1 Khaix an Icak hoik riex ju mai ngai nawh hoik vuvi ang lai chix yaox ka, nawh kok ka kawn Ai tix Esaw ah nin ka nawh, “Kawn simex eue, ” nawh pawk lox ah nin, “Aux ot tin heue.” 2 Nawh ah nin, “Jhak heue, aux hoik kuad mai aux ang lai tawng singaix pa sang yum tix heue.” 3 “Yam in, teei kraung naing maix, pa mawh ak mai te, lih hu daux tiag mai yuh tom pon sawg ti viex nex totiag son aux heue.” 4 “Khre taux nex pa jiet nyawm, pa moh aux ti ih mai viex hoek ka aux, aux tak ih mai aux tak nawb bwan piang maix sivoe sang yum aux heue.” 5 Ref 27.5: Jah 12.3; Si 24.9.Rebekkax jawm tix nghiet ka lox krai Icak ka kawn simex nawh Esaw. Yam lih hu Esaw ka daux tiag sonsang viex nex totiag hoek, 6 Rebekkax krai ah nin ka kawn simex tix Yakop, “Aux hoik mhong lox krai keeing maix ka puxke maix Esaw yuh nin, 7 ‘Viex nex totiag mai khre priex nyawm son aux, aux tak ih mai nawb bwan piang maix, plak sivoe ngai Simiang Siyiex sivoe yum tix heue.’ 8 Mawh kheu nan yam in, kawn simex aux eue, nghiet ka lox aux awm pa nhie aux maix yuh heue. 9 Yam in hu ka daux phung pex mai viex kawn peh ra mu hoek ka aux, aux tak khre priex nyawm son keeing maix, awm pa moh nawh ti ih, 10 mai viex keeing maix ih an, sonsang nawb nawh bwan piang maix sivoe sang yum tix heue.” 11 Yakop deeh ah nin ka miex tix Rebekkax, “Jhak heue, puxke aux Esaw mawh pa koe hauk mai aux mawh pui plang nex ang mawh lie? 12 Keeing aux tee rien ti pu pi aux mai nawh tak keud aux awm pui pie lhen, aux lhat ti pon krax pa jhax lawg mai ang pon bwanson heue.” 13 Miex nawh deeh ah nin ka nawh, “Kieh krax pa jhax lawg ka maix an hoek piang aux, kawn simex aux eue, nghiet ka lox krai aux khaing, hu teei pa ah aux heue.” 14 Nawh lih hu mai teei ti tawx ceu an ka miex tix, mai miex nawh khre priex pa nyawm pa moh keeing kix ka heue. 15 Khaix an Rebekkax teei kraung ceep pa mhawm kawn Ai tix Esaw pa koe daux nyiex mai nawh kieh kawn simex iak tix Yakop ceep ka, 16 nawh lhop hak pex piang taix nawh mai dee plang ngawg nawh, 17 mai nawh tawx priex pa nyawm mai blah pa hoik cox khre tix, ka daux taix kawn simex nawh Yakop heue. 18 Mawh kheu nan, Yakop hu ka keeing tix ah nin, “Keeing eue, ” mai nawh pawk ah nin, “Aux ot tin, kawn simex eue, mawh maix pa mawx?” 19 Yakop ah nin ka keeing tix, “Aux mawh kawn Ai maix Esaw heue. Aux hoik khre, awm pa hoik krai maix, kaoh ih nex totiag pa viex aux mai maix nawb bwan piang aux heue.” 20 Viang mawh nan, Icak ah nin ka kawn simex tix, “Kawn eue, maix phex phai yaox inkix yuh ka mawx?” Nawh pawk ah nin, “Mawh kheu Simiang Siyiex maix, pa hoik viex hoek ka aux heue.” 21 Khaix an Icak ah nin ka Yakop, “Hoek dex tin, aux sang pu pi ti yaox mawh ang mawh kawn Ai aux Esaw heue.” 22 Mawh kheu nan, Yakop hu dex keeing tix Icak mai nawh sibeet ti yaox nawh ah nin, “Lox maix tom mawh lox Yakop mai taix maix tom mawh taix Esaw heue.” 23 Nawh ang lai tawng ka nawh, kheu taix nawh jiet awm hauk taix puxke nawh Esaw, mawh kheu nan, nawh nawb bwan piang nawh heue. 24 Khaix an nawh deeh ah nin, “Rug mawh maix kawn Ai aux Esaw lie?” Nawh pawk ah nin, “Mawh aux heue.” 25 Nawh deeh ah nin, “Viex nex an hoek ka aux, aux tak ih nex totiag cie kawn simex aux, mai aux tak nawb bwan ka maix heue.” Mawh kheu nan nawh viex nex hoek ka nawh mai nawh ih ka an mai ka rawm plix siiet kawx nyaux ka heue. 26 Khaix an keeing nawh Icak ah nin ka nawh, “Kawn eue, hoek dex aux yam in mai ngheet ka aux heue.” 27 Yakop hoek dex mai ngheet ka nawh, nawh mhong jhawm sioe kraung ceep nawh mai nawb bwan ah nin, “Jhawm sioe kraung ceep kawn simex aux awm sioe pa kaoh khaing daux kaung pa hoik nawb Siyiex bwan ka heue. 28 Kieh Siyiex tawx rawm ciex raoma mai bee haktiex mai nghox koi mai rawm plix siiet tom nie ka maix heue. 29 Kieh pui khankix yuh kaing son maix mai kieh ceu pui khawmuik grux ngawng ka maix heue. Kieh maix mawh cao kaing piang puxaik kawn keeing tix mai kieh kawn simex miex maix khankix, grux ngawng ka maix heue. Can pui pa jhax lawg ka maix, kieh nawh yaox krax pa jhax lawg mai can pui pa nawb bwan ka maix, kieh pon bwanson heue.” Ref 27:29 Jah 12:3 Ref 27:27-29 He 11:20

