1 Kix tawx kawn yung hu ka cao pa kwang haktiex, jah ka veng Sala tom hoek ka daux tiagtu, tom hoek ka gawng kawn bun Zion heue. 2 Awm sim pa vung viang tix po hu, pa hoik prah mheem tix, kawn bun Mawbax khankix kawx tak sang mawh awm an, ka dee tiang baoh hawt diang rawm klawng Anon heue. 3 Tawx krax keud krax sawn prawng ca ka daux krax pa rahsee liak. Yuh veei maix awm ponsawm ka daux pa riang jung singaix, mox ti deuh can pui pa hoik grheu ti tik khankix, paw lai jhi ka pui pa hoik to khankix heue. 4 Kieh pui pa grheu ti tik khankix khaing haktiex Mawbax ot tau mai maix, mawh dee pan dee peung tix dah son kix khaing plakngai cao pa yuh krax laux leeing heue. Pui pa tuktiak ang lai koe, krax laux leeing ka hoik yiien pa yeen ya ka pui khankix mawh pa hoik laux hoik leeing khaing haktiex heue. 5 Dang ngeung tak kaux cong ka daux pa caux rhawm mai pui tix kaux tak ngawm ka piang an ka daux pa kaux sijax, ka daux nyiex gox simiang Davit mai prawng ca rahsee mai khawm sawg tix krax pa rahsee phai phai heue. 6 Ex hoik mhong krax pa ting rhawm pui haktiex Mawbax, nawh mawh pa kied ting rhawm, ka daux pa lhaong rhawm nawh mai ka daux krax pa song rhawm nawh mai lox pie lhen nawh khankix tak ang lai pon ti mawh tidtix heue. 7 Mawh kheu nan pui Mawbax tak ngia son pui Mawbax ku kaux tak ngia heue. Kheu jao grawng num pang plix siiet veng Kiraharet khankix, pex tak laux rhawm, tak mawh pa hoek krax kha rhawm heue. 8 Kheu jao kroh groing tong kaung veng Heshabon khankix mai nhu plix siiet Sibama an, simiang pui tang ceu khankix hoik raig ti tik pang khaox pa mhawm khankix, pa hoik bleeh hoek ka veng Yaza mai hoik vung viang ti hu ka daux tiagtu, kak nawh khankix hoik toek ti lih mai hoik luan hu toi rawm sigrit sigra heue. 9 Mawh kheu nan aux tak koe krax yiiem son nhu plix siiet Sibama, tau mai krax pa yiiem tix son veng Yaza heue. Veng Heshabon mai veng Elale khankix eue, Aux tak see maix ka rawm ngai tix heue. Mawh kheu sinum naing hoik hoek ka piang plix khaox daux yam rung praix maix khankix mai khawm ka piang sigleem nghox vawg maix khankix heue. 10 Krax pa gaux rhawm hoik teei tix hu, khaing daux tong kaung dee kied mhawm ka daux sipeem plix siiet tak ang lai koe pa ah lai rhax, lox lawh maw kawx tak ang lai koe, cao pa dig rawm plix siiet lih khaing ka dah dee biiet kix heue. Aux hoik kieh lox lawh maw kix yiien hu heue. 11 Mawh kheu nan, rhawm aux tak khi mai luah awm ting vawk son haktiex Mawbax, mai ka plak daux sok rhawm aux, hoik mawh pa awm an son veng Kiraharet heue. 12 Yam hu krub pui Mawbax ka riang grang siyiex kix mai tauk mao ka piang dee pa lhaong, ka tak sang hoek nawh ka dee singax, sonsang rawg tix bwan, viang mawh nan nawh tak ang koe krax pa lih mawh tid tix heue. 13 In mawh gumlox pa hoik krai Siyiex son grawng Mawbax glang in heue. 14 Viang mawh nan yam in Siyiex ah nin, glang daux loe num, awm baux num pa hoik cang caing pui khankix, min pakngai haktiex Mawbax mai cub pui pa kied haoh hun nawh khankix khawmuik tak mawh pa yeen ti tiiem mai pui pa kawn deuk khankix, tak mawh pa kied tux mai pa iak riang rao heue.