47
1 Khaix an Yosiep ing krai ka Pharaw ah nin, “Keeing aux mai puxke aux khankix, khawm yung, pex mai tobrie mai kraung khrai kix khawmuik, hoik hoek khaing meung Khanan, mai kix ot ka daux haktiex Goshen heue.”
2 Nawh teei pui phwan kaux khaing sinax puxke nawh khankix mai viex kix hoek ka Pharaw heue.
3 Pharaw ah nin ka puxke nawh khankix, “Yuh pex kaing jhaw patix?” mai kix ah nin ka Pharaw, “Kawncau maix khankix, mawh cao liang yung, awm tax yiex miex keeing tix heue.”
4 Kix ah nin ka Pharaw, “Yix hoik hoek sonsang paung tix daux haktiex in, mawh kheu kied kin sibhawm praix ka daux meung Khanan, ang lai koe dee ih dee liang son tobrie yix, mawh kheu nan yuh bwanson, kieh kawncau maix khankix ot ka daux haktiex Goshen liak.”
5 Khaix an Pharaw ah nin ka Yosiep, “Keeing maix mai puxke maix khankix hoik hoek ka maix.
6 Haktiex Ejiptux koe sivoe maix, kieh keeing maix mai puxke maix khankix, ot dee mhawm ka daux haktiex Goshen, mai phan maix tawng pui pa cheung ka daux kix tix kaux kaux, yaog kix mawh cao giex kaing liang tobrie aux heue.”
7 Yosiep viex keeing tix Yakop hoek sivoe Pharaw mai Yakop nawb bwan piang Pharaw heue.
8 Pharaw ah nin ka Yakop, “Hoik koe ju maix miex ding?”
9 Yakop ah nin ka Pharaw, “Num singaix mawh aux nyo sinie hoik koe tix yieh tixngoe num, num pa yaox aux krax mhawm mawh ceeix khaing, mai num pa yaox aux krax pa caox hoik kied nie, ang nyang krup ka baux ju keeing aux khankix, yam mawh kix nyo sinie heue.”
10 Yakop nawb bwan ka Pharaw mai lih hu khaing sivoe Pharaw heue.
11 Yosiep tawx keeing nawh mai puxke tix khankix ot dee mhawm haktiex meung Ejiptux, pa mawh haktiex dex ka veng Ramase mai tawx kix cie haktiex an, awm lox pa hoik tawm Pharaw heue.
12 Yosiep tawx pa ih ka keeing nawh, puxke nawh mai can pui pa ot daux nyiex ma keeing nawh, awm diag koe kix daux nyiex ma tix heue.
Kaing Yuh Yosiep
13 Pa ih ang lai koe daux haktiex kudah dee, sipiag kied kin sibhawm praix, mawh kheu nan, haktiex Ejiptux mai haktiex Khanan khankix hoik dieh riang jao sibhawm praix heue.
14 Yosiep khrawm mau pa pon coh ti nghox khaing daux haktiex Ejiptux mai haktiex Khanan khawmuik mai Yosiep viex mau an hoek ka nyiex haw Pharaw heue.
15 Yam hoik uik cai pui haktiex Ejiptux mai pui haktiex Khanan mau can pa koe tix khawmuik, pui Ejiptux hoek ka Yosiep ah nin, “Tawx pa ih ka yix liak, yuh ka mawx yix lai sang yum ka plak sivoe ngai maix? Mawh kheu hoik uik cai yix mau tix heue.”
16 Yosiep ah nin, phan mau pex hoik uik, “Viex ti tawx tobrie pex ka aux mai aux tak sang tawx pa ih son pex heue.”
17 Mawh kheu nan kix viex tobrie tix hoek ka Yosiep mai Yosiep deeh loh kix ih nghox ka brung, yung mai pex mai la khankix, nawh loh kix ih priex preem ka tobrie cie kix daux num an heue.
18 Khaix hoik sidah num an, kix deeh hoek ka nawh num khaix ah nin ka nawh, “Yix ang lai mox tidtix grawng uik mau tix sivoe maix cao simiang, tobrie yix khankix kawx, hoik mawh cie maix, yix ang lai koe tix ceu kawx, plak sivoe ngai maix, lheu khaing tokaux yix mai haktiex yix heue.
19 Kheu yix lai sang yaox ti yum ka sivoe ngai maix, khawm yix mai haktiex ti yuh ka mawx? liag ka yix mai haktiex cie yix, ka son pa ih, yix mai haktiex yix tak yuh siliex Pharaw mai ang yum mai son ang haktiex lai riem, tawx simie nghox ka yix heue.”
20 Yosiep liag haktiex Ejiptux khawmuik son Pharaw, mawh kheu pui Ejiptux khankix hoik coh kaung tix, jao kied sibhawm praix ka kix, haktiex khawmuik hoik mawh cie Pharaw heue.
21 Nawh gah pui haktiex hoek ot ka daux veng, jah khaing taoh mee haktiex Ejiptux, tom hoek ka caw mee haktiex heue.
22 Mawh ngie haktiex cao giex kaing li khankix pa ang nawh lai liag, mawh kheu Pharaw hoik tawx pa ih ka cao giex kaing li khankix mai kix hoik pon pa ih khaing Pharaw, kix tom ang lai yaox ti coh haktiex ti khankix heue.
23 Khaix an Yosiep ah nin ka pui khankix, “Aux hoik liag pex mai haktiex pex daux in singaix son Pharaw, jhak heue, teei simie son pex mai rhuat ka haktiex heue.
24 Yam hoik vawg pex nghox sax, pex tak yaox ti tawx ka Pharaw phwan son tix son, pon son tak mawh cie pex mai son simie kaung mai son priex ih pex daux nyiex ma mai priex ih son kawn praix pex khankix heue.”
25 Kix ah nin, “Maix hoik taoh ka ju yix, kieh yix mawh pa pon bwanson ka sivoe maix cao simiang ex liak mai yix tak mawh kawncau Pharaw heue.”
26 Yosiep yuh been pa dex mai meung Ejiptux, pa kaux cong tom in singaix, lheu khaing haktiex cie cao giex kaing li nong nong, pa ang mawh cie Pharaw, Pharaw tak yaox ti pon phwan son tix son heue.
Sijax Mukheu Yosiep Ka Yakop
27 Pui Isarelax ot ka daux haktiex Ejiptux, baoh Goshen mai kix nie baox koe kraung khrai mai nied ti baox haoh hun sipie heue.
28 Yakop ot ka daux haktiex Ejiptux kao aliah num, mai nawh koe ju tix yieh tixpon aliah num heue.
29 Yam hoek bawg yam dex sang yum Isarelax, nawh kok ka kawn simex tix Yosiep ah nin ka nawh, “Yam in phan aux hoik mawh pa pon bwanson ka sivoe ngai maix, deuh taix maix greem siviang ba aux mai koe krax caux rhawm, pa kaux sijax rahsee ka aux maix paw lai sipaung aux daux meung Ejiptux liak,
30 kieh aux it tau mai keeing aux, tax aux khankix, maix deeh viex aux lih khaing meung Ejiptux mai sipaung aux dee koe simeeig kix heue.” Yosiep ah nin, “Aux tak yuh awm lox pa krai maix heue.”
31 Isarelax ah nin, “Tiextu maix ka aux.” Mai nawh kawx tiextu khaix an, Isarelax gup tokaux tix piang kaing gaong ku it tix heue.