6
1 Mawh kheu nan kieh ex prah ka ceu pa gau, pa mawh lox num been Cao Khrit khankix mai hu plak sivoe tom uik grum die huan mai ang baox deeh yuh ti deuh num pa doh keud ka krax twah klaung pa yum mai ka krax yum rhawm ka Siyiex,
2 pa dex mai pa gau ka grawng cubcom rawm mai pa deuh taix ka piang mai pa deeh kaoh im khaing krax yum mai pa prawng ca leeing ju heue.
3 Phan Siyiex tawx akhwang ex tak yuh nan heue.
4 Phan mawh grawh grawng kix pa hoik pon pa riang tix bawg mai hoik cim ti yaox ka totaix raoma mai hoik kieh mawh pa rom ti pon ka Khuan Singax,
5 hoik cim ti yaox ka gumlox Siyiex pa mhawm mai ka sibrawm khankix pa tak sang hoek ju khaix,
6 hoik deeh tieh ka khaix, ang tau ti doh chix kieh kix baox deeh mawh pa khraox, ka pa doh keud ka phimap, kheu kix baox deeh teei Kawn Siyiex yum ka piang khaox lhak ka tokaux tix, tix bawg mai yuh ti kieh Nawh mawh pa kaig tua ka sivoe pui heue.
7 Grawh grawng nawh haktiex pa hoik nyaux ka rawm lhiex pa lih hoek ka piang nawh law lawx mai pa chix kieh taux lhax lih koe son kix pa hoik yuh ka khankix, pon bwanson khaing Siyiex heue.
8 Phan haktiex an kieh pang kat lih koe, sawn nawh mawh pa ang koe bwanson pa jhax lawg hoik dexRef 6:8 Jah 3:17-18. dee sidah nawh mawh pa gleeing heue.
9 Viang ex ah nan kawx, pa moh aux khankix eue, ex tom yum rhawm grawng ceu pa nie lheu mhawm ka grawh grawng pex, pa mawh ceu pa dex pa neuex mai krax taoh khankix heue.
10 Grawh grawng nawh Siyiex ang lai mawh pa ang rahsee, ti piawm ka kaing krax moh pa hoik jhi pex ka plak ceu kaux Nawh, ka daux pa hoik teem pex ka pui singax khankix mai ka daux pa ca kawn yuh pex nan heue.
11 Ex simie ti kieh pex kaux mawx kaux an jhi pa viex khawm rhawm tix coca awm an, son sang pon krax keud pot jun pot pa grum naog tom sidah,
12 son ang pex lai sang nieh, mawh pa hawt jawh ka kix pa pon sin lox sijax mukheu khankix kheu krax yum rhawm mai krax gun yeung heue.
Lox Sijax Mukheu Siyiex Pa Kaux Cong
13 Grawh grawng nawh yam tawx Siyiex lox sijax mukheu ka Abraham, kheu ang Nawh yaox ti tiextu ka pa nie lheu ting, Nawh tom deeh tiextu ka tokaux tix tiru,
14 Ah nin, “Aux tak sang nawb bwanson ka maix mai tak sang kieh maix pre kah tete heue.Ref 6:14 Jah 22:16-17.
15 Kheu hoik viex rhawm gun yeung ti krox, Abraham tom pon lox sijax mukheu an heue.
16 Kawn pui chix tiextu tix sivoe ngai pui pa ting lhaong khankix, phan krax pa tiextu kix kaux cong pon kieh pa thiang kix paox tix yien dud heue.
17 Mawh kheu Siyiex koe rhawm ti sang nie jhi sidawng laing laing, ka cao pa sang pon sin lox sijax mukheu an, ka grawng pa ang chix tieh loh ceu pa bak Nawh, Nawh tom shiao lox tiex tu sinax,
18 Kheu ra ceu pa ang chix tieh loh, pa ang doh chix kieh Siyiex pie lhen kah, ex pa hoik to son dee peung ti giex ka krax keud pot jun pot pa hoik deuh sivoe ex, tak sang pon pa baox thiien riang ka ex heue.
19 Krax keud pot jun pot an mawh awm rhiem ngak ngaw ka son ju ex, pa kaux cong mai hoek tom plak daux man kang,Ref 6:19 Krub 16:2.
20 Ka dee hoik grux laig Yesux ti mawh cao pa hu sivoe ka son ex, kheu hoik lih mawh Nawh cao giex kaing li pa ting, leeing ju, awm pa khaw mai ara Melakhizediek heue.”Ref 6:20 Yaog 110:4.