1 In mawh cub nyiex ma cao kaing khankix mai doeh ru, kix pa hoik lih hu tau mai aux khaing veng Babulon ka baux yam kwang simiang Atazerit, 2 khaing daux cub kawn praix Phinehiet khankix mawh Gerashom mai khaing cub kawn praix Itama khankix mawh Danyelax mai khaing cub kawn praix Davit khankix mawh Hatux. 3 Khaing cub kawn praix Shekhanix daux doh doeh Parot khankix mawh Zekharix mai pa rom carang tix tau mai nawh khankix koe simex tix yieh tixphwan kaux. 4 Khaing daux cub kawn praix Pahat-mawbax mawh Elihonie kawn simex Zerahiyax mai simex pa rom tix tau mai nawh ra yieh kaux, 5 khaing daux cub kawn praix Shekhanix mawh Yahazilax mai simex pa rom tix tau mai nawh loe yieh kaux, 6 khaing daux cub kawn praix Adin, mawh Ebiet kawn simex Yawnasan mai simex pa rom tix tau mai nawh mawh tixphwan kaux, 7 khaing daux cub kawn praix Elam, mawh Yeshayax kawn simex Athaliyax mai simex pa rom tix tau mai nawh atixgliah kaux, 8 khaing daux cub kawn praix Shephatiyax, mawh Zebadiyax kawn simex Mikhalax mai simex pa rom tix tau mai nawh tidaix kaux, 9 khaing daux cub kawn praix Yobax, mawh Obadix kawn simex Yehelax mai simex pa rom tix tau mai ra yieh kao daix kaux, 10 khaing daux kawn praix Shelomit, mawh Yoshiphin mai simex pa rom tix tau mai nawh tix yieh tixgliah kaux, 11 khaing daux cub kawn praix Bebie, mawh Zakharix. Kawn simex Bebie mai smex pa rom tix tau mai nawh tixnga daix kaux, 12 khaing daux kawn praix Azagat, mawh Yohanan kawn simex Hakatan mai simex pa rom tix tau mai nawh tix yieh kao kaux, 13 khaing cub kawn praix ghoik Adonikam, ceu kaux mawh inkix Elipheliet, Yoelax mai Shemayax mai simex pa rom tix tau mai kix tigliah kaux. 14 Khaing daux kawn praix Bigavie, mawh Utie mai Zabuk mai simex pa rom tix tau mai kix atixgliah kaux.

15 Yam in aux kraix khrawm kix hoek ka hawt rawm klawng pa lih hu plak veng Ahava mai kix bang tix ot tan loe singaix heue. Aux hoik jhak ka sinax pui mai daux sinax cao giex kaing li khankix mai ang yaox ka cub kawn praix pui Lewix khankix tan heue. 16 Khaix an aux kok ka cao kaing khankix pa mawh Eliaza, Arelax, Shemayax, Elanatan, Yarip, Elanatan, Natan, Zakharix mai Meshulam mai khawm pui pa koe krax tawng yung khankix pa mawh Yoyarip mai Elanatan hoek ka tix heue. 17 Aux tawx lox kieh kix hu Ido pa mawh cao kaing ting ka dah dee pa mawh veng Khasiphia mai tawm grawng pa sang caw kix tix krai ka Ido mai puxaik nawh khankix pa mawh pui kham ti yuh kaing son nyiex bwan Siyiex, ka dah dee ot kix ka daux veng Khasiphia, son tak sang viex kix kawncau mau soi an khankix hoek ka yix, son nyiex bwan Siyiex ex heue. 18 Khaix an ka daux bwanson sibrawm plawng taix Siyiex ka piang ex, kix viex pui tix kaux pa koe krax tawng yung, pa kaoh khaing kawn praix Mahali kawn simex Lewix pa mawh kawn praix ceu pui Isarelax mai pa kok ceu kaux mawh Sheribix tau mai kawn praix nawh khankix mai puxaik kix kao daix kaux, 19 mai Hashabix tau mai Yeshayax khaing kawn praix Merarix khawm puxaik nawh khankix mai cub kawn praix kix tixnga kaux, 20 ma pui pa kham ti yuh kaing nyiex bwan Siyiex khankix, pa hoik yaog Davit mai cao kaing khankix ti deuh beeh glawm son kaing jhaw ceu pui Lewix khankix ra yieh tixnga kaux, kix khawmuik hoik mawh pa tiiem ti deuh ceu kaux heue.

21 Yam an aux krai pao sonsang twah ka pa ih ka hawt baoh rawm klawng Ahava tan, sonsang tiem rhawm ex plak sivoe Siyiex ex, sonsang sawg ex krax pa rahsee khaing ka daux Nawh Cao son ex mai son kawn praix ex khankix mai son kraung khrai sinngao cie ex khawmuik heue. 22 Grawh grawng nawh aux kaig tua ka mhaing tix krax teem ka simiang pa mawh pui naing mai pui naing brung khankix sonsang tiebtie kix ex khaing daux krax daux laux khaing pui koeng, mawh kheu hoik krai ex lox yuh nin ka simiang, “Sibrawm plawng taix Siyiex koe piang ex can pui pa sawg ka pa mhawm Nawh Cao mai krax song rhawm Nawh Cao koe piang pui pa tik vud ka Nawh Cao heue. 23 Mawh kheu nan ex hoik twah pa ih hoik khyox khaw grawng in ka Siyiex ex mai Nawh cao hoik pawk lox rawg ex bwan heue.

24 Khaix an aux laug ti deuh cao giex kaing li pa ting kao ra kaux, pa mawh Sherebix, Hashubix mai khawm puxaik kix khankix kao kaux, 25 mai hoik ciang tix tawx mau mai khri khawm kraung pa shiao khankix, ka kix pa mawh pa tan son nyiex bwan Siyiex ex, pa hoik tan simiang mai cao pa tawx krax keud nawh khankix khawm cao kaing ting greem nawh khankix mai pui Isarelax khankix pa ot tan khawmuik heue. 26 Pa hoik ciang aux tix tawx ka daux tawm taix kix mawh mau liah yieh tixphwan talantan mai kraung mau khankix tix yieh talantan mai khri khankix tix yieh talantan, 27 pan khri tixnga mu, pa sidu cien mai plah khri tix rheng plah mai kawk nyaux ra mu pa yuh tix ka tawng pa mhawm plang mai pa kied koe ngawh koe jum awm khri khankix heue. 28 Aux ah nin ka kix, “Pex mawh pa singax singeh son Siyiex, kraung shiao khankix kawx mawh pa singax singeh mai mau khankix kawx mawh pa tan ka daux pa koe rhawm tix ka son Siyiex keeing pex heue. 29 Yuh satix mai pau tix jhak tom sidah hoik ciang maix tix tawx plak sivoe cao giex kaing li pa ting mai pui Lewix khankix mai cao kaing nyiex ma ceu pui Isarelax khankix, ka daux lawg nyiex bwan Siyiex pa koe ka daux veng Yerusaliem heue.” 30 Mawh kheu nan cao giex kaing li mai pui Lewix khankix, hoik rieb ka mau mai khri mai khawm kraung shiao khankix pa hoik ciang tix, sonsang viex ankix hu ka nyiex bwan Siyiex ex ka veng Yerusaliem heue.

31 Khaix an ex hoik lih khaing rawm klawng Ahava ka daux khix tix kao ra ngaix, sonsang hu ka veng Yerusaliem heue, sibrawm plawng taix Siyiex ex koe piang ex mai Nawh Cao taoh ex khaing tawm taix pui koeng mai khaing pui jawm khankix hawt krax laux heue. 32 Mawh kheu nan ex hoik hoek ka veng Yerusaliem mai ot tan loe ngaix heue. 33 Yam hoek ka daux pon ngaix tingaix, mau khri mai kraung shiao can pa hoik viex ex hoek mai tix khankix, hoik ciang ti ka daux nyiex bwan Siyiex ex mai tawx ka taix Meremot kawn simex cao giex kaing li Uriyax mai Eliza kawn simex Phineniet pa ot tau mai nawh tan mai pui Lewix khankix pa mawh Yozabat kawn simex Yawsux mai Nodix kawn simex Binnui khankix hoik koe tau mai kix. 34 Ka daux singaix an, kix simin tix ciang can pa koe ceu mai tiiem ti deuh ka daux carang khawmuik heue. 35 Can pui pa hoik deeh hoek khaing hoik giex laung tix khankix, hoik tan krax tan pa gleeing tix khankix ka Siyiex ceu pui Isarelax, ka mawie mhaing kao ra mu, son ceu pui Isarelax khawmuik mai yung mhaing tixdim liah mu mai kawn yung iak atixgliah aliah mu mai khawm pex mhaing khankix kao ra mu, son krax tan pa pluat ploi phimap, in khawmuik mawh krax tan pa gleeing son Siyiex heue. 36 Kix ap lox tawm simiang ka pui tang tokaux simiang mai ka cao pa kwang haktiex khankix ka baoh haktiex toi rawm klawng plak klip singaix khankix heue. Mawh kheu nan kix hoik tawx krax teem ka pui khankix mai ka nyiex bwan Siyiex heue.