18
Krax Keud Pa Tawx Yesaraw
1 Yesaraw cao giex kaing li Midian, pa mawh paox Mose, hoik mhong ka can pa yuh Siyiex ka Mose mai son pui nawh Isarelax, grawng pa viex Siyiex pui Isarelax lih khaing Ejiptux.
2 Khaix an Paox Mose pa mawh Yesaraw viex moeng Mose, Zibawrax pa hoik ploi nawh ing,
3 tau mai kawn simex nawh ra kaux, Ref 18:3 Cau 7:29 ceu kaux tix kaux mawh Gerashom, mawh kheu nawh ah nin, “Aux hoik sax mawh nyo sinie daux haktiex tang dah.”Ref 18:2-3 Lih 2:21-22
4 Ceu kaux an tix kaux mawh Eliaza. Mawh kheu nawh ah nin, “Siyiex keeing aux, mawh pa teem aux mai kieh aux luad luan khaing lawm vaid Pharaw.”
5 Paox Mose pa mawh Yesaraw viex moeng Mose mai kawn simex nawh, ra kaux hoek tau ka Mose daux tiag, dee bang nawh ka gawng Siyiex.
6 Yam an, pui tix kaux hoek ah nin ka Mose, “Paox maix Yesaraw hoek tau mai moeng maix, khawm kawn simex maix ra kaux, ”
7 Mose lih plak praix mai rieb ka paox tix mai nawh ngeuh kaing tix mai ngheet ka nawh mai kiex chawk grawng krax nyawm ot paox tix, tix kaux hoik tix kaux mai laig daux nyiex gox man.
8 Mose krai paox tix Yesaraw mhong grawng pa hoik yuh Siyiex leeing ju, ka Pharaw mai ka pui Ejiptux khankix mai ceu pa yaox pui Isarelax pa nu pa ciien daux krax daux laux mai grawng pa hoik kieh Siyiex kix luad luan.
9 Yesaraw gaux rhawm, son krax pa mhawm pa yuh Siyiex khawmuik ka pui Isarelax khankix, pa hoik taoh Nawh Cao kix khaing daux tawm taix pui Ejiptux.
10 Yesaraw ah nin, “Kieh Siyiex koe bwanson, pa taoh maix luan khaing daux taix pui Ejiptux mai khaing taix Pharaw mai pa taoh pui khankix luan khaing taix pui Ejiptux.”
11 “Aux hoik tawng Siyiex leeing ju mawh pa ting khaing siyiex tang kaux mai pex ka pui pa ting rhawm ca nyhau ka piang pui Isarelax khankix.”
12 Paox Mose Yesaraw yuh krax tan pa gleeing mai tan ka Siyiex, Arun mai kuad song pui Isarelax khankix, hoek sonsang ih priex preem tau mai paox Mose sivoe Siyiex.
Bawg Yam Prawng Ca
(Pi 1:9-18)
13 Daux singaix pasax, Mose ngawm sonsang prawng ca ka pui khankix mai pui khankix cung sivoe Mose, jah ponngawb tom hoek ponbo.
14 Yam yaox paox Mose ka ceu pa yuh nawh ka pui khawmuik, nawh ah nin, pa yuh maix ka pui in khankix mawh ceu pa yuh ka mawx? maix lai ngawm ti prawng ca nong nong mai kieh pui cung plak sivoe tix, jah ponngawb tom hoek ponbo yuh ka mawx?
15 Mose ah nin ka paox tix, “Mawh kheu pui khankix hoek ka aux, sonsang chawk kix ka Siyiex,
16 Yam si mah kix mai paox tix, kix hoek ka aux mai aux tak prawng see sinax pui tix kaux mai paox plawg kix mai aux kieh kix tawng ka beenli Siyiex mai lox tat jhawm prawng Nawh Cao khankix.”
17 Paox Mose deeh ah nin ka nawh, “Ceu pa yuh maix in, ang mawh pa mhawm.”
18 “Maix mai pui pa ot tau mai maix, tak awn riang rao, mawh kheu beeh glawm in mawh pa ciien son maix, maix ang doh pon yuh nong nong.
19 Nghiet ka lox aux yam in aux tak tawx rhawm keud dong sawn ka maix mai Siyiex tak ot tau mai maix! maix tak mawh pa yuh kaing khankix sivoe Siyiex mai viex grawng khankix hoek ka Siyiex,
20 mai maix tak gau kix ka lox lai beenli mai lox tat jhawm prawng Siyiex mai kieh kix tawng krax pa sang lawng kix mai kaing pa khaw kix ti yuh.
21 Lheu khaing an laug pui pa sang pon yuh kaing, khaing pui in khawmuik, pui pa lhat graung ka Siyiex, pui pa kaux sijax mai pui pa koeng ka sinngao pa ang rahsee, mai yaog cao pa kwang ka piang kix, pa kwang ka piang cub tix rheng, ka piang cub tix yieh, ka piang cub tixphwan mai ka piang cub kao kaux.
22 Kieh kix tang prawng ca ka pui ku bawg yam. See pa ting ceu khankix kix tak viex hoek ka maix, phan mawh see pa iak kuceu, kieh kix tang prawng cao tix, mawh kheu nan, kix rom ti klawm beeh glawm mai maix mai an tak mawh pa chaong son maix.
23 Phan maix yuh ceu in, awm lox pa tawm Siyiex ka maix, maix tak pex mai kaing tak kaux cong mai pui khawmuik tak hu ka dee ot tix ka daux pa nhim.”
24 Mose nghiet ka lox paox tix mai yuh awm pa ah nawh,
25 Mose laug pui pa pon yuh cao kaing ka daux pui Isarelax mai kieh kix yuh cao kaing ka piang pui khankix, pa kwang ka piang cub tix rheng, ka piang cub tix yieh, ka piang cub tixphwan mai ka piang cub kao kaux.
26 Kix prawng ka pui ku bawg yam mai kix viex grawng see pa nu hoek ka Mose, see pa iak kuceu kix tang prawng ca cao tix.
27 Mose kieh paox tix deeh ing mai nawh deeh hu ka haktiex cao tix heue.