1 Khaix an nawh dee viex aux hoek ka siviex ting nyiex bwan mai jhak heue, koe rawm pa lih khaing greem siviex nyiex bwan pa hu ka plak lih singaix, mawh kheu nyiex bwan hoik veeh ngai tix ka plak lih singaix mai rawm lih hu plak greem praok plak dawm siviex nyiex bwan, ka plak seh khu dee tan heue.Ref 47:1 Zak 14:8; Yo 7:38; Jhi 22:1 2 Nawh viex aux lih krax siviex plak laong mai kieh aux lailing vung viang plak praix tom hoek ka diang siviex veng plak praix, siviex pa veeh ngai tix see plak lih singaix mai koe rawm pa lih hu ka praok taix khawn dawm tan heue. 3 Pui an lih hu ka plak lih singaix tau mai maox diag tiag tix nyaing ka daux taix tix, nawh tiag diag koe tix rheng sawk mai nawh kieh aux tiang rawm mai rawm an raux tom hoek pie mee ngai liag aux. 4 Nawh baox tiag diag koe tix rheng sawk mai deeh baox kieh aux tiang ka rawm mai rawm an raux tom hoek mee si ngawng aux mai Nawh baox tiag diag koe tix rheng sawk mai kieh aux tiang ka rawm mai rawm an raux tom hoek mee nyoi aux. 5 Nawh baox tiag diag koe tix rheng sawk mai an lih ti mawh rawm klawng pa ang aux lai pon tiang kah, mawh kheu rawm an haok mai raux mai lih mawh rawm tom pon loe pui kah mai lih mawh rawm klawng pa ang lai pon tiang kah. 6 Nawh ah nin ka aux, “Kawn pui eue, mawh hoik yaox maix ceu in lie?” Khaix an nawh deeh viex aux hoek ka praok rawm klawng. 7 Yam deeh hoek aux, aux yaox ka khaox tom nie ka praok rawm klawng plak in plak an, 8 nawh ah nin ka aux, “Rawm in lih hu plak lih singaix tom hoek ka Arabax, mai laig ka daux rawm sigrit sigra yum, yam laig ka daux rawm sigrit sigra yum mai kieh mawh rawm pa pon nyaux pui kah heue. 9 Ka dee hoek rawm klawng an kudah kudee mai totiag pa chix chuh chix mu kuceu tak yaox ti im ju mai dee an kax tak koe tom nie, mawh kheu hoek rawm ka dee an, mawh kheu rawm klawng an laig ka daux rawm sigrit sigra mai rawm an lih ti singaong, mawh kheu nan, hoek rawm klawng an dee mawx, can pa chix chuh chix mu kuceu im ju kah heue. 10 Pui teei kax tak cung ka praok rawm sigrit sigra, jah khaing yaong Engedi tom hoek ka yaong En-galem mai baoh dee an tak mawh dee sang ploi rub ka mai ka dee an tak koe kax kuceu tom nie pa awm kax koe ka daux rawm sigrit sigra pa kied ting. 11 Viang mawh nan, ka daux ung daux glaox nawh tak ang mawh rawm singaong mai tak mawh rawm song awm kih heue. 12 Ka praok rawm klawng pa koe khawm ra plak, tak kuah khaox kuceu son pa ih, lhax tak ang fit mai plix nawh tak ang lai chix jud mai plix pa mhawm ku khix, mawh kheu rawm lih son khaing dee pa singax singeh, plix khaox an kix tak mawh son pa ih mai lhax nawh mawh son pa pai jhawm saux heue.Ref 47:12 Jhi 22:2

13 Siyiex ah nin, “In mawh haktiex mee praix pa tak sang gwieh maix ti tawx mawh sinngao ka daux sinax ceu pui Isarelax kao ra ceu, Yosiep tak pon son cie tix ra nyum. 14 Pex tak gwieh sidu ka paox tix, mawh kheu Aux hoik tiextu tix tawx an ka keeing pex mai haktiex in tak lih mawh sinngao pex. 15 “In tak mawh haktiex mee praix pa koe ka baoh plak laong, jah khaing rawm sigrit sigra ting ka krax hu Hetalon tom hoek ka krax laig Hamat mai hoek ka veng Zedat, 16 veng Berawta veng Sibarem pa koe mee praix Damasekat mai Hamat tom hoek ka veng Hazahatikon, pa koe ka piang mee praix veng Hawran, 17 awm an, mee praix tak jah khaing rawm sigrit sigra tom hoek ka veng Hazaenan pa koe ka mee praix plak laong veng Damasekat tau mai mee praix Hamat plak laong an mawh mee praix plak laong. 18 “Mee praix plak lih singaix, jah ka sinax veng Hawran mai veng Damasekat mai ka sinax haktiex Gilat mai haktiex Isarelax tom hoek ka rawm klawng Yawdan mai tom sidah hoek ka rawm sigrit sigra plak lih singaix, in mawh mee praix plak lih singaix.” 19 “Mee praix plak seh, jah ka veng Tama tom hoek ka rawm Meribakadiet tom sidah ka rawm klawng Ejiptux ka rawm sigrit sigra ting. In mawh mee haktiex plak seh.” 20 “Mee praix plak klip singaix, jah ka rawm sigrit sigra ting pa koe plak seh, tom hoek ka plak sivoe veng Hamat plak in plak an, in mawh mee praix plak klip singaix heue.” 21 Mawh kheu nan maix tak deeh gwieh ti tawx haktiex in, ka sinax ceu pui Isarelax awm pa koe doeh ru kix. 22 Maix tak yuh nieb son sinngao cie cao pex mai son pui tang meung pa peung ti ot ka daux sinax pex khankix mai pa koe ka daux sinax pex. Kix tak pon ti mawh pui doeh ru pa keh ka daux haktiex ceu pui Isarelax awm pex mai pex tak yuh nieb sonsang pon sinngao ka daux ceu pui Isarelax. 23 Siyiex ah nin, “Pui tang ceu khankix tak pon sinngao tix ka can haktiex dee ot tix kudah heue.”