30
1 Yam yaox Rakhelax ka ang ti koe kawn son Yakop tix kaux kawx, Rakhelax boh rhawm ka puxke tix mai nawh ah nin ka Yakop, “Tawx aux koe kawn praix, phan ang mawh nan, deuk ngie yum aux khaing heue.”
2 Yakop song rhawm ka Rakhelax mai nawh ah nin, “Khex mawh aux tang tokaux Siyiex, pa tawx maix ang chix koe kawn lie?”
3 Khaix an nawh ah nin, “Maix laig ot mai kawncau aux, Bilaha mai nawh tak koe kawn piang ngawng aux mai aux tak yaox ti cie kawn praix khaing nawh heue.”
4 Khaix an nawh tawx Yakop ka kawncau tix Bilaha awm moeng mai kieh nawh laig ot mai nawh heue.
5 Bilaha koe kaux mai keh kawn simex tix kaux son Yakop heue.
6 Khaix an Rakhelax ah nin, “Siyiex hoik prawng ca ka plak aux mai hoik mhong ka lox aux mai tawx kawn simex tix kaux ka aux, ” mawh kheu nan, kiex tom kok ceu kaux nawh mawh Dan heue.
7 Kawncau Rakhelax Bilaha baox koe kaux mai keh kawn simex ra kaux tix kaux son Yakop heue.
8 Khaix an Rakhelax ah nin, “Aux hoik silah tix blok paox tix mai puxke aux mai aux hoik pex ka, ” mawh kheu nan, kiex tom kok ceu kaux nawh mawh Napthalix heue.
9 Yam yaox Leax ang ti lai koe kawn, nawh tawx Yakop ka kawncau tix Zilapax mawh moeng nawh heue.
10 Kawncau Leax pa mawh Zilapax keh kawn simex tix kaux son Yakop heue.
11 Leax ah nin, “Aux hoik mhawm son, ” mawh kheu nan, kiex kok ceu kaux nawh mawh Gat heue.
12 Kawncau Leax, Zilapax baox keh kawn simex ra kaux tix kaux, son Yakop heue.
13 Leax ah nin, “Aux kied gaux rhawm! mawh kheu kawn bun khankix, tak kok aux mawh pa koe bwanson, ” mawh kheu nan, kiex tom kok ceu kaux nawh mawh Asha heue.
14 Yam hoek bawg yam vawg nghox ca Rubin hu ka daux kaung, nawh yaox plix makkheu niex mai viex ing ka miex tix Leax heue. Khaix an Rakhelax tom ah nin ka Leax, tawx plix makkheu niex pa viex kawn maix tiblah ka aux liak.
15 Kiex deeh ah nin ka nawh, “Pa teei maix mex aux hu keud maix mawh grawng pa kawn iak lie? mawh sang baox teei maix plix makkheu niex, khaing kawn simex aux lie?” Rakhelax tom ah nin, “Phan maix tawx aux ih plix in, aux tak tawx mex tix it tau mai maix daux bo in heue.”
16 Yam hoek Yakop khaing daux kaung plak bo, Leax lih hu plak praix mai rieb nawh, ah nin, “Maix caw ti laig ot mai aux, mawh kheu aux hoik vai maix ka plix makkheu niex, pa viex kawn simex aux.” Daux bo an, nawh it mai kiex heue.
17 Siyiex nghiet ka lox Leax mai nawh baox koe kaux mai keh kawn simex phwan kaux tix kaux son Yakop heue.
18 Leax ah nin, “Mawh kheu hoik tawx aux, kawncau bun tix ka mex tix, Siyiex hoik tawx ngawh vai aux, ” mai kiex tom kok ceu kaux mawh Issakha heue.
19 Khaix an Leax baox koe kaux mai keh kawn simex liah kaux tix kaux, son Yakop heue.
20 Leax ah nin, “Siyiex hoik tawx totaix pa mhawm ka aux, yam in mex aux, tak ot tau mai aux jheung jheung, kheu hoik keh aux kawn simex liah kaux son nawh, ” mawh kheu nan, kiex tom kok ceu kaux mawh Zebulun heue.
21 Khaix an nawh baox keh kawn bun tix kaux mai kok ceu kaux mawh Dina heue.
22 Siyiex deeh doh keud ka Rakhelax mai Siyiex nghiet ka lox nawh mai baox tawx nawh koe kawn heue.
23 Nawh koe kaux mai keh kawn simex tix kaux. Nawh ah nin, “Siyiex hoik teei krax pa salao aux hu.”
24 Mawh kheu nan, kiex tom kok ceu kaux nawh mawh Yosiep ah nin, “Kieh Siyiex baox tawx kawn simex tang kaux ka aux heue.”
