23
Been Son Khawmuik
1 “Maix ang pon ti krai lox pao pa ludRef 23:1 Lih 20:16; Krub 19:11-12; Pi 5:20 maix ang pon rom taix tix kham sakse pa ang mawh meh tau mai pui pa ang rahsee.”
2 “Maix tak ang pon ti hawt khaix pui hun mai yuh pa caox caig maix tak ang pon kham sakse pa ang rahsee pui ting pui hun, sonsang via khaing pa rahsee,
3 Yam prawng maix see paw jhak pakngai pui hot sia.Ref 23:3 Krub 19:15
4 “Phan maix yaox ka mawie, la pui koeng ka maix hoik lud krax maix tak deeh tuk hoek tawx ka nawh.”
5 Phan maix yaox ka la cie pui pa koeng maix ka, goh greem lhang kraung ciien tix maix tak ang pon ti via sonsang teem ka maix tak caw ti teem kah tete.Ref 23:4-5 Pi 22:1-4
6 “Maix tak ang pon ti prawng ca ka pui hot sia ka daux krax pa ang see.
7 “Kieh tokaux maix singai khaing pa ang mawh ang meh, paw pah ka pui pa ang koe phimap mai pui pa rahsee, mawh kheu Aux tak ang pluat ploi ka pui pa ang rahsee.
8 Maix tak ang pon ti teei mau chun praok, mawh kheu mau chun prauk tak kieh ngai pui pa koe cuyi dug mai kieh gumlox pui rahsee khankix lud krax.Ref 23:6-8 Krub 19:15; Pi 16:19
9 “Pex tak ang pon ti yuh pa khin ka nyo sinie, kheu hoik mawh pex nyo sinie ka daux haktiex Ejiptux, pex tawng rhawm rhi nyo sinie heue.”Ref 23:9 Lih 22:21; Krub 19:33-34; Pi 24:17-18; 27:19
Prawng Son Singaix Twah
10 “Maix rhuat simie liah num ka daux ma kaung maix mai khrawm ka plix,
11 Ka daux num aliah maix ang lai yaox ti yuh mai prah laux tix, mawh kheu nan, pui pa hot sia paox ceu pui maix khankix tak yaox ti sum tix ih ka, can pa deuk an, to tiag tak yaox ti ih ka. Maix tak yaox ti yuh sipeem plix siiet maix mai sipeem khaox sanlun maix awm an.Ref 23:10-11 Krub 25:1-7
12 “Ka daux liah singaix maix tak yuh kaing jhaw tix mai ka daux singaix aliah maix tak laux lee ti, Ref 23:12 Lih 20:9-11; 31:15; 34:21; 35:2; Krub 23:3; Pi 5:13-14 mawie mai la maix khankix kawx tak yaox ti laux lee tix, siliex simex siliex bun maix mai nyo sinie maix, tak deeh pon riang rao khraox kah.
13 Rien rhawm ka can ceu pa hoik krai Aux ka maix, paw krai min ceu kaux siyiex tang kaux mai paw kieh pui mhong grawng in khankix khaing jheeh maix heue.
Pawie Ting Loe Ceu
(Lih 34:18-26; Pi 16:1-17)
14 “Ka daux tix num maix tak yuh pawie ka son Aux loe bawg.”
15 “Maix tak yuh pawie blah pa ang sau susaix, pawie Azumax, Ref 23:15 Lih 12:14-20; Krub 23:6-8; Si 28:17-25 maix tak ih blah pa ang sau susaix aliah singaix, awm gumlox pa hoik tawm Aux ka maix, bawg yam hoik tat Aux ti deuh daux khix Abibalax, mawh kheu daux khix an maix hoik lih hu khaing meung Ejiptux. Pui tix kaux kawx ang pon ti hoek plak sivoe ngai Aux mai taix yi tix.”
