25
Pa Tan Son Pa Singax
(Lih 35:4-9)
1 Siyiex krai ah nin ka Mose,
2 “Krai ka pui Isarelax khankix, sonsang viex kix krax pa tan ti ka Aux, maix tak rieb ti teei khaing pui pa gaux rhawm tix tan ka Aux ku kaux.
3 Krax tan pa caw maix ti teei rieb khaing kix, tak mawh khri, mau mai tawng,
4 kraung klai raoma mai kraung pa lung pliex mai kraung pa raoh rawt khawm kraung man pa taing ti ka keei ceu pa mhawm mai kraung hauk pex khankix,
5 hauk kawn yung pa hoik siang tix raoh, hak phix mai khaox Akashax.
6 Bee pa sang tok, bee pa sang groi mai ceu pa sioe bhawng son nyawng bhawng pa sang gleeing.
7 Siang simaox bawd raoh, siang simaox pa sang tok ka naok sibex dhah dawd taix ceep cao giex kaing li khankix.
8 Kieh kix yuh dee singax son Aux mai Aux tak ot sinax kix.
9 Maix tak yuh awm pa hoik jhi Aux ka maix khankix, pa mawh pakpeung nyiex gox bwan man mai pakpeung kraung khrai khawmuik heue.
Khui Sijax Mukheu
(Lih 37:1-9)
10 “Kix tak yuh khui bwan tix mu ka khaox Akashax, krax lang ra sawk mai tix diex, krax vieh tix sawk mai tix diex, krax lhaong tix sawk mai tix diex.
11 “Maix tak om ka khri naw plak daux mai plak praix mai kawb khri ka praok vung viang khawmuik.
12 Maix tak yuh jeep khri pon mu mai kab ka daog khui bwan an pon plak. Kieh jeep khri koe tix plak ra mu mai kieh jeep khri an ra mu koe ka an tix plak ra mu.
13 Maix tak yuh khaox glawm ka khaox Akashax mai om an ka khri.
14 Maix tak sau khaox glawm ka daux maox jeep khri an, pa hoik kab tix ka daog khui bwan sonsang klawm kix an kah.
15 Tak kieh khaox glawm laig ka daux jeep khri khui bwan mai ang pon ti teei lih khaing daux an.
16 Maix tak sau mhai rug pa sang tawx Aux ka maix daux khui bwan an.
17 Maix tak deeh yuh dawb khui bwan pa caux rhawm an ka khri, krax lang kieh koe ra sawk mai tix diex, krax vieh tix sawk mai tix diex.
18 Maix tak yuh riang Cherubin ra mu ka khri mai kab ka piang toh dawb khui bwan pa caux rhawm plak in plak an.
19 Deuh riang Cherubin ka daog plak in tix mu mai ka daog plak an tix mu maix tak kieh riang Cherubin pa koe daog khui bwan rop ti mawh tix mu tau ka dawb khui dang ngeung pa caux rhawm an.
20 Riang Cherubin tak di pruik tix ka piang khui bwan mai tawb dawb khui bwan ka pruik tix mai rhax lai veeh plakngai ka plak paox tix, plakngai Cherubin khankix jhak ka daog khui bwan dang ngeung pa caux rhawm an.
21 Maix tak tawb dawb khui bwan pa caux rhawm an ka piang khui bwan maix tak sau ceu pa kham mai mhai rug pa sang tawx Aux ka maix ka daux khui bwan.
22 Aux tak sipub maix tan mai sikah tau mai maix khaing ka piang khui bwan pa caux rhawm ka daux sinax riang Cherubin ra mu ka piang khui pa kham sakse, Aux tak tawm gumlox ka maix son pui Isarelax khankix heue.
Grawng Grah Deuh Blah
(Lih 37:10-16)
23 “Maix deeh yuh pheen tix mu ka khaox Akashax, kieh lang ra sawk, vieh tix sawk mai krax lhaong tix sawk mai tix diex.
24 Maix tak om ka khri naw mai kawb khri ka hawt vung viang an.
25 Maix tak yuh lat koe tix tawp taix mai kawb hawt vung viang an ka khri.
26 Maix tak yuh daux jeep khri pon mu mai sau ka caong pheen khawm pon daog.
27 Kieh jeep khri an dex mai lat pheen, sonsang giex khaox glawm pa klawm ka pheen.
28 Maix tak yuh khaox glawm ka khaox Akashax mai om ka khri, sonsang pon klawm ka pheen.
29 Maix tak yuh pan, lawk tuh, klong mai kawk nyaux pa sang lhauk pa dex mai kraung pa shiao piang pheen maix tak yaox ti yuh ceu ankix ka khri nawnaw.
30 Maix tak deuh blah pa tan tix ka piang pheen an sivoe Aux jheung jheung.Ref 25:30 Krub 24:5-8
Pang Jawk Ten Khri
(Lih 37:17-24)
31 “Maix tak yuh jawk ten khri tix mu, ka khri nawnaw, jaong num, pang nawh khankix tak bre ti tawk ka daix, kawk nawh, plix nawh mai tai nawh khankix kieh lih mawh tix mu tau mai an.
32 Kieh kak lih koe khaing pang jawk ten khri tix plak loe mu.
33 Kak loe kak pa lih khaing pang jawk ten khri, ka piang, ku mu koe tux tai kraox nhawng ka mai caw ti koe kawk loe mu pa awm grang plix Batan,
34 Ka piang pang jawk ten khri kieh koe pa awm tux tai kraox nhawng tau mai kawk pon mu pa awm grang plix Batan.
35 Kak khankix pa lih khaing pang jawk ten khri liah kak, ka greem kak khawm ra plak caw ti koe tux tai ka tix plak tix mu.
36 Tux tai mai kak khankix tak kleuk ti mawh tix mu tau, pang jawk ten khri an khawm kreng tak mawh pa yuh ka khri naw.
37 Maix tak yuh kawk ngu aliah mu, mai tok ka kawk ngu an, sonsang jhan pa riang ka sivoe pheen.
38 Sigiiep ngu mai kawk sau sigiiep ngu kawx, tak mawh pa yuh ka khri naw.
39 Can kraung pa shiao ka pang jawk ten khri khankix, tak caw ti yuh ka khri naw.
40 Rien tix sonsang yuh maix kuceu awm pa khaw mai grang pa hoik jhi Aux ka maix ka piang gawng heue.”Ref 25:40 Cau 7:44; He 8:5