1 Grawng pa hoik yaox Isayax kawn simex Amok ka grawng veng BabulonRef 13:1-14:23 Isa 47:1-15; Ye 50:1-51:64. 2 Yaog tix pak chix ka gawng pa lhaong, riak yo lox sinum ka kix, vuh vied taix pex, son tak sang pon kix ti laig ka daux siviex cao pa ting lhaong heue. 3 Aux hoik tawm lox ka pui pa hoik singax yuh Aux khankix, Aux hoik baox deeh kok ka can pui pa koe rhawm cong rhawm kwa son krax pa song rhawm song rhi aux, ka can pui an kix, pa koe krax gaux rhawm ka daux krax pa ting lhaongheue. 4 Lox sinum pui hun khankix ka piang gawng, awm lox lawh maw pui khankix tom nie heue. Lox sinum lawh maw ceu pui meung haktiex hoik khrawm tix tau, Siyiex Cao kru naing raoma kraix khrawm cub kru naing khankix son naing heue. 5 Kix hoek khaing haktiex pa kied singai, khaing dee sidah raoma, hoik mawh Siyiex mai kraung naing pa song rhawm Nawh Cao, sonsang yuh haktiex laux leeing khawmuik heue. 6 Yiiem yo heue, mawh kheu singaix Siyiex hoik dex, an tak sang hoek, awm krax pa laux leeing pa ciyang cao pa ting sibrawm heue.Ref 13:6 Yol 1:15. 7 Mawh kheu nan, taix can pa koe khawmuik, tak mawh pa tak teue hu, rhawm rhi pui khankix tak koe krax pa laux rhawm mai kix hoek krax lhat graung heue. 8 Krax saux krax ngia kuceu tak teei ti giex kix, awm saux ngia bun yam keh kawn heue. Kix tix kaux lai tix kaux, jhak ka paox tix, pakngai kix awm rao ngu heue. 9 Jhak heue, singaix pa kied lang teung song rhawm song rhi Siyiex hoek ti yuh haktiex laux mai Nawh Cao tak sang yuh pui koe phimap phighram mai pui haktiex khankix laux leeing heue. 10 Simuing raoma khankix tak ang lai tawx pa riang tix, singaix kawx faik hu mai khix kawx ang lai jhan pa riang heue.Ref 13:10 Mat 24:29; Mak 13:24-25; Luk 21:25; Jhi 6:12-13; 8:12. 11 Aux tak sang ciyang ka haktiex kheu krax pa caox nawh mai ciyang pui caox kheu krax phit krax lud kix heue. Aux tak kieh krax ting rhawm pui pa ca nyhau grai mai aux tak yeen tiem ka pui pa lang teung lhaong rhawm rhi heue. 12 Aux tak yuh kawn pui nie lheu ngawh khaing khri nawnaw, mai pui nie lheu ngawh khaing siang, khri, Awphirax heue. 13 Mawh kheu in aux tak sang kieh raoma yung yiang mai haktiex gah ti lih khaing dee koe nawh, ka daux krax pa song rhawm Siyiex Cao kru naing raoma mai ka daux singaix koe krax pa kied ting song rhawm song rhi Nawh Cao heue. 14 An tak awm cak shiang pa hoik leue tix mai awm yung pa ang koe cao priex heue. Pui ku kaux tak veeh ngai tix ka ceu pui tix kaux mawx kaux an, mai pui ku kaux tak deeh ka meung cao tix kaux mawx kaux an heue. 15 Can pui pa kham pa sipup pui ti yaox tak yaox ti kham krax pa pah, mai pui pa giex laung khankix, tak yaox ti kham pa laux leeing ka lawm vaig heue. 16 Kawn praix kix tak yaox ti kham pa blah yum piang tiex ka plak sivoe ngai kix heue. Rhim ti teei nyiex ma kix mai yuh pa ang mawh ang meh ka moeng kix heue. 17 Jhak heue, aux tak sang so rhawm pui Medi khankix tieh feen ka kix, pa mawh pui pa ang moh ka mau khri heue. 18 Kix teei ak mai pah pui awn ju khankix yum ang lai koe krax caux rhawm ka plix pa kaoh khaing daux vaig heue. Ngai kix tak ang lai koe krax pa lhawk tix ka kawn nyawm khankix heue. 19 Veng Babulon pa mawh min pa ting lhaong meung haktiex khankix mai pa mhawm grang min pakngai cie ceu pui Khaladie khankix, tak sang awm yam yuh Siyiex ka veng Sawdom mai veng Gawmawrax laux heue.Ref 13:19 Jah 19:24. 20 Ka dee an pui tix kaux kawx ang pon ti ot, ku ju leeing ju. Pui Aribiyax tak ang pon ti sum nyiex gox tan mai cao pa liang yung khankix tak ang lai pon ti sum kawg yung tan heue. 21 Totiag khankix it ka dee an mai nyiex kix tak mawh pa naog ka sim pang plawhRef 13:21 Jhi 18:2. mai sim ka la uk tak ot tan mai pex tiag khankix tak graoh ti ot tan heue. 22 Soxla tak raoh ka daux nyiex tap lhaong, mai sox praix tak raoh ka dah deeh mhawm grang heue. Bawg yam cie nawh khankix tak ang lai mawh pa rheung pa lang heue.”