1 Gumlox Siyiex hoek ka Hose kawn simex Berix, baux ju singaix Oziyax,Ref 1:1 2Sim 15:1-7; 2Been 26:1-23.Yawtam,Ref 1:1 2Sim 15:32-38; 2Been 27:1-8. AhapRef 1:1 2Sim 16:1-20; 2Been 28:1-27. mai Hezakix,Ref 1:1 2Sim 18:1-20:21; 2Been 29:1-32:33. pa mawh simiang haktiex Yudax khankix mai baux ju singaix YerobomRef 1:1 2Sim 14:23-29. kawn simex Yosha simiang haktiex Isarelax heue.

2 Yam jah Siyiex ti krai lox ka Hose, Siyiex ah nin ka Hose, “Maix hu teei ti moeng bun coh kaux an mai khawm kawn pa keh nawh khankix heue, grawh grawng nawh, pui haktiex khankix hoik yuh krax pa lud vao pa kied ting lhaong mai lih hu khaing Siyiex heue. 3 Mawh kheu nan, nawh hu teei ti cie Gawma pa mawh kawn bun Dibalem mai koe kaux mai keh ti tawx kawn simex ka son nawh tix kaux heue. 4 Siyiex ah nin ka nawh, “Kok ceu kaux nawh mawh Yezerelax heue. Grawh grawng nawh, baox jun tivud, Aux tak sang pawk bix piang nyiex ma Yehu son nham pa jauh ka YezerelaxRef 1:4 2Sim 10:11. mai kieh meung haktiex nyiex ma ceu pui Isarelax khankix grai grup heue. 5 Hoek ka daux singaix an, Aux tak raig ti tik ak ceu pui Isarelax, ka dau lung Yezerelax heue. 6 Gawma baox koe kaux mai keh kawn bun tix kaux mai Siyiex ah nin ka nawh, “Kok ceu kaux kawn bun an mawh Lawruhama heue. Grawh grawng nawh, Aux tak ang lai koe krax caux rhawm ka nyiex ma ceu pui Isarelax mai Aux tak sang tik vud kix heue. 7 Aux tak sang koe krax caux rhawm ka nyiex ma ceu pui Yudax mai tak sang taoh kix ka Siyiex pa mawh Siyiex leeing ju kix mai ang mawh taoh kix ka ak mai ka vaid mai ka naing, ka brung khankix mai ka pui naing brung khankix heue. 8 Khaix hoik kieh Gawma kawn tix Lawruhama prah teeh, nawh deeh koe kaux mai keh kawn simex tix kaux heue. 9 Siyiex ah nin, “Kok ceu kaux nawh mawh Law-ami, grawh grawng nawh, pex ang lai mawh pui Aux mai Aux kawx ang lai mawh Siyiex pex heue.

10 Viang mawh nan, ceu pui Isarelax khankix, tak sang awm mhaik rawm sigrit sigra, pa ang pon ti tiag mai pa ang uik simin tix heue. Ka in ka baoh khaing dee mawh pa hoik ah nin ka kix, pex ang lai mawh pui Aux heue. Khaix in tak sang mawh pa ah nin ka kix tan, pex mawh kawn Siyiex pa im ju heue.Ref 1:10 Ro 9:26. 11 Khaix an, ceu pui Yudax mai ceu pui Isarelax khankix, tak sang mawh pa kraix khrawm tix tau mai yaog ti deuh cao kaing tix kaux ka son tokaux kix mai kix tak sang lih khaing daux haktiex heue. Grawh grawng nawh, krax pa ting lhaong tak sang mawh cie singaix Yezerelax heue.