1 Yam in Yakop hoik ot ka haktiex pa hoik mawh keeing nawh nyo sinie, daux haktiex Khanan heue. 2 In mawh grawng doeh ru Yakop khankix. Yosiep koe ju kao aliah num mai nawh mawh cao liang yung mai pex tau mai puxke tix khankix, nawh ot tau mai kawn simex Bilaha mai kawn simex Zipalax, Bilaha mai Zipalax mawh moeng keeing nawh, Yosiep yie krai grawng phimap pa yuh kix ka keeing tix heue. 3 Yam in Isarelax kied moh ka Yosiep khaing kawn nawh khankix, kheu mawh nawh kawn simex pa pon nawh yam kuad riex ju tix mai caing nawh ceep kraung sibex pa mhawm grang pa shiang ka rawm rawn kuceu heue. 4 Viang mawh nan, yam yaox puxke nawh khankix ka kied moh keeing kix ka Yosiep khaing kix mai kix koeng ka nawh mai kix ang lai rhawm sikah ka nawh heue. 5 Yosiep camaox mai nawh krai puxke tix khankix mhong mai kix nie baox koeng ka nawh heue. 6 Nawh ah nin ka kix, “Yuh bwanson nghiet ka grawng pa hoik camaox aux liak, 7 jhak heue, yam vien ex lhiem nghox ka daux kaung, lhiem nghox cie aux, yaog ti cung see see mai lhiem nghox cie pex khankix kaoh cung hawt vung viang an mai krub ka lhiem nghox cie aux heue.” 8 Puxke nawh khankix ah nin ka nawh, “Tak sang kwang maix piang yix lie? phan ang mawh nan, tak sang mawh maix simiang yix lie?” mawh kheu nan, kix nie baox koeng ka nawh, ka grawng camaox pa krai nawh heue. 9 Khaix an nawh baox deeh camaox tix ceu mai nawh krai ka puxke tix khankix, nawh ah nin, “Jhak heue, aux hoik baox deeh camaox grawng tang ceu, singaix, khix mai simuing kao tix mu krub ka aux heue.” 10 Yam krai nawh ceu an ka keeing tix mai puxke nawh khankix, keeing kix ne raw nawh ah nin, “Grawng pa hoik camaox in, mawh grawng camaox ceu patix lie? Aux mai miex maix khawm puxke maix khankix, tak sang yaox ti hoek gup ti piang tiex plak sivoe ngai maix lie? 11 Puxke nawh khankix boh rhawm ka nawh, Ref 37:11 Cau 7:9 viang mawh nan, keeing nawh een tix tawng grawng in daux rhawm tix heue.

12 Khaix an puxke nawh khankix, hu liang yung mai pex cie keeing kix ka veng Shekhem heue. 13 Isarelax ah nin ka Yosiep, “Puxke maix khankix hu liang yung mai pex plak veng Shekhem ang mawh lie? Hoek heue, aux tak sang ploi maix hu ka kix.” Mai nawh deeh ah nin, “Aux koe tin heue.” 14 Nawh ah nin ka nawh, “Hu jhak yam in, mawh nyawm ot puxke maix khankix lie? deeh viex lox hoek ka aux” Mawh kheu nan nawh ploi nawh khaing ka daux lung Hebron mai nawh hoek ka veng Shekhem heue. 15 Pui tix kaux yaox ka lailing nawh ka daux tiag mai pui an chawk ka nawh ah nin, “Sawg maix patix lie?” 16 “Aux sawg ka puxke tix khankix” yuh bwanson krai aux mhong dee liang kix yung liak?” 17 Pui an ah nin, “Kix hoik lih hu khaing tin, mawh kheu hoik mhong aux ah kix nin, Hu ex plak veng Doktan” Mawh kheu nan Yosiep deeh hawt khaix puxke tix khankix mai yaox kix daux veng Doktan heue. 18 Yam yaox kix hoek nawh dee singai mai sivoe ang nawh nyang bax hoek dex kix, kix kum paox tix sonsang pah kix nawh heue. 19 Kix ah nin ka paox tix, “Jhak heue, cao camaox hoik hoek phao. 20 Ex!, ex pah nawh yum yam in mai tik nawh ka daux o tixdah dah, ex tak sang ah nin, mawh totiag tix ceuceu hoik kiied nawh, ex pau ti jhak grawng camaox nawh sang lih ti mawh yuh ka mawx.” 21 Yam mhong Rubin ka lox an mai nawh taoh Yosiep khaing daux tawm taix kix ah nin, “Ex paw doh pah nawh.” 22 Rubin ah nin ka kix, “Paw kieh nham jauh, ploi nawh ka daux o pa koe daux tiag, paw doh kieh taix pex krox ka nawh, ” Rubin keud ti sang taoh nawh khaing daux tawm taix kix mai deeh viex nawh ing ka keeing tix heue. 23 Mawh kheu nan yam hoek Yosiep ka puxke tix khankix mai kix peeik ti tik sibex pa mhawm grang pa shiang ka rawm rawn kuceu pa ceep nawh piang tix heue. 24 Kix teei ti ploi nawh daux o, daux o an ang koe tidtix mai rawm kawx ang koe ka heue. 25 Yam ngawm kix ti sang sawm, kix maong ti yaox ka ceu pui Ishamelax tix cub pa kaoh khaing haktiex Gilat tau mai kala-uk, kix tang ceu pa sioe bhawng peeh khaox Balasan, peeh khaox Muran khankix piang kala-uk kix mai viex hu ka meung Ejiptux heue. 26 Khaix an Yudax ah nin ka puxaik tix khankix, phan ex pah pux tix mai mox nham nawh, sang koe bwanson yuh ka mawx? 27 “Hoek heue, ex coh nawh ka ceu pui Ishamelax khankix mai paw kieh taix ex hoek piang nawh, kheu mawh nawh pux ex mai nex nham ex” mai puxaik nawh khankix nghiet ka lox nawh ku kaux heue. 28 Khaix an ceu pui Midian pa yuh lai geu khankix, pha ka dee ot kix tan, mawh kheu nan puxke nawh khankix bluh Yosiep lih khaing daux o mai coh nawh ka ceu pui Ishamelax ka mau tixnga Shekhe mai kix viex Yosiep hu ka meung Ejiptux heue.Ref 37:28 Cau 7:9 29 Yam deeh hoek Rubin ka daux o mai ang lai yaox Yosiep ka daux o, nawh riah ti tik kraung ceep tix jao heue. 30 Nawh deeh ing ka puxaik tix ah nin, “Kawn nyawm ang lai koe tan mai aux sang yuh ka mawx?” 31 Khaix an kix teei sibex Yosiep mai kix pah ka kawn pex tix mu mai cub sibex an daux nham, 32 Kix tawx sibex pa shiang ka rawm rawn kuceu mai viex hoek ka keeing kix ah nin, “Yix hoik yaox ka sibex in, jhak ti yaox mawh ang mawh sibex kawn maix lie?” 33 Nawh pon ci ka sibex an ah nin, “In mawh sibex kawn aux, totiag pa vao hoik kiied tix ih ka nawh mai Yosiep hoik phawng nex phawng nham heue.” 34 Khaix an Yakop riah kraung ceep tix mai fua nyoi tix ka chee rhix mai laux rhawm son kawn simex tix tom rheung singaix sawm heue. 35 Kawn praix nawh khankix, hoek ti khu rhawm nawh, nawh thiang ka lox khu rhawm kix ah nin, “Aux tak sang lih hu daux simeeig tau mai kawn simex tix, ka daux pa voi rhawm rhi tix” mawh kheu nan keeing nawh yiiem grai son Yosiep heue. 36 Pui Midian khankix, deeh coh Yosiep ka daux meung Ejiptux ka Pawtiphax, pa mawh cao kaing greem Pharaw, Pawtiphax mawh cao kaing naing, pa pau ju Pharaw heue.