1 Ceu pui Isarelax eue, nghiet ka gumlox Siyiex heue. Grawh grawng nawh, Siyiex tak sang prawng see piang pui pa ot ka daux haktiex in heue. Mawh kheu piang haktiex in ang koe pa kaux sijax, ang koe pa caux rhawm mai ang koe pa tawng ka Siyiex heue. 2 Ka lox pa jhax lawg mai ka lox pie lhen, krax pah pui yum mai krax pa briex mai krax pa lud vao ka moeng kawn pui khankix, kix yuh krax vao lud mai krax pa jauh nham ang jud heue. 3 Mawh kheu nan, haktiex tak sang koe krax khi rhawm mai pui ku kaux pa ot ka daux haktiex an, tak dieh hu mai totiag daux tiagtu khankix mai sim sai daux raoma, khawm kax daux rawm sigrit sigra tak sang mawh pa uik heue. 4 Yam in paw lai kieh pui tix kaux kawx koe krax pa thung thiang mai paw kieh koe lox ne ah ka pui tang kaux, grawh grawng nawh, pui maix khankix mawh pa awm pui an kix, pa hoik tiebtie ka cao giex kaing li heue. 5 Mawh kheu nan maix tak sideeing ti goh daux plak ponngaix, cao jhai kawx tak sang sideeing ti goh tau mai maix ka plak ponsawm mai Aux tak yuh miex maix laux leeing heue. 6 Pui Aux khankix hoik laux leeing kheu ang kix koe pingnya cuyi mawh kheu maix hoik thiang ti tik pingnya cuyi, Aux kawx tak sang thiang ti tik maix khaing pa mawh maix cao giex kaing li Aux, mawh kheu hoik piawm maix ka beenli Siyiex Cao maix, Aux tak sang piawm ka kawn praix maix khankix heue. 7 Cao giex kaing li baox nie hun, kix baox nie lheu lud ka Aux, Aux tak sang tieh loh min plakngai kix hoek ka daux krax pa kaig tua heue. 8 Kix ih krax tan pa taoh phimap pui Aux khankix, daux rhawm kix simie pui Aux lud heue. 9 Mawh kheu nan pui khankix yuh ka mawx mai cao giex kaing li khankix kawx yuh nang nan heue. Aux sang tawx krax pa kham geu piang kix, awm krax pa yuh kix mai tak deeh tawx ka kix, awm kaing pa yuh kix heue. 10 Kix tak ih mai ang sak, kix tak lud vao mai ang koe krax haoh hun, grawh grawng nawh, kix hoik tik vud mai ang cu nghiet ka Siyiex heue.

11 Krax lud vao, rawm plix siiet mai rawm plix siiet pa khraox mawh pa kieh rhawm pui yoek heue. 12 Pui Aux khankix chawk ti yaox ka riang rao krub kix mai keud khaox gix kix mawh pa chix tawx krax keud ka kix heue. Grawh grawng nawh, rhawm pa lud vao hoik kieh kix vu vie mai kix hoik yuh pa lud vao mai tik vud ka Siyiex kix heue. 13 Kix tan ti tawx krax pa appong piang choek gawng khankix mai gleeing nyawng bhawng piang gawng, ka greem khaox tiah, khaox libana mai khaox piak van, kheu mhawm veei kix heue. Mawh kheu nan, kawn bun pex khankix yuh krax pa lud vao mai mun pex kawx hoik lud vao heue. 14 Aux tak ang lai tawx krax kham geu ka kawn bun pex khankix yam lud vao kix mai khawm mun pex, yam lud vao kix heue. Grawh grawng nawh, simex khankix hoik tang hu mai rom ti ot tau mai bun coh kaux mai tan ti tawx krax tan pa appong tau mai bun coh kaux an heue. Mawh kheu nan, pui pa ang koe krax tawng khankix, tak sang hoek krax som nai heue. 15 Ceu pui Isarelax khankix eue, viang maix yuh pa lud vao kawx, paw kieh ceu pui Yudax koe krax lud kah heue. Paw doh greed ti hoek ka veng Gilagalax mai paw hu ka veng Bietavin mai paw doh ah lox tiextu ka Siyiex pa im leeing ju heue. 16 Ceu pui Isarelax khankix mawh pa ang cu ti sug awm pheuk ka mawie shiang heue. Siyiex tak sang liang kix, awm liang kawn yung iak ka haktiex dee vieh va heue. 17 Epharem mawh pa hoik hawt ka riang grang an khankix, grham nawh heue. 18 Pa nyaux kix hoik deeh tieh ti niex, kix ca yuh krax lud vao, simiang cao kix, kied koe krax moh krax rhawm ka pa kaig tua heue. 19 Bhaung hoik pua ti viex kix ka daux pruik tix mai kix tak sang mawh pa kaig tua, kheu krax tan pa appong kix heue.