Pa Sidu Rhawm Yakop Mai Laban
25 Khaix hoik keh Rakhelax ka Yosiep, Yakop ah nin ka Laban, “Ploi aux hu, sonsang deeh aux ka haktiex dee ot tix heue.
26 Tawx moeng aux mai kawn aux khankix pa hoik yuh aux tix tawx kaing ka maix son kix mai kieh aux lih hu, mawh kheu hoik tawng maix ka kaing pa yuh aux son maix heue.”
27 Laban ah nin ka nawh, “Kieh mawh awm pa koe rhawm maix, aux hoik tawng Simiang Siyiex nawb bwan piang aux jao maix.”
28 Khaix an nawh ah nin, “Sawn ngawh riang kaing maix ka aux mai aux tak sang tawx heue.”
29 Yakop ah nin ka nawh, “Maix hoik tawng yuh aux kaing son tix miex ding mai hoik tawng tobrie tix koe ka aux miex ding”
30 “Sivoe ang aux nyang hoek, kraung khrai maix koe ngie ceeix khaing, yam in hoik haok hwan tom nie, Simiang Siyiex hoik nawb bwan ka maix glang yam hoek aux heue. Mawh kheu nan aux tak yaox ti sang nyiex ma tix yam mawx lie?”
31 Nawh ah nin, “Aux sang tawx ceu patix ka maix?” mai Yakop deeh ah nin, “Paw lai tawx tix ceu kawx ka aux, phan maix simie ti yuh bwanson ka aux, kieh aux baox deeh liang mai priex ka cub yung maix khankix heue.”
32 “Daux in singaix aux sang hu ciied ti yaox ka phung yung, phung pex cie maix khawmuik, aux sang gwieh ti deuh kawn yung pa preeh cun mai pa lung khankix khaing paox tix mai aux deeh sang gwieh ti deuh kawn pex pa preeh pa lung hauk khankix. In khawmuik tak mawh ngawh riang kaing yuh aux heue.”
33 “Mawh kheu nan maix tak yaox krax rahsee aux, yam krai aux ngawh riang tix sivoe ngai maix. Can pex pa ang preeh mai yung pa ang lung khankix, phan koe mai aux maix tak ah mawh pa briex aux cie maix heue.”
34 Laban ah nin, “Kieh mawh awm lox pa ah maix heue.”
35 Ka daux singaix an Laban tang gwieh pex mhaing preeh mai pa lung, khawm pex shiang preeh cun mai pa lung mai baox laug pex paing mai kawn yung pa lung khankix mai nawh ap ka kawn simex tix heue.
36 Nawh khan sinax dee ot tix mai Yakop singai khaing paox tix loe singaix krax mai Yakop deeh liang ka cub yung mai cub pex Laban pa kawn deuk khankix heue.
37 Yakop teei gawng khaox klai Lipanax, Luzax mai Aramon mai kheet ti tik lhox nawh, sonsang sidawng pa klai pa paing ti yaox mhawm mhawm heue.
38 Nawh jung ti deuh gawng khaox pa hoik kheet ti lhox khankix sivoe yung mai pex ka dee nyaux rawm mai hawt dawng rawm nyaux kix. Inkix mawh sonsang koe kaux kix yam hoek ti nyaux rawm heue.
39 Cub yung mai pex khankix, koe kaux mai keh pa preeh mai pa lung hauk khawmuik heue.
40 Yakop tang gwieh yung mai pex pa preeh, pa preeh cun mai pa lung cie nawh khankix. Veeh ngai tix ka plak cub yung mai cub pex Laban mai nawh tang deuh cub yung mai pex cie tix nong nong khaing cie Laban heue.
41 Yam sikeeing tobrie pa ting riang khankix ka paox tix, sonsang koe kaux ka yaox ti khaox an, Yakop tom jung gawng khaox an sivoe ngai dee chix yaox kix ka dee nyaux rawm heue. Mawh sonsang koe kaux kix mai gawng khaox an heue.
42 Viang mawh nan, nawh ang deuh gawng khaox an ka sivoe ngai cub yung mai pex pa awn riang, pa awn riang mawh cie Laban mai pa ting riang mawh cie Yakop heue.
43 Yakop baox nie magmi hu sipie mai nawh koe tobrie tom nie pa mawh yung, pex, kawncau simex kawncau bun, kala-uk mai la haoh hun heue.