4
1 Aux ah nin, yam ca kawn mawh kaw pa sang pon sin kawn nyawm, nawh ang siyox khaing pa mawh siliex, viang mawh nawh cao sin khawmuik kawx,
2 Tak lai ot greem pui pa pau mai pa kia ngien khankix tom hoek singaix pa hoik ciak keeing nawh ti deuh heue.
3 Awm an ex kawx, yam mawh ex kawn nyawm, hoik een ti kieh mawh siliex greem been haktiex pa ang grum naog heue.
4 Viang mawh nan yam hoik naog bawg yam, Siyiex ploi Kawn tix lih keh khaing bun, keh ka greem lox lai beenli,
5 son sang taoh Nawh ex, pa ot ka greem lox lai beenli, son sang pon ex ti mawh kawn Nawh heue.
6 Kheu mawh ex kawn, Siyiex hoik ploi Khuan Kawn tix ka daux rhawm ex ti yo, “Abax Keeing eue”.
7 Mawh kheu nan pex ang baox lai kawn mawh siliex, mawh kawn heue. Phan mawh kawn, mawh pa sang pon sin kheu Siyiex heue.Ref 4:5-7 Ro 8:15-17.
Pawlux Khi Son Ceu Cao Kalatix
8 Glang ka in kheu ang tawng ka Siyiex, pex tom hoik mawh siliex ka kix pa ang mawh siyiex.
9 Yam in pex hoik tawng ka Siyiex, phan ang mawh nan nie lheu mawh Siyiex hoik tawng ka pex, pex lai deeh tieh ti hu ka lox been pa ang grum naog, pa bhaw riang mai pa ang koe bwanson, pex khex simie ti baox deeh mawh siliex lie?
10 Pex lai twah klaung ka singaix mai jhong khix mee num.
11 Aux lhat kheu grawh grawng pex, ha pa nyhap sidieb aux kox mawh pa giex going son pex heue.
12 Puxaik khankix eue, aux khyox khaw ka pex, kieh mawh awm aux, kheu aux kawx hoik mawh awm pex heue. Pex ang lud tidtix ka aux,
13 Pex hoik tawng mawh kheu grawng jhawm saux, aux tom hoik sidiex lox bwan gaux rhawm ka pex bawg phao ka,
14 ceu pa mawh pa nyaw glaw ka pex ka daux nex nham aux, pex ang lai nieb yuh mai ang tik, viang mawh nan pex rieb ti teei aux, awm mawh aux kawncau Siyiex mai Yesux Khrit heue.
15 Phan mawh nan pa hoik gaux rhawm pex an koe dee mawx? Grawh grawng nawh, aux kham mhai rug, phan chix, pex tee hoik koik ngai tix mai tawx ka aux heue.
16 Kheu hoik krai aux pa mawh meh ka pex, khex lih mawh aux pui pa koeng ka pex lie?
17 Kix nied ti coca grawng pex, ang mawh son ceu pa mhawm. Kix simie ti klat pex ot plak praix, son sang nied pex ti coca son kix heue.
18 Viang mawh nan pa nied ti coca ka daux ceu pa mhawm. Mawh pa mhawm, ang joeng mawh ngie yam ot aux tau mai pex heue.
19 Kawn nyawm iak aux, pa baox deeh loi aux ti keh, tom hoik lih mawh Cao Khrit ka daux pex khankix eue.
20 Yam in kawx, aux kied simie ti ot tau mai pex, sonsang pon aux ti tieh loh, lox aux, mawh kheu kied daox aw aux ka grawng pex heue.
Lox Tiag Grawng Hagarax Mai Sara
21 Krai ka aux liak, pex pa simie ti ot greem lox lai beenli khankix eue, ang pex nyang mhong lox lai beenli lie?
22 Hoik tiiem ti deuh grawng Abraham koe kawn simex ra kaux, Ref 4:22 Jah 16:15.tix kaux mawh pa koe khaing bun pa mawh siliex mai tix kaux mawh pa koe khaing bun pa mawh pui ploi heue.Ref 3:22 Jah 21:2.
23 Kawn simex pa koe khaing bun siliex an hoik keh hawt been nex nham, viang mawh nan kawn simex pa koe khaing bun pa ploi an, mawh pa keh kheu lox sijax mukheu heue.
24 Grawng ceu in khankix koe lox tiag heue. Bun in kiex, mawh sijax mukheu ra mu, tix mu mawh pa kaoh khaing gawng Sina, pa mawh Hagarax, pa keh kawn tix mawh siliex heue.
25 Hagarax mawh gawng Sina pa koe ka daux meung Arebia, veng Yerusaliem pa koe yam in, pa hoik mawh siliex tau mai kawn praix nawh heue.
26 Veng Yerusaliem pa koe dee long, mawh pa ploi, pa mawh miex ex heue.
27 Hoik tiiem ti deuh ah nin, “Bun neh pa ang sax keh kawn eue, gaux rhawm heue. Bun pa ang yaox ti geu pa saux yha eue, kok yo kah heue. Bun pa hoik grham an, nie lheu koe kawn khaing bun pa koe mex an heue.” Ref 4:27 Isa 54:1.
28 Puxaik khankix eue, ex mawh kawn lox sijax mukheu awm hoik mawh I cak heue.
29 Awm kaw pa hoik keh hawt been nex nham yam an hoik tuktiak ka kaw pa hoik keh hawt Khuan Cao,Ref 4:29 Jah 21:9. yam in kawx mawh nang nan heue.
30 Lox phuk lai sigang khri ah ka mawx? “Grheu ti tik bun siliex mai kawn simex kiex, mawh kheu kawn simex bun siliex, tak ang lai pon sin tau mai kawn simex bun pa ploi heue.”Ref 4:30 Jah 21:10.
31 Mawh kheu nan puxaik khankix eue, ang ex mawh kawn praix bun siliex, mawh kawn praix bun pa ploi heue.