30 Khaix hoik nawb Icak bwan ka Yakop dom mawx dom an mai yam tak khraox lih hu Yakop khaing keeing tix Icak, puxke nawh Esaw hoek khaing leue tix tiag heue. 31 Nawh khre priex pa nyawm mai viex hoek ka keeing tix ah nin, “Keeing eue, kaoh ih nex totiag pa pon kawn simex maix, sonsang nawb maix bwan piang aux heue. 32 Keeing nawh Icak ah nin ka nawh, “Mawh maix pa mawx?” Nawh ah nin, “Aux mawh kawn Ai maix Esaw heue.” 33 Khaix an Icak yaoh siyaung ka tete mai nawh ah nin, “Mawh pui mawx lie? kaw pa hu leue totiag mai viex nex hoek ka aux koe dee mawx?, aux hoik ih cie nawh khawmuik, sivoe ang maix nyang hoek, aux hoik nawb bwan piang nawh mai nawh tak pon bwanson tete heue.” 34 Yam hoik mhong Esaw lox keeing tix, nawh riag yo mai yiiem sigrien sigre mai nawh ah nin ka keeing tix, “Keeing eue, nawb bwan ka aux liak, piang aux kawx nawb bwan liak” 35 Viang mawh nan nawh ah nin, “Pux maix hoek pie lhen mai hoik teei bwanson pa nawb aux hu heue.” 36 Esaw ah nin, “Ang nawh hoik mawh pa kok ceu kaux mawh Yakop lie? mawh kheu nawh hoik pie lhen ka aux ra bawg, yam jah nawh hoik teei ti cie ara kawn AiRef 26:26 Jah 21:22 mai jhak heue, yam in nawh baox teei bwanson cie aux”, nawh baox ah nin, “Maix ang lai deuh bwanson tix ceuceu son aux lie?” 37 Icak deeh pawk lox ah nin ka Esaw, “Aux hoik kieh nawh mawh cao simiang maix, aux hoik kieh puxaik nawh khankix mawh kawncau nawh, aux hoik kieh nawh grum naog ka nghox koi mai rawm plix siiet, kawn eue, aux kawn sang chix yuh ceu patix son maix lie?” 38 Esaw ah nin ka keeing tix, “Keeing eue, bwanson ang lai koe ka maix tix ceu kawx lie? nawb bwan ka aux liak, baox nawb bwan ka aux” Esaw riag yo lox tix mai yiiem heue.Ref 27:38 He 12:17 39 Khaix an keeing nawh Icak pawk lox nawh ah nin, “Jhak heue, dee ot maix tak sang mawh dee koe bee haktiex mai dee koe rawm ciex khaing raoma heue. 40 Maix tak eei ju tix ka vaid mai tak yuh kaing son pux tix, yam hoik pon tieh feen maix ka nawh maix tak pon luan khaing pa kwang nawh heue.”Ref 27:40 2Sim 8:20; 2Been 21:8 Ref 27:39-40 He 11:20

41 Esaw koeng ka Yakop jao hoik nawb keeing kix bwan ka nawh, Esaw ah nin daux rhawm tix, “Singaix pa laux rhawm aux, jao keeing tix hoik dex, khaix an aux tak sang pah ka pux tix Yakop heue.” 42 Mawh kheu nan Rebekkax hoik mhong ka lox sikah kawn Ai tix mai nawh kok ka kawn simex iak tix Yakop ah nin ka nawh, “Puxke maix Esaw sang yuh krax fah rhawm tix sonsang pah maix yum heue.” 43 “Yam in kawn simex aux eue, nghiet ka lox krai aux ha, kaoh mai to hu ka prie aux Laban pa ot ka daux veng Haran sonsang glawd maix, 44 ot tau mai nawh ti vud ti cu, glang ang krax song rhawm puxke maix nyang grai heue. 45 Tom sidah grai krax song rhawm nawh mai yam hoik piawm nawh pa yuh maix ka nawh, khaix an, aux tak deeh tawm maix hoek khaing tan. Aux tak sang kieh pax khawm ra grai khaing ngai tix ka daux tix ngaix ngie yuh ka mawx?” 46 Rebekkax ah nin ka Icak, “Aux hoik kied laux rhawm jao kawn bun Hetax khankix. Phan Yakop baox teei ti moeng bun Hetax, daux haktiex in tix kaux kaux, krax im ju aux chix koe bwanson yuh ka mawx?”