16 “Maix tak yuh pawie gaing nghox, pa mawh pawie pa pon maix plix khaox plix ox pa liang khaing riang raoRef 23:16 Krub 23:15-21; Si 28:26-31 tix pa hoik sum maix daux ma kaung mai pawie khrawm maix plix khaox plix ox ka riang rao maix khaing daux ma kaung bawg yam sidah num.Ref 23:16 Krub 23:39-43
17 “Ka daux tix num pex can pa mawh nyawm simex khawmuik, tak yaox ti bleeh ka sivoe Siyiex loe bawg.”
18 “Maix tak ang pon ti tan nham pa hoik appong ti ka Aux, tau mai blah pa koe susaix mai ang pon ti priex bee pa hoik appong tix ka Aux, deuk tom hoek plak ponngawb.”
19 “Plix khaox plix ox pa liang maix ti pon khaing haktiex khankix tak viex laig ka daux nyiex bwan Siyiex maix.Ref 23:19 Pi 26:2 “Maix tak ang pon ti ngaik nex kawn pex daux rawm teeih miex nawh heue.Ref 23:19 Pi 14:21
Gumlox Sijax Mukheu
20 “Aux ploi kawncau Siyiex ka sivoe maix, sonsang kia ngiien ka maix daux krax mai sonsang viex maix hu ka dee hoik khre rien Aux.”
21 Rien rhawm mai cu nghiet ka lox nawh, paw thiang ka nawh, mawh kheu nawh tak ang pluat ploi phimap pex, mawh kheu min ceu kaux Aux hoik koe ka daux nawh.
22 “Phan maix cu nghiet ka lox nawh mai hawt ti yuh awm pa krai Aux khawmuik, Aux tak koeng ka pui pa koeng ka maix khankix mai Aux tiebtie ka pui pa tiebtie ka maix.”
23 “Kawncau Siyiex Aux tak hu sivoe maix mai viex maix laig ka dee ot ceu pui Amawrix, ceu pui Hitix, ceu pui Pharazix, ceu pui Khananix, ceu pui Hiwix mai ceu pui Yebusix khankix, Aux tak yuh kix laux leeing,
24 “Maix tak ang pon ti ngeuh kaing tix ka siyiex kix mai hawt beenli kix mai yuh kaing awm pa yuh kix maix tak klup ti tik an khawmuik mai raig ti tik riang grang krub kix laux leeing.
25 Maix tak yuh kaing Siyiex tix mai Nawh Cao tak nawb bwan ka blah mai rawm maix, mai tak teei ti tik jhawm saux khaing sinax pex.
26 “Aux tak ang kieh pa laux kawn mai pa neh koe ka daux haktiex pex, Aux tak kieh baux ju pex grum naog.”
27 “Aux tak ploi rhawm pa chix lhat graung ka Aux koe sivoe pex, Aux tak kieh krax sivix rhawm koe sinax ceu pui pa sang yuh pex laux pa sipub pex kah, Aux tak deeh kieh pui koeng deeh veeh ti to khaing pex.
28 Aux tak ploi awng lung hu sivoe pex, sonsang grheu pui Hiwix mai pui Hitix mai pui Khananix khaing sivoe pex.
29 Aux tak ang grheu pui an khankix lih khaing sivoe maix daux tix num, phan yuh nan haktiex tak lih ti yi mai totiag khankix tak pre haoh hun sonsang kieh maix laux.
30 “Aux tak grheu kix khaing sivoe maix, tix bawg ceeix ceeix tom sidah pre haoh hun maix mai pon ti cie haktiex an mawh sinngao tix.
31 “Aux tak tat mee haktiex maix jah ka rawm sigrit sigra raoh tom hoek ka rawm sigrit sigra Philitix mai jah khaing daux tiag tom hoek ka rawm klawng Upharetix, mawh kheu Aux tak ap pui pa ot haktiex an daux tawm taix maix, maix tak grheu kix lih sivoe maix.
32 “Maix tak ang pon ti yuh sijax mukheu tau mai kix mai siyiex kix.
33 “Kix tak ang yaox ti ot daux haktiex pex, phan yuh nan kix tak kieh pex lud ka Aux, mawh kheu phan pex yuh kaing siyiex kix, an tak mawh kie ka pex heue.”