33
Yakop Mai Esaw Yaox Paox tix
1 Yakop maong ti jhak, yaox ka hoek Esaw tau mai pui pon yieh kaux, mawh kheu nan, nawh gwieh ti tawx kawn nyawm khankix ka Leax mai Rakhelax khawm kawncau bun kiex ra kaux heue.
2 Nawh deuh kawncau bun ra kaux mai kawn nawh khankix hu sivoe tix, khaix kix mawh Leax mai kawn nawh, pa hu sigreung nawh deuh Rakhelax mai kawn nawh Yosiep ghoik khaix paox tix heue.
3 Khaix an nawh jah tix hu sivoe kix mai nawh gup piang tiex, aliah bawg, tom hoek nawh ka puxke tix heue.
4 Yam an, Esaw to tix hu rieb nawh mai kawm ka ngawg nawh mai ngheet paox tix mai yiiem heue.
5 Esaw yaog ngai tix mai yaox ka bun tau mai kawn nyawm khankix ah nin, “Pui pa ot mai maix khankix mawh pui mawx lie?” Yakop ah nin, “Kawn nyawm an khankix mawh bwanson pa hoik tawx Siyiex ka kawncau maix heue.”
6 Khaix an kawncau bun khankiex, viex kawn tix hoek mai krub ka nawh,
7 Leax kawx viex kawn tix khankix hoek mai krub ka Esaw, khaix an Yakop mai Rakhelax hoek dex mai kix krub ka nawh heue.
8 Esaw ah nin, “Cub tobrie pa yaox aux khankix, mawh pa yuh ka mawx?” mai Yakop ah nin, “Inkix mawh pa sang kieh aux mawh pa khaw caw rhawm ka sivoe maix simiang heue.”
9 Esaw ah nin, “Pux aux eue, aux mawh pui pa hoik kub, deeh priex pa koe maix khankix son cao maix awx.”
10 Yakop ah nin, “Ang mawh nan, phan awm hoik mawh pa khaw caw ka rhawm maix, rieb maix teei totaix in khaing daux taix aux liak, kied laoh lie ka hoik yaox aux ka pakngai maix, awm hoik yaox aux ka pakngai Siyiex, mawh kheu hoik rieb maix aux ka daux pa gaux rhawm tix.
11 “Yuh bwanson, rieb maix teei bwanson pa viex aux hoek ka maix liak, grawh grawng nawh, Siyiex hoik tawx bwanson ka aux, tom hoik kub hoik naog” Nawh niied tix khyox khaw mai nawh rieb ti teei heue.
12 Esaw ah nin, “Kieh ex deeh hu krax hu tix, aux tak hu sivoe maix heue.”
13 Yakop deeh ah nin ka nawh, “Simiang aux eue, awm hoik tawng maix, kawn nyawm khankix kawx kawn awn riang mai yung, pex, mawie khankix kawx, kawn koe kawn pa peuex tau mai aux, phan sidhiiet kix hu tix ngaix ngie, kix tee yum ka heue.”
14 “Mawh kheu nan kieh simiang aux hu sivoe ngai kawncau maix, aux tak koi thong tobrie pa koe tau mai aux mai kawn nyawm khankix, sonsang pon hoek tom dee ot maix simiang daux meung Sirax heue.”
15 Esaw ah nin, “Yam in kieh aux prah pui tix tiblah tau mai maix” Viang mawh nan nawh deeh ah nin, “Mawh koe grawng yuh ka mawx lie? kieh aux pon pa khaw caw rhawm maix simiang heue.”
16 Mawh kheu nan, Esaw deeh ing ka meung Sirax daux singaix an heue.
17 Yakop lih hu plak Sukok mai sum nyiex cao tix, tix lhang mai kawg son tobrie nawh khankix tan, mawh kheu nan, ceu kaux dee an tom kok mawh Sukok heue.
Yakop Hoek Meung Khanan
18 Yakop hoek ka veng Shekhem pa koe ka daux haktiex Khanan mai krax boek khaing kuceu, yam hoik kaoh nawh khaing haktiex Padan-aram, mai nawh sum nyiex gox ot tix, ka sivoe veng an heue.
19 Nawh liag gwang haktiex, Ref 33:19 Yaws 24:32; Yo 4:5 dee hoik sum nawh nyiex gox man tix, khaing kawn Hamo pa mawh keeing Shikhem tix yieh plah mau heue.
20 Ka dee an, nawh sum khu dee tan tix mu mai kok mawh Elelaw Isarelax heue.