1 Maix pa mawh kawn pui eue, teei vaig lawm tix plak pa awm gawn khlao pui khlao hauk mai khlao hauk kaing mai khawm hauk bheup maix ka heue. Khaix an teei jiang mai ciang tang gwieh ti deuh nyum mawx nyum an heue. 2 “Yam hoik sidah singaix bawg yam pa lai lawm an maix tak gleeing hauk an loe nyum tix nyum daux sigreung veng, khaix an maix baox teei an mai son pa kawn deuk loe nyum tix nyum an maix tak taing prung prang ka daux bhaung Aux tak sang lawd vaig tix plak mai ploi hawt khaix kix heue.” 3 Maix baox teei hauk an ceeix ceeix mai phyawk ka toeh kraung ceep maix heue. 4 Khaix an baox teei hauk an ceeix ceeix mai taing ka daux sigreung ngu kieh gleeing heue. Grawh grawng nawh ngu an tak lih prung prang ti hu ka daux sinax nyiex ma ceu pui Isarelax khawmuik heue. 5 “Siyiex ah nin, in mawh riang pakpeung veng Yerusaliem, Aux hoik deuh veng an ka sinax ceu pui khankix mai sinax meung haktiex, pa koe hawt vung viang nawh khankix heue. 6 Veng Yerusaliem tieh feen ka grawng krax prawng ca Aux mai nie lheu yuh ceu pa caox caig khaing ceu pui an khankix mai nie lheu tieh feen ka lox lai beenli pa deuh Aux khaing haktiex pa koe hawt vung viang nawh khawmuik, mawh kheu kix hoik thiang ka grawng krax prawng ca Aux khankix mai ang lai hawt lawng ka lox lai beenli pa deuh Aux heue.” 7 Mawh kheu nan Siyiex ah nin, “Mawh kheu kied nie lheu ang pex koe krax cu nghiet lheu khaing pui haktiex khankix, pa koe hawt vung viang pex khawmuik mai kheu ang pex cu hawt ka lox lai beenli pa deuh Aux mai ang priex rien ka krax prawng ca Aux mai ca hawt yuh awm krax prawng ca pui haktiex pa koe hawt vung viang pex khawmuik,” 8 mawh kheu nan, Siyiex ah nin, tokaux cao Aux hoik tieh feen ka pex mai Aux tak sang tawx krax prawng krax ciyang ka sigreung pex, ka plak sivoe ngai ceu pui khankix heue. 9 Aux tak sang yuh ceu pa ang Aux sax yuh ka sinax pex mai pa ang Aux lai baox deeh yuh pa awm ceu in tix bawg kawx, kheu jao grawng krax seeing brai pex khawmuik heue. 10 Mawh kheu nan, keeing khankix tak ih kawn simex tix ka sigreung pex mai kawn simex khankix tak ih ka keeing tix heue. Can pex pa kawn deuk khankix, Aux tak prung prangti tik pex ka bhaung pa hoek khaing ku plak heue.Ref 5:10 Doe 4:10 11 Mawh kheu nan, Siyiex ah nin, “Awm im ju Aux, kheu jao grawng kieh maix dee pa singax singeh Aux seeing ka can ceu pa seeing brai maix khankix, mawh kheu nan, Aux tak sang kieh maix grai grup mai ang lai lhawk ka maix mai ang koe krax caux rhawm ka piang maix heue. 12 Khaing daux pex loe nyum tix nyum tak yum ka jhawm saux preng mai laux leeing ka krax hot sibhawm ka daux sinax pex, daux loe nyum an tix nyum, tak goh tix yum ka lawm vaig hawt vung viang maix khankix khawmuik mai Aux tak prung prang ti tik an tix nyum ka bhaung pa hoek khaing ku plak mai Aux tak ploi vaig hawt khaix kix heue. 13 “Awm an, krax pa song rhawm Aux tak sang mawh pa hoik grum naog mai Aux tak kieh krax pa song rhawm tix hoek ot ka piang kix mai Aux tak sang fah rhawm ka hoik pawk bix tix mai kix tak sang tawng ka mawh Aux Siyiex, pa hoik krai grawng an ka daux pa kied song rhawm tix yam hoik kieh Aux krax pa sang meet rhawm Aux hoek ka piang kix heue. 14 Lheu khaing an, Aux tak sang kieh maix mawh dee pa yiien yawg pui pa koe lox salao ka daux sinax ceu pui khankix pa ot hawt vung viang maix khankix mai plak sivoe ngai pui pa lailing ti hu hawt baoh an heue. 15 Mawh kheu nan an tak sang mawh pa salao sibriem pui mai krax pa tang pui phimap mai pa tawx krax gau krax sawn mai pa daox am, ka ceu pui pa hawt ot hawt vung viang maix khankix, yam tawx Aux krax ciyang ka piang pex tau mai krax pa song rhawm tix, ti sang koe lox ne ka pex khankix heue. Aux pa mawh Siyiex hoik krai ah nin heue. 16 “Yam ploi Aux krax lhat graung te ak pa caox, pa mawx krax sibhawm praix pa sang yuh kix laux leeing hoek ka piang kix mai Sibhawm praix pa ploi Aux hoek tak sang nie baox hun piang pex mai tat ti tik blah pa sang tawx ka pex heue. 17 Mawh kheu nan, Aux tak ploi pa sibhawm praix mai khawm totiag khankix pa sang yuh laux mai an kix tak rhim ti teei mai yuh pex laux leeing heue. Saux preng mai pa pah yum khankix tak laig ka daux pex mai Aux tak viex lawm vaig hoek ka piang pex, Aux pa mawh Siyiex hoik krai ti deuh awm an heue.Ref 5:17 Jhi 6:8