LAI THESALONIX PHUK RA
(2 Thessalonians)
1
Lox Nawb Bwan
1 Pawlux mai Silwanux mai Timose, tawx ka ceu cao pui veng Thesalonix Ref 1:1 Cau 17:1.pa ot ka daux Keeing ex Siyiex mai Simiang Yesux Khrit heue.
2 Kieh pex koe bwanson mai pa nhim khaing Siyiex Keeing Cao mai Simiang Yesux Khrit liak.
Pa Prawng Ca Yam Deeh Hoek Yesux
3 Puxaik khankix eue, ex yaogyaw bwanson ka Siyiex, son pex ku jheung jheung, kheu pa kied haok huan krax yum rhawm pex mai kheu kied nie moh pex ku kaux khawmuik ka paox tix, tix kaux lai tix kaux heue.
4 Mawh kheu nan ex tom yaw rangdi grawng pex ka daux ceucao Siyiex khankix, kheu krax chix gun chix yeung pex mai krax yum rhawm pex, ka daux pa yaox pex tix kham krax tuktiaktukte mai krax kha rhawm khawmuik,
5 ceu inkix mawh mhai ka grawng pa rahsee ceu pa prawng ca Siyiex mai grawng pa een pa sawn pex mawh pa keung son meung Siyiex, pa yaox pex ti kham geu yam in kawx mawh son meung an heue.
6 Phan mawh pa khaw mai pa rahsee Siyiex tak deeh tawx pa tug pa kha ka kix, pa hoik yuh pa tug pa kha ka pex,
7 kieh pex pa yaox krax tug krax kha laux lee tau mai ex, yam lih bleeh Simiang Yesux khaing raoma, tau mai kawncau Siyiex pa ting sibrawm cie tix khankix ka daux rao ngu,
8 mai pawk bix ka kix pa ang tawng ka Simiang Siyiex, ka kix pa ang cu nghiet ka lox bwan gaux rhawm Simiang ex Yesux Khrit.
9 Kix tak sang yaox ti kham geu krax ciyang pa mawh krax pa laux leeing ju mai pa gwieh khaing pakngai Simiang mai khaing min pakngai Nawh Cao pa koe sibrawm,
10 yam hoek Nawh Cao sonsang koe min pakngai ka daux pui singax singeh Nawh khankix mai son pui pa yum rhawm khawmuik sang daox deng kah, mawh kheu hoik yum rhawm pex ka lox pa kham ex mhai ruk ka pex, ka daux singaix an heue.
11 Mawh kheu in, ex rawg bwan ka son pex, ka Simiang Siyiex ex ku jheung jheung, sonsang een sang sawn pex mawh pa keung ka ceu pa hoik kok pex kah, kieh ceu pa simie pex pa mhawm ku ceu, kieh kaing krax yum rhawm ku ceu tau mai siawp sibrawm, kieh grum naog heue.
12 Sonsang koe min pakngai ceu kaux Simiang ex Yesux ka daux pex, sonsang koe min pakngai pex ka daux Nawh Cao, awm pa khaw mai bwanson Siyiex ex mai Simiang Yesux Khrit heue.