15
Lai Rhax Mose
1 Yam an Mose mai pui Isarelax khankix ah lai rhaxRef 15:1 Jhi 15:3 son Siyiex yuh nin, “Aux tak ah lox rhax ka Siyiex, mawh kheu hoik pex Nawh Cao ka daux pa ting min plakngai! brung khankix mai cao pa brug, Nawh Cao hoik tik daux rawm sigrit sigra!
2 Siyiex mawh riang rao aux mai lai rhax aux, Ref 15:2 Yaog 118:14; Isa 12:2 Nawh hoik mawh krax taoh son aux, kheu Nawh mawh Siyiex keeing aux mai aux tak yaog yaw Nawh ting.
3 Siyiex mawh pui naing, ceu kaux Nawh mawh Siyiex leeing ju.
4 Ling lawx naing Pharaw mai kru naing nawh, Nawh Cao hoik tik daux rawm sigrit sigra, cao kaing naing pa hoik laug nawh kawx, hoik simam daux rawm sigrit sigra Raoh.
5 Rawm hoik kheem ka kix, kix hoik com awm lon simaox greem rawm.
6 “Siyiex leeing ju eue, taix khawn dawm Maix hoik mawh pa koe min pakngai ka daux sibrawm, Siyiex leeing ju eue, taix khawn dawm Maix hoik dheem pui pa koeng tom phawng.
7 Maix Cao hoik mawh pa kied ting sibrawm, Maix Cao hoik pex ka pui an kix pa tieh feen ka Maix, Maix hoik ploi krax song rhawm tix hu awm ngu mai gleeing kix laux leeing awm nyhee.
8 Bhawm pa lih khaing daux meeh Maix mai rawm khankix khrawm paox tix tau, rawm khankix jung rahsee awm ton gawng mai dee raux rawm hoik kiien ka daux rawm sigrit sigra heue.
9 Pui koeng ah nin, Aux tak hawt pheet kix, Aux tak krup ka kix, Aux tak gwieh kraung pa tud rhim, krax koe rhawm Aux, tak vah ka piang kix. Aux tak teei lawm vaid ti lih, taix Aux tak yuh kix laux leeing.”
10 Maix Cao kieh bhaung ting phlu, Rawm sigrit sigra hoik kheem ka kix, kix com greem rawm awm sivun, ka daux rawm pa ting riang.
11 Siyiex leeing ju eue, ka daux siyiex tang ceu mawh mawx pa awm Maix lie? mawh mawx pa kied singax singe pa kied ting min pakngai mai koe krax lhat graung daux pa yaog yaw kah, yuh pa daox am khankix uik.
12 Maix nyeu taix khawn dawm tix lih, haktiex hoik bleet ka kix.
13 Daux krax caux rhawm Maix, thung pui pa hoik taoh Maix khankix, hu ka riang rao Maix, ka dee ot pa singax Maix.”
14 “Pui tak mhong mai lhat graung kah, krax laux rhawm tak hoek ka piang dee ot pui Philitix.
15 Yam an cao kaing pui Edom khankix hoik yaoh yee, pui Mawbax pa ting riang rao, krax lhat graung hoik giex kix, pui pa ot Khanan khawmuik, hoik siyaung sikua hu.
16 Krax lhat mai krax yaoh hoek piang kix, kheu plawng taix pa ting sibrawm Maix, kix hoik kaog awm simaox, tom yam hoik luan pui khankix, Siyiex leeing eue. Tom yam hoik luan pui khankix, Mawh pui pa hoik taoh Maix hu.
17 Maix tak viex kix laig mai sum kix ot ka daux gawng sinngao Maix an, ka dee an, Siyiex leeing ju eue, mawh dee pa hoik yuh maix son dee ot Maix Cao, Siyiex leeing ju eue, Mawh dee singax singeh pa hoik phan hoik yuh Maix ka taix tix.
18 “Siyiex tak kuang, leeing ju,
19 Mawh kheu brung Pharaw mai ling lawx naing nawh mai pui naing brung nawh, laig ka daux rawm sigrit sigra mai Siyiex deeh kieh rawm sigrit sigra kheem ka piang kix. Viang mawh nan, ceu pui Isarelax khankix, hu ka piang tiex kroh, daux sigreung rawm sigrit sigra heue.
Lai Rhax Meriam
20 Puxke bun Arun pa mawh Meriam, bun cao jhai giex kraung daux taix tix mai can bun khawmuik lih hu hawt khaix nawh, tau mai kraung mai graoh.
21 Meriam kawx “Rhax lai ka Siyiex leeing ju, mawh kheu hoik pex Nawh cao ka daux krax pa koe min plakngai, brung mai cao pa brug khankix, Nawh Cao hoik tik daux rawm sigrit sigra!”
Yuh Rawm Song Deeh Tie
22 Mose viex pui Isarelax hu khaing rawm sigrit sigra raoh. Khaix an kix lih hu ka daux tiag Shurax loe ngaix ka daux tiag an mai ang yaox ka rawm ceeix kawx.
23 Yam hoek kix ka Mara, kix ang pon nyaux ka rawm pa koe daux Mara khankix, mawh kheu song, mawh kheu nan, ceu kaux dee an, tak kok mawh Mara tom in singaix.
24 Pui khankix deeh baox ngau tan ah nin ka Mose, “Ex sang nyaux patix lie?”
25 Mawh kheu nan, nawh kok yo ka Siyiex leeing ju mai Siyiex leeing ju jhi nawh yaox khaox tix gaw. Yam tik nawh khaox an ka daux rawm, rawm deeh tie kah, Nawh Cao yuh gumlox beenli son kix tan mai Nawh Cao cheuk ti yaox kix tan.
26 Nawh ah nin “Phan pex cu nghiet ka lox Siyiex leeing ju pex mai yuh pa rahsee sivoe ngai Nawh Cao mai daong yhaok tix ka gumlox pingnyap Nawh khankix mai hawt gumlox beenli Nawh, Aux tak ang lai deuh jhawm saux ka piang pex tix ceu kawx, awm pa hoik viex Aux hoek ka piang pui Ejiptux. Mawh kheu Aux mawh Siyiex leeing ju Cao pai jhawm saux pex.
27 Kix hoek ka Elem dee koe rawm daux kao ra mu mai khaox jhie yaong atixgliah gaw mai kix peung tan hawt rawm heue.