kheu pa riang maix hoik hoek mai min pakngai Siyiex mawh pa hoik jhan tix lih ka piang maix heue. 2 Jhak heue, kheu pa faik tak sang kheem ka piang haktiex mai krax pa kied ceep pa faik tak sang kheem ti hoek ka piang pui khawmuik heue. Viang mawh nan, Siyiex tak yaog ti lih ka piang maix mai min pakngai Nawh tak mawh pa sidawng ka piang maix heue. 3 Pui tang ceu khawmuik tak hoek ka pa riang maix mai simiang tak hoek ka krax jhan riang pa lih khaing maix heue. 4 Maong ti jhak hawt vung viang maix khawmuik, kix kraix khrawm paox tau khawmuik mai hoek ka maix heue. Kawn simex maix khankix tak hoek khaing dee kied singai mai kawn bun maix khankix tak mawh pa kliien ti hoek ka hawt praok maix heue. 5 Khaix an maix tak sang yaox pa riang koe krax pa sigluang rhawm mai dee koe krax pa gaux rhawm ka heue. Grawh grawng nawh, krax pa magmi rawm sigrit sigra tak mawh pa veeh ti hoek ka maix mai krax magmi ceu pui tang ceu kawx tak hoek ka maix khawmuik heue. 6 Ref 60:6 Mat 2:11Krax pa kied nie haoh hun phung kala uk, tak naog ka haktiex maix, cau kala uk hatiex Midim mai haktiex Epha khankix hoik tah ka daux haktiex maix heue. Haktiex Shebax khawmuik tak sang bleeh ti hoek mai kix tak viex khri mai Lawban hoek mai kix tak pao ti yo lox pa yaog yaw Siyiex heue. 7 Cub phung yung haktiex Kadax khawmuik, tak mawh pa kraix khrawm ti hoek ka maix, kawn yung mhaing haktiex Nabayok khankix, tak tawx maix shiao heue. Kix tak haok tau mai pa hoik rieb ti teei ka piang khu dee tan Aux mai Aux tak yaog min pakngai nyiex pa koe min pakngai Aux heue. 8 Pui mawx pa po ti hoek awm paiawm mai pa awm sikaux ka daux mheem kix lie? 9 Pui pa ot hawt baoh klawn tiex rawm sigrit sigra tak krox jun ka son Aux mai reu ting Tasux tak bleeh ti hoek phao ka, sonsang viex kawn simex maix hoek khaing dee singai mai khawm mau khri kix hoek tau mai kix, ka son ceu kaux Siyiex pa mawh Siyiex maix mai ka Siyiex pa singax singeh ceu pui Isarelax khankix, mawh kheu Nawh Cao hoik yaog ka min pakngai maix heue. 10 Pui tang meung khankix tak ang sum guh veng maix mai simiang kix tak yuh ti tawx kaing ka maix heue. Grawh grawng nawh, ka daux krax pa song rhawm Aux hoik sax tawx krax pa kham geu ka maix, viang mawh nan, yam in ka daux pa koe rhawm Aux, Aux hoik koe krax caux rhawm ka maix heue. 11 Siviex maix khankix tak mawh pa paoh ti deuh sijheeng, kix tak ang lai mawh pa nyeep tix ku singaix, sonsang kieh pui viex krax mag mi pui tang meung khankixRef 60:11 Jhi 21:25-26. hoek ka maix mai khawm simiang kix hoek heue. 12 Mawh kheu pui ceu tix ang ah, meung haktiex mawx ang ah pa ang yuh kaing jhaw maix khankix, tak grai grup tix hu mai haktiex an kix tak mawh pa laux leeing pak lawg heue. 13 Min pakngai Lebanon, tak hoek ka maix, khawm khaox gix, khaox Taderax mai khaox Tashurax tau, sonsang mhawm grang yuh dee pa singax singeh Aux, Aux tak sang yuh dee een Aux caong tix khankix koe min pakngai ka heue. 14 Kawn simex pui pa hoik yuh krax kha rhawm ka maix khankix, tak hoek num kaing tix ka maix mai pui khawmuik pa hoik nu nai ka maix, tak krub hawt caong maixRef 60:14 Jhi 3:9, kix tak kok maix, mawh veng Siyiex, veng Zion cie Siyiex pa singax singeh ceu pui Isarelax heue. 15 Viang maix mawh pa hoik dawg tik vud mai pa hoik koeng, son ang pui tix kaux kawx hu laig ka maix, Aux tak yuh maix mawh ceu pa kied blon mhawm leeing ju, son krax gaux rhawm pui khankix ku ju heue. 16 Maix tak nyaux ka rawm teeih ceu pui tang meung mai tak peuex teeih simiang khankix heue. Maix tak tawng ka mawh Aux cao taoh maix, pa mawh Siyiex mai cao pa taoh maix, pa mawh cao pa kied ting sibrawm ceu pui Yakop heue. 17 Aux sang viex khri hoek son tang tawng lheung, viex mau hoek son tang rhiem mai viex tawng lheung hoek son tang khaox mai viex rhiem hoek son tang simaox, Aux tak yuh pa nhim mawh son simiang maix khankix mai krax pa rahsee mawh son cao pa koh keen maix khankix heue. 18 Krax pa kin tak ang lai mhong tix ka daux haktiex maix khaix in, krax pa nai pa nawk mai krax pa laux leeing kawx, tak ang lai koe ka daux sinax mee haktiex maix khankix heue. Viang mawh nan maix tak kok guh veng maix mawh krax taoh mai siviex veng maix mawh krax yaog yaw heue.

19 “Singaix tak ang lai mawh pa riang maix ka daux plak ponngaix khaix in, pa riang khix tak ang lai jhan pa riang ka maix heue. Viang mawh nan, Siyiex tak mawh pa riang leeing ju ka son maix mai Siyiex tak mawh min pakngai maix heue.Ref 60:19 Jhi 21:23; 22:5. 20 Singaix maix tak ang lai klip khaix in mai khix maix tak ang lai jee heue. Grawh grawng nawh, Siyiex tak mawh pa riang leeing ju ka son maix mai baux singaix khi rhawm maix tak mawh pa hoik sidah heue. 21 Pui maix khawmuik tak mawh pa rahsee, kix tak pon ti cie haktiex mawh sinngao tix leeing ju heue. Mawh khaox pa hoik sum Aux mai kaing jhaw taix aux khankix tak mawh pa pon Aux ti koe min pakngai ka heue. 22 Kawn nyawm iak tix kaux tak pon ti mawh pui tix rheng kaux mai pa iak riang rao tix kaux tak mawh ceu pui pa kied ting riang tix cub heue. Aux pa mawh Siyiex, tak nied ti yuh grawng an ka daux bawg yam nawh